Samarqand – jumıssızlıq hám kámbaǵallıqtı qısqartıwda, investiciya hám eksportta úlgili aymaq boladı

Mámleketimiz basshısı Samarqandqa saparın dástúrge bola, Imam Buxariy mavzoleyin zıyarat etiwden basladı. Quran oqılıp, pátiya etildi.
Prezidentimizdiń baslaması menen bul kompleks ullı muhaddis babamızdıń islam dúnyasında tutqan joqarı abırayına, úlken potencialına múnásip tárizde qaytadan qurıldı. Ulıwma maydanı 45 gektardı quraytuǵın aymaqta úlken maqbara, 10 mıń adamǵa mólsherlengen meshit hám hákimshilik imaratı, muzey, kiriw hám shıǵıw áywanları qurıldı. Zıyarat etiw ornınıń tórt múyeshindegi 75 metrlik minaralar oǵan sawlat baǵıshlaǵan.

Bul jer tek zıyarat etiw emes, ilim-aǵartıwshılıq, tárbiya hám ibrat orayı bolıwı, Imam Buxariydiń ullı izlenisleri, bilimi hám jetikligi zıyaratshılar, ásirese, jaslar ushın jaqsı úlgi bolıwı kerek ekenligi itibarǵa alınıp, komplekste innovaciyalıq muzey shólkemlestirildi. Ol islam dúnyasında muhaddisler sultanı dep tán alınǵan Imam Buxariydiń ómiri hám ilimiy miyrası, islam aǵartıwshılıǵınıń rawajlanıwına qosqan úlesin kórsetedi.

Kompleks aldın bir kúnde 12 mıń zıyaratshıǵa xızmet kórsetken bolsa, házir 65 mıń miymanǵa xalıqaralıq standartlarǵa sáykes xızmet kórsetiw imkaniyatı jaratılǵan.
Bunnan tısqarı, aymaqta Imam Buxariy xalıqaralıq ilimiy-izertlew orayı hám Hádis ilimi mektebi jaylasqan.

Zıyarat etiw ornı átirapında 570 milliard sum qarjı jumsalıp, miymanxanalar hám sawda-servis orınları shólkemlestirildi. Onda 1 tórt juldızlı, 2 úsh juldızlı miymanxanalar hám 22 shańaraqlıq miyman úyleri qurılǵan. Bul obektler tolıq kommunikaciya tarmaqları menen támiyinlenip, aymaǵı abadanlastırılǵan. 2026-jılǵa shekem aymaqta kóklemzarlastırıw jumısların ámelge asırıw hám avtomobiller turatuǵın orınlardı shólkemlestiriw rejelestirilgen.

Mámleketimiz basshısı Imam Buxariy zıyarat etiw ornı xalqımızdıń bay ruwxıy miyrası hám dóretiwshilik potencialınıń ayqın úlgisi bolǵanın atap ótip, komplekste házirgi waqıtta alıp barılıp atırǵan sońǵı abadanlastırıw jumısların sapalı hám óz waqtında orınlaw boyınsha juwapkerlerge tapsırmalar berdi.

Prezidentimiz Aqdárya rayonı Dahbed qalashasında jaylasqan Maxdumi Ázam kompleksinde ámelge asırılıp atırǵan rekonstrukciya jumısları menen tanıstı.
Mámleketimiz basshısı usı jıldıń mart ayında wálayatqa saparı waqtında Mahdumi Ázam zıyarat etiw ornın abadanlastırıwǵa baylanıslı joybar menen tanısqan edi.
Haslı házirgi Kasansay rayonında tuwılǵan sufiy alım naqshbandiya táliymatınıń basshılarınan biri bolǵan. Jas waqıtlarında

Ferǵanadaǵı medresede sawat ashıp, Samarqandta Xoja Ahrar Valiydiń shákirti máwlana Muhammed Qazıy qolında pir dárejesine jetedi. Keyin ala ózi tariqat ilimine baylanıslı 30 dan aslam shıǵarma jazǵan, kóplegen shákirtler jetistirgen.
Bul insanǵa ilim jolındaǵı xızmetleri ushın Maxdumi Ázam ataǵı beriledi. Ilim hám din jolındaǵı uzaq saparınan soń Samarqandta máńgilik qonıs basqan.

