Qurılıs hám TJKX

Keyingi jıllarda mámleketimizde turar -jaylar, social-xojalıq obektler qurılısın rawajlandırıw, injenerlik-kommunikaciya hám jol-transport infrastrukturaların jańalaw maqsetinde alıp barılıp atırǵan jaratıwshılıq jumısları nátiyjesinde qalalar hám awıl elatlı punktleriniń zamanagóy arxitektura túsi tupten ózgerip atır. Qurılısshılıq tarawına tiyisli barlıq ilajlar Qalaqurılısı kodeksi hám qalaqurılısı norma hám qaǵıydaları tiykarında sistemalı alıp barılmaqta.

Ózbekstan Respublikası Prezidentiniń 2023 jıl 11 sentyabrdegi "Qalaqurılısı iskerligi salasında məmleket basqarıwı sistemasın jəne de jetilistiriw həm de 2023 - 2027 jıllarda elatlı punktleriniń qalaqurılısı hújjetlerin islep shıǵıw baǵdarlamasın tastıyıqlaw ilajları tuwralı" PQ-299 -san qararı qol qoyıldı.

2024 jıl 24 dekabrde Ózbekstan Respublikası Ministrler Kabinetiniń “Tashkent qalasınıń 2045 jılǵa shekem bolǵan dəwir arnalǵan bas rejesin tastıyıqlaw tuwralı” 880-san qararı qabıllandı.

Mámleketimizde xalıqtı sapalı ishimlik suw menen támiyinlew, suw hám kanalizaciya tarmaqların qurıw hám de rekonstruktsiya qılıw boyınsha sistemalı jumıslar ámelge asırılıp atır.

Atap aytqanda, ishimlik suw támiynatı hám aqaba suw obektlerin mámleket tárepinen tártipke salıw, basqarıw hám ekspluataciya qılıw sistemasın jetilistiriw maqsetinde aymaqlıq suw támiynatı kárxanaların birlestirgen halda “Ózsuvtaminot” akcionerlik jámieti dúzildi.

“Abat awıl” hám “ Abat mákan” baǵdarlamaları sheńberinde ishimlik suw támiynatı, kanalizaciya sistemaların modernizaciyalaw ushın respublika byudjeti, mámleket maqsetli fondlar, jergilikli byudjetler hámde xalıq aralıq finans institutları esabınan jetkiliklishe aqshalar ajıratıp kelinip atır.

Milliy statistika komitetiniń maǵlıwmatlarına bola, 2025-jıldıń yanvar-dekabr aylarında Ózbekstan Respublikasında ámelge asırılǵan qurılıs jumıslarınıń kólemi 313 trillion sumnan aslamdı qurap, 2024-jıldıń sáykes dáwirine salıstırǵanda 14 procentten aslamǵa ósken.

Kórsetilgen dáwirde Ózbekstan Respublikasında qurılıs jumısları ekonomikalıq jumıs túrleri boyınsha tómendegishe bólistirilgen:

- imarat hám obektler qurılısınıń úlesi 69% ten artıp, ósiw páti 2024-jıldıń sáykes dáwirine salıstırǵanda 7% ten zıyatqa kóbeydi.

- puqaralıq maqsetindegi obektler qurılısınıń úlesi 20 procentten joqarı dárejede belgilenip, 2024-jıldıń sáykes dáwirine salıstırǵanda 31 procentten artqan.

- qánigelestirilgen qurılıs jumıslarınıń úlesi 9 procentten artıp, 2024-jıldıń sáykes dáwirine