Samarqand húkimdarı bolǵan Yalangtosh Bahodir Maxdumi Ázam qábiriniń ústinde mavzoley hám bul jerde úlken meshit, ilim izleniwshileri ushın medrese qurdırǵan. Ol qaytıs bolǵannan soń óziniń wásiyatına bola, usı jerge jerlengen. Ulıwma, zıyarat ornında 50 den aslam qábir tas saqlanǵan bolıp, kópshiligi kimniń húrmetine qoyılǵanı anıqlanǵan. Bul jerde kóplegen ulamalar qatarında eki Awǵanstan húkimdarı (Shah Hidayat ibn Shah Qasim (1668-jil), Shah Saodat ibn Shah Hidayat) da jerlengen.
Oyshıl jerlengen zıyarat ornında joybar sheńberinde keń kólemli rekonstrukciya jumısları ámelge asırılmaqta.

Mahdumi Ázam zıyarat etiw ornınıń ulıwma maydanı derlik 5 gektardı quraydı. Bul jerge keliwshi zıyaratshılar da kóp. Olarǵa sharayatlardı jaqsılaw maqsetinde Mahdumi Ázam mavzoleyi janında úsh qabatlı zamanagóy avtomobil turıw ornı, kiriw dárwazası hám hákimshilik imaratlar, taharatxana, mıń adamlıq meshit hám qosımsha áywanlar qurılmaqta.

Ońlaw jumıslarınan soń bir waqıttıń ózinde 35 mıń zıyaratshını qabıllaw imkaniyatı jaratıladı. Aldınları 5 mıń zıyaratshı qabıl etilgen.
Sonday-aq, aymaqta zıyaratshılarǵa qosımsha qolaylıq jaratıw maqsetinde abadanlastırıw jumısları alıp barılıp, 40 tan aslam sawda hám servis obektleri shólkemlestiriledi.
Oyshıl eske alınıp, Quran oqıldı. Prezident zıyarat ornında terek ekti.

Zıyarat etiw ornın bunnan bılay da abadanlastırıw, baǵda kóp jıllıq terek nállerin otırǵızıp, zıyaratshılar ushın qolaylıqlar jaratıw boyınsha tapsırmalar berildi.
Mámleketimiz basshısı Samarqand qalasındaǵı Házireti Hizr kompleksinde de bolıp, mámleketimizdiń Birinshi Prezidenti Islam Kárimovtıń maqbarasına gúl qoydı.
Quran ayatları oqılıp, pátiya etildi.

Prezident Shavkat Mirziyoev “Samarqand – Urgut” jańa temir jol liniyasında alıp barılıp atırǵan jumıslar menen tanıstı.
Bul temir jol qurılısı usı jıldıń fevral ayında baslanǵan bolıp, ulıwma uzınlıǵı 55 kilometrdi quraydı. Joybar sheńberinde eki vokzal, “Urgut” erkin ekonomikalıq zonasında eki júk stanciyası hám bir qatar kópirler qurıldı. Itibarlı tárepi, bul liniyanı keleshekte tolıq elektrlestiriw rejelestirilgen.

Jańa jónelis eki jup qalalararalıq poezd hám toǵız jup júk poezdınıń qatnawın támiyinlew imkaniyatına iye. Joybardı usı jıldıń aqırına shekem juwmaqlaw názerde tutılǵan. Poezdlardıń qatnawı jolǵa qoyılıwı arqalı jılına 359 mıń jolawshı hám 8,2 million tonna júk tasıw imkaniyatı jaratıladı.

Jónelis Samarqand qalası, Taylaq hám Urgut rayonlarınıń xalqı ushın qáwipsiz hám zamanagóy transport xızmetin usınıwı menen áhmiyetli. Sonday-aq, ishki turizmniń rawajlanıwına da úlken túrtki beredi.
Temir jol infrastrukturası ekonomikanıń tiykarǵı tarmaqlarınan biri bolıp, bul joybar “Urgut” erkin ekonomikalıq zonasınıń potencialın jáne de arttırıwǵa xızmet etedi. Jańa jónelistiń iske qosılıwı nátiyjesinde 130 jańa jumıs ornı jaratıladı.
Mámleketimiz basshısı jámiyetshilik wákilleri menen birge usı jóneliste háreketlenetuǵın poezdda Urgutke bardı.

Sapar waqtında Prezidentimiz temir jol infrastrukturasın rawajlandırıw, jolawshılar ushın qolaylıqlardı bunnan bılay da arttırıw, temir jollardı elektrlestiriw hám olarǵa tutas aymaqlardı abadanlastırıw boyınsha juwapkerlerge qosımsha tapsırmalar berdi. Sonday-aq, jol boylap ámelge asırılıp atırǵan qurılıs hám abadanlastırıw jumıslarına itibar qarattı.

Urgut rayonı úlken potencialǵa iye aymaq sıpatında barǵan sayın áhmiyetli orın iyelep atırǵanı atap ótildi. Bul jerdegi xalıq isbilermen, isbilermenlik ruwxı kúshli. Mámleketimiz ekonomikası ushın strategiyalıq áhmiyetke iye bolǵan bunday aymaqlardı rawajlandırıwda bolsa zamanagóy logistika hám infrastruktura sheshiwshi faktor esaplanadı.
Jańa temir joldıń keliwi menen Urgutte ekonomikalıq ósiwdi sheklep turǵan tosqınlıqlar, logistikalıq “tromblar” saplastırıladı. Júk tasıw tezlesedi, ónimler bazarlarǵa arzan hám óz waqtında jetkeriledi, investorlar ushın qolaylıqlar jáne de artıp, aymaqtıń básekige shıdamlılıǵı artadı.

Eń áhmiyetlisi, aymaqta jaratılıp atırǵan jańa imkaniyatlar xalıqtıń turmıs dárejesine tikkeley unamlı tásir kórsetedi. Infrastruktura rawajlanǵan jerde jumıs orınları kóbeyedi, xızmetler jaqsılanadı, isbilermenlik jedellesedi.
Atap ótiliwinshe, bul joybar temir jol tarmaǵın modernizaciyalaw hám keńeytiwge qaratılǵan jumıslardıń áhmiyetli bólegi esaplanadı. Bul processte jumıslardı óz waqtında hám sapalı ámelge asırıw, sanlı texnologiyalardı keńnen engiziw hám qárejetlerdi optimallastırıw zárúr ekenligi aytıldı.

Sapar waqtındaǵı sáwbette mámleketimiz basshısı Samarqandta bolıp atırǵan sociallıq-ekonomikalıq jańalanıwlardıń adamlar turmısındaǵı unamlı kórinisi ayqın kózge taslanıp atırǵanı, jaslardı watansúyiwshilik ruwxında, Jańa Ózbekstannıń dóretiwshileri sıpatında tárbiyalaw haqqında sóz etti. Urgutke shekem tartılǵan temir jolǵa tutas jerlerdi ózlestiriw, olarda awıl xojalıǵı mádeniyatın arttırıw, bilimlendiriw tarawında, sonıń ishinde, qońsı mámleketler menen xalıqaralıq birge islesiwdi bekkemlew zárúr ekenligi atap ótildi.

Urgut vokzalı jańa jónelistiń tiykarǵı noqatlarınan biri. Prezidentimiz vokzal infrastrukturası, xızmet kórsetiw sisteması hám jolawshılar háreketin shólkemlestiriw máselelerine itibar qarattı. Turistler ushın qolaylıqlardı jaqsılaw áhmiyetli ekenligi atap ótildi.
Mámleketimiz basshısı bul jerde Urgut rayonınıń belsendileri menen qızǵın sóylesiw ótkerdi. Sóylesiwde aymaqlardaǵı ózgerisler, xalıqtıń turmıs tárizi hám tınıshlıqtıń qádiri haqqında pikir alısıldı.

Adamlardıń turmıs sharayatların jaqsılaw, dáramat hám abadanlıqtı arttırıw, máhállelerdi abat etiw mámleketlik siyasatta tiykarǵı baǵdar sıpatında belgilenip atırǵanı atap ótildi. Ekonomikadaǵı strukturalıq ózgerisler nátiyjesinde sanaat, awıl xojalıǵı, turizm, transport hám energetika tarawlarında iri joybarlar ámelge asırılıp atırǵanı atap ótildi.
Nuraniylar bul ózgerisler xalıqtıń turmısında sezilerli nátiyje berip atırǵanı, xalqımız reformalarǵa joqarı baha berip atırǵanın atap ótti.

Sonday-aq, Prezidentimiz vokzal átirapında xalıqtıń abadanlıǵın hám aymaqtıń ekonomikalıq tartımlılıǵın arttırıwǵa qaratılǵan qosımsha joybarlardıń prezentaciyası menen de tanıstı. Isbilermenlerdiń baslaması tiykarında jaqın aymaqlarda avtovokzal, shayxana, ekobazar, turaq jay imaratları, jeke menshik mektep hám baqshalar qurıw rejelestirilmekte.

Bul jumıslardıń ámelge asırılıwı nátiyjesinde xalıqqa jańa xızmet túrleri jaratıladı, aymaqtıń sociallıq infrastrukturası jaqsılanadı, isbilermenlik ortalıǵı jáne de jedellesedi. Eń áhmiyetlisi, 350 ge shamalas puqaranıń turaqlı bántligi támiyinlenip, aymaqtıń ekonomikalıq ósiwine qosımsha túrtki beriledi.
Mámleketimiz basshısı Urgut rayonındaǵı “Ferre Group” kárxanasınıń turmıslıq texnika islep shıǵarıw joybarınıń jumısı menen tanıstı.
“Urgut” erkin ekonomikalıq zonasındaǵı bul kárxana keyingi jılları elimizde isbilermenlik subektlerine jaratılǵan qolaylı imkaniyat hám isenimli investiciyalıq ortalıq nátiyjesinde shólkemlestirilgen zamanagóy óndiris kompleksi bolıp esaplanadı.

Dáslep shet elden alıp kelingen komplektlewshi buyımlar tiykarında bir neshe túrdegi turmıslıq texnika quralların jıynaw menen jumıs baslaǵan kárxana búgingi kúnge kelip muzlatqısh, gaz plita, kishi pech, shańjutqısh, morı hám basqa da úy-ruwzıgershilik buyımları, zamanagóy temir esikler islep shıǵarıw boyınsha Oraylıq Aziyada bekkem orınǵa iye iri kompaniyaǵa aylanǵan.
Bul jerde “Dorsa”, “Kleo”, “Ferre” sıyaqlı brendler astında “Ózbekstanda islep shıǵarılǵan” belgisi menen tayarlanıp atırǵan ónimler Oraylıq Aziya mámleketleri hám Ázerbayjanǵa eksport etilmekte. Ishki bazardaǵı báseki ortalıǵında da “Ferre” óz ornın tapqan brendke aylanǵan. Kárxananıń jıllıq quwatlılıǵı házirgi waqıtta ortasha 440 milliard sumlıq 250 mıń dana ónimdi qurap, bul kórsetkish jıl sayın artıp barmaqta.

Óndiris procesinde “Embraco”, “LG”, “DOW”, “Midea” sıyaqlı dúnyadaǵı jetekshi kompaniyalardıń materialları hám komplektlewshi bóleklerinen paydalanıladı. Búgingi kúnde kárxana ónimleriniń lokalizaciyalaw dárejesi derlik 85 procentti quraydı.
Joybardıń ulıwma bahası otız million AQSh dolları bolıp, sırt el investiciyası hám banktiń jeńilletilgen kreditleri tartılǵan. Mıńǵa shamalas jumıs ornı jaratılǵan. Óndiris úskeneleri Germaniya, Túrkiya, Italiya hám Qıtaydıń eń sońǵı markadaǵı texnologiyaları esaplanadı.

Shavkat Mirziyoev bul jerdegi óndiris procesin baqladı, kárxana juwapkerleri hám qánigeler menen sáwbetlesip, xalıqaralıq standartlarǵa sáykes ónimlerdiń túrin kóbeytiw hám sırt el bazarındaǵı ornın bunnan bılay da bekkemlew zárúrligin atap ótti. Bul baǵdarda mámleket tárepinen jaratıp berilgen imkaniyat hám jeńilliklerden únemli paydalanıw zárúr ekenligi atap ótildi.
Óz brendine tiykar salıp, elimizdiń abırayın dúnyaǵa jayıp atırǵan isbilermenler bárqulla qollap-quwatlanatuǵını aytıldı. Olar qosımsha qun jaratıp, mıńlaǵan adamlardı turaqlı dáramatqa iye etpekte.
– Isbilermendi qollap-quwatlamastan jańa Ózbekstandı qurıp bolmaydı. Eger sizler tınımsız izlenip, birlessek, Samarqandta kámbaǵal degen qatlam qalmaydı. Hárekette bolıp, Ózbekstannıń atın dúnyaǵa tanıtıwday imkaniyatqa iyesiz, – dedi Prezident.
Mámleketimiz basshısı “Urgut” erkin ekonomikalıq zonasında usınday óndiris kárxanaların kóbeytiw arqalı qosımsha qun jaratıw hám jańa jumıs orınların ashıwdıń áhmiyetli ekenligin atap ótip, juwapkerlerge tapsırmalar berdi.

Bul jerde Prezident investiciyalıq joybarlar, Samarqand wálayatındaǵı jetekshi sanaat kárxanalarında islep shıǵarılıp atırǵan ónimler kórgizbesi menen tanıstı.
Prezentaciyada densawlıqtı saqlaw, taw-kán sanaatı, qurılıs materialların islep shıǵarıw, texnopark, pilleshilik hám metallurgiya baǵdarlarındaǵı bir qatar joybarlar haqqında maǵlıwmat berildi.
Samarqand qalasında Túrkiyanıń abıraylı kompaniyaları menen birgelikte mámleketlik-jeke menshik sheriklik tiykarında kóp tarmaqlı emlewxana shólkemlestiriw joybarı ámelge asırıladı. Bul joybar sheńberinde 1 mıń jumıs ornı jaratıladı.

Bulunǵur rayonında bolsa Qıtay kompaniyası menen medicinalıq preparatlar islep shıǵarıwdı jolǵa qoyıw rejelestirilgen. Bul joybar sheńberinde de 1 mıń adamnıń bántligi támiyinlenedi.
Sonday-aq, Qıtay kompaniyalarınıń Urgut rayonında jipek talshıǵı hám gezleme islep shıǵarıw, Nurabad rayonında texnopark arnawlı sanaat zonasın shólkemlestiriw, Samarqand qalasında polattı eritiwde paydalanılatuǵın ximiyalıq eritpeler tayarlaw, Pastdarǵom rayonında kóshpeli imaratlar jasaw sıyaqlı joybarları tanıstırıldı.
Joybarlardı óz waqtında sapalı hám jedel ámelge asırıw boyınsha juwapkerlerge tiyisli tapsırmalar berildi.
Bunnan soń xalıq deputatları Samarqand wálayatlıq Keńesiniń gezeksiz sessiyası ótkerildi.
Sessiyada Ózbekstan Respublikası Prezidenti Shavkat Mirziyoev shıǵıp sóylep, bárinen burın, wálayat jámieytshiligi menen kórisip turǵanınan quwanıshlı ekenin atap ótti. Wálayatta erisilgen jetiskenlikler hám ele iske qosılmaǵan imkaniyatlarǵa toqtap ótti.
– Ózinde kóp mıń jıllıq tariyx hám qádiriyatlardı jámlegen, zamanagóy arxitekturalıq dástúrler tiykarında kúnnen-kúnge shıray ashıp baratırǵan bul ullı jer dúnya civilizaciyasında óz ornın barǵan sayın bekkemlep barmaqta, – dedi Prezidentimiz.
Atap aytqanda, “Ullı jipek jolı” xalıqaralıq turizm orayınıń qurılǵanı, 40 tan aslam muqaddes zıyarat orınlarınıń abat etilgeni, “Samarqand” xalıqaralıq aeroportınıń jańadan qurılǵanı, onlaǵan xalıqaralıq brend miymanxanalardıń jumıs baslaǵanı wálayattıń turizm potencialın jańa basqıshqa alıp shıqtı.
Samarqand sońǵı jıllarda siyasiy, ekonomikalıq, turizm hám biznes orayına, kóplegen iri xalıqaralıq ilajlar, forum hám ánjumanlar ushın sóylesiw maydanına aylandı.
Usı jıldıń ózinde bul jerde 40 tan aslam abıraylı xalıqaralıq ánjuman shólkemlestirilgeni, ásirese, jaqında YuNESKO Bas konferenciyasınıń 43-sessiyası ótkerilgeni shınında da úlken waqıya boldı.
Ulıwma, turizm hám oǵan uqsas tarawlarǵa 1 milliard dollar investiciya kirgizilgeni sebepli wálayatqa turistler aǵımı 2016-jılǵa salıstırǵanda 7 esege ósti, turizm xızmetleriniń eksportı 600 million dollarǵa jetti.
Búgin wálayat tek ǵana turizmdegi emes, al sanaat, awıl xojalıǵı hám xızmet kórsetiwdegi úlken potencialı menen investor hám isbilermenler ushın haqıyqıy tartımlı orınǵa aylanıp barmaqta.
Ótken segiz jılda wálayatqa 12 milliard dollar investiciya kirgizildi, 600 mıń turaqlı jumıs ornı jaratıldı, isbilermenler 2 esege kóbeydi.
Óndirislik kárxanalardıń sanı 1,5 esege, sanaat kólemi 1,7 esege ósti. Jıllıq aylanısı 100 milliard sumnan asqan kárxanalardıń sanı 81 ge jetti. 55 mámleketten sırt el investorları jumıs basladı, sırt el qatnasıwındaǵı kárxanalardıń sanı 700 ge shamalastı.
Xızmetler jılına ortasha 15 procentten ósip atır, bıyıl servis kólemi 75 trillion sumǵa jetedi.

Sonday-aq, 2024-jıl hám usı jıldıń 10 ayında 15 million kvadrat metrlik turaq jay hám kommerciyalıq obektler qurıldı. Samarqandlı qurılısshılar respublika boyınsha jılına 4,5 million kvadrat metrlik imarat-obektler qurmaqta.
Wálayattıń jalpı aymaqlıq ónimi 2016-jılı 23 trillion sumdı quraǵan bolsa, bıyıl 120 trillion sumǵa jetiwi kútilmekte.
Adamlar wálayatta ámelge asırılǵan jumıslar esabınan shańaraǵında úlken unamlı ózgerisler bolǵanın aytpaqta.
Máselen, ótken dáwirde 2 trillion sumlıq 3 mıń 200 kilometr ishimlik suwı hám kanalizaciya tarmaqları qurıldı.
– Bir sóz benen aytqanda, Samarqandtı xalıq hám isbilermenler ushın da, turistler hám investorlar ushın da tartımlı aymaqqa aylandıra aldıq, – dedi Prezidentimiz.
Respublika rayonları ishinde xalqı eń kóp Urgutte 600 mıńnan aslam adam jasap atır.
– Urgut rayonı uzaq jıllardan berli wálayat awıl xojalıǵında jetekshi. Qır hám taslaq jerde “Urgut” erkin ekonomikalıq zonasın shólkemlestirgenimiz, 860 million dollarlıq 74 joybardıń iske qosılǵanı nátiyjesinde Urgut sanaatlasqan aymaqqa aylandı, – dedi mámleketimiz basshısı.
Sanaattıń rawajlanıwı sawda hám serviske de úlken túrtki berdi. Házir Urgut wálayat sanaatında úshinshi, xızmet kórsetiwde bolsa tórtinshi orında.

Búgin Urgutte jáne bir tariyxıy waqıya – 55 kilometr temir jol liniyası iske qosıldı. Bul tarmaqtı elektrlestiriw jumısları kelesi jılı tolıq juwmaqlanadı. Bul, bárinen burın, xalıqqa jáne de qolaylı sharayat jaratıw menen birge sanaat, awıl xojalıǵı hám serviste jańa imkaniyatlar esigin ashıp beredi.
Aymaqtaǵı xalıq turaq jay, kanalizaciya, ishimlik suwı, mektep, baqsha, emlewxana, biznes infrastrukturası menen baylanıslı máselelerdiń sheshimin uzaq waqıttan berli kútip atırǵanı kórsetip ótildi. Sonıń ushın Prezidentimiz Urgut orayına “Jańa Ózbekstan” kórinisin alıp kirip, elimizdegi eń zamanagóy hám kórkem qalalardan birine aylandırıw boyınsha ayrıqsha qararǵa qol qoydı.
Rayonnıń Tómengi Kamangaran máhállesindegi “Jańa Ózbekstan” massivine tutas aymaqtan 90 gektar qosımsha jer ajıratılıp, zamanagóy urbanizaciya tiykarında 100 mıń xalıqqa mólsherlengen ekoqala qurılatuǵını járiyalandı.

Jańa qalada jol, suw, kanalizaciya, elektr, mektep, baqsha, emlewxana hám basqa da infrastruktura obektlerin qurıw, isbilermenlik joybarları ushın 50 million dollar ajıratıladı.
Jańa qalanıń 3 gektar maydanında rayonnıń 35 shólkemi ushın birden-bir hákimshilik oray qurıp beriledi. Olardıń bosap qalǵan imaratları bolsa biznes ushın jeke menshik sektorǵa usınıs etiledi.
Jáne bir jańalıq – Aqdárya, Payariq, Pastdarǵom, Taylaq hám Samarqand rayonlarındaǵı 17,5 mıń gektar aymaq Samarqand qalasına qosıp beriledi. Sonıń esabınan Samarqand qalasınıń xalqı 604 mıńnan 882 mıńǵa artadı.

Sonlıqtan, xalqı hám dáramatı kúnnen-kúnge ósip baratırǵan Samarqand qalasında zamanagóy turaq jaylarǵa bolǵan talaptı támiyinlew ushın 3 iri massiv tańlap alındı. Sonıń ishinde, “Shirin” massivinde 180 mıń, “Temir jol artı” aymaǵında 100 mıń, “Qarasuw-2” massivinde 30 mıń xalıq ushın 700 den aslam zamanagóy kóp qabatlı turaq jaylar qurıladı.
Bul jerlerde mektep, baqsha, joqarı oqıw ornı hám emlewxana, zamanagóy biznes hám sawda orayı, miymanxana hám restoran, kewilashar orınlar da qurıladı. Ispaniya investorları menen jeke menshik sheriklik tiykarında bul 3 massivtiń kanalizaciya sisteması jańalanadı.
Qalada júk transportı háreketin azaytıw maqsetinde Aqdárya, Taylaq hám Samarqand rayonınan ótetuǵın magistral jol boyında 4 logistika orayı qurıladı.
Mámleketimiz basshısı Urgut mısalında imkaniyatlardı tallap, ministrler hám hákimler aldına kelesi jıl ushın anıq wazıypalardı qoydı.
Sessiyada shólkemlestiriw máselesi de kórip shıǵıldı.
– Biz elimizde insan qádirin ulıǵlaw, ekonomikanı turaqlı ósiriw arqalı xalıqtıń abadanlıǵın arttırıw boyınsha úlken shekler hám rejelerdi alıp atırmız. Bul jumıslardı shólkemlestiriw ushın wálayatqa zamanagóy pikirleytuǵın, mashqalalardı sistemalı tallap, innovaciyalıq sheshim bere alatuǵın potenciallı basshı kerek, – dedi mámleketimiz basshısı.
Prezidentimiz Samarqand wálayatı hákimi lawazımına hákim wazıypasın atqarıp kiyatırǵan Adiz Boboevtıń kandidaturasın usınıs etti.

Wálayat belsendileri, deputatlardıń talaban haqqındaǵı pikirleri tıńlanǵannan soń, wálayat hákimin tayınlaw máselesi dawısqa qoyıldı. Dawıs beriw nátiyjelerine bola, Adiz Boboev wálayat hákimi etip tastıyıqlandı.
Prezidentimiz jańa hákimge ol jumıs ornın jaratıwı, kámbaǵallıqtı qısqartıw, investiciya hám eksporttı kóbeytiw, ózine túser bahanı azaytıw hám energiyanı únemlewdi arttırıw boyınsha Samarqandtı úlgili aymaqqa aylandırıwı shárt ekenligin kórsetip ótti.
Májilis juwmaǵında mámleketimiz basshısı juwapkerlerdiń esabatların hám rejelerin tıńladı.
Prezident Shavkat Mirziyoev wálayatqa saparı dawamında Sanlı densawlıqtı saqlaw orayı hám Respublikalıq qánigelestirilgen kardiologiya ilimiy-ámeliy medicina orayınıń Samarqand filiallarınıń jumısı menen tanıstı.
Sońǵı bir jılda mámleketimizde medicinanı sanlastırıw jumısları pútkilley jańa basqıshqa kóterildi. Bul jumıslardı jolǵa qoyıw maqsetinde Densawlıqtı saqlaw ministrligi sistemasında Sanlı densawlıqtı saqlaw orayı ashıldı.

Bul oraydıń Samarqandtaǵı filialında alıp barılıp atırǵan jumıslar mámleketimiz basshısına tanıstırıldı. Wálayattaǵı medicina mákemelerinde sanlastırıw jumıslarınıń barısı, kesellikler, nawqaslar hám dári quralları haqqındaǵı maǵlıwmatlardı jıynaw jáne olardı qayta islew ushın qollanılıp atırǵan baǵdarlamalıq sheshimler hám jasalma intellekt texnologiyaları, bulardıń barlıǵı ámelde qanday nátiyjeler berip atırǵanı haqqında tolıq maǵlıwmat berildi.
Sonıń ishinde, tarawda DMED birden-bir elektron málimleme platforması iske qosılıp, oǵan 36 millionnan aslam xalıqtıń medicinalıq maǵlıwmatları kirgizildi. Tez medicinalıq járdem xızmetinde elektron basqarıw jolǵa qoyılıp, shaqırıqlarǵa jetip barıw waqtı qısqarmaqta.

Sonday-aq, “Elektron recept” sistemasınıń jumısı jolǵa qoyılıwı nátiyjesinde artıqsha dári jazıw jaǵdayları 40 procentke azaydı, dári-dármaqlardıń aylanısı ashıq-aydın boldı.
Elimiz boylap mámleketlik medicina mákemeleri zamanagóy málimleme-kommunikaciya úskeneleri menen támiyinlendi, birden-bir sanlı infrastruktura qáliplestirildi. Úsh mıńnan aslam medicina mákemesi lokal tarmaq penen támiyinlendi. Mıńlaǵan jańa kompyuterler satıp alınıp, texnikalıq baza jańalandı.

Prezidentimiz sanlastırıw arqalı densawlıqtı saqlawǵa baylanıslı barlıq analitikalıq maǵlıwmatlarǵa iye bolıw mámleket ushın áhmiyetli ekenin, bul – medicinanı rawajlandırıwdıń tiykarǵı baǵdarların belgilew, tarawda qarjı hám resurslardı durıs bólistiriw, dári-dármaq aylanısın tártipke salıw hám korrupciya jaǵdaylarına shek qoyıwdıń áhmiyetli quralı ekenin atap ótti. Juwapkerlerge bul baǵdardaǵı jumıslardı sistemalı dawam ettiriw boyınsha kórsetpeler berdi.
– Nawqaslar aǵımın, kesellikler strukturasın, emlewdiń sapasın tereń tallap barsaq, biz sistemanıń nátiyjesin jáne de arttıra alamız, – dedi Prezidentimiz.

Dári-dármaq quralların beriwdi ashıq-aydın hám sistemalı etiw, sonday-aq, licenziyalaw processlerin ápiwayılastırıw máseleleri de kórip shıǵıldı.
Elimizde júrek-qan tamır keselliklerin erte anıqlaw hám joqarı texnologiyalı medicinalıq xızmetlerdi keńeytiwge ayrıqsha itibar qaratılmaqta. Barlıq aymaqlarda bolǵanı sıyaqlı Kardiologiya ilimiy-ámeliy medicina orayınıń Samarqand filialı da túp-tiykarınan jańalanıp, zamanagóy kóriniske iye boldı.
Mámleketimiz basshısı bul jerdegi sharayatlar menen tanıstı.

Oraydı rawajlandırıw ushın jámi 52 milliard sum qaratılıp, keń kólemli rekonstrukciya jumısları ámelge asırıldı. Búgingi kúnde oray 100 orınlıq emlew ornına aylanǵan bolıp, 262 túrdegi medicinalıq úskeneler menen támiyinlengen.
Xızmetlerdiń qamtıp alınıwın keńeytiw maqsetinde mobil diagnostika sisteması jolǵa qoyılıp, jeti mıńǵa shamalas nawqasqa koronarografiya ámeliyatı ótkerildi. Joybar sheńberinde reanimaciya bólimi, situaciyalıq oray hám kútiw zalı da zamanagóy usılda qurıldı.

Orayda Samarqand mámleketlik medicina universiteti menen birgelikte kadrlar tayarlawǵa da ayrıqsha itibar qaratılmaqta. Kardioxirurgiya baǵdarında klinikalıq ordinatura jumısı jolǵa qoyılıp, jergilikli qánigelerdiń mamanlıǵı arttırılmaqta.
Jańa imkaniyatlar sebepli joqarı texnologiyalı medicinalıq xızmetler kólemi sezilerli keńeydi. Atap aytqanda, júrek-qan tamır operaciyalarınıń sanı jıl dawamında 383 ten 590 ǵa shekem arttı.
Mámleketimiz basshısına “Infarkt hám insultqa qarsı gúresiw” milliy baǵdarlamasınıń prezentaciyası dawamında júrek-qan tamır hám cerebrovaskulyar kesellikler boyınsha statistika, 5 jıllıq keselleniw dinamikası, Evropa standartlarına sáykes milliy baǵdarlamalar jáne tájiriybe-sınaq joybarınıń nátiyjeleri haqqında málimleme berildi.

Bul keselliklerdi erte anıqlaw, aldın alıw hám emlew boyınsha islep shıǵılǵan nawqaslardı baǵdarlaw (marshrutizaciya) sisteması tanıstırıldı.
Prezidentimiz bunday oraylar medicinalıq xızmet sapasın hám xalıqtıń salamatlıǵın jaqsılawda áhmiyetli orın iyeleytuǵının, Samarqandta jaratılǵan tájiriybeni basqa aymaqlarda da ǵalaba en jaydırıw zárúrligin atap ótti.
Sonıń menen mámleketimiz basshısınıń Samarqand wálayatına saparı juwmaqlandı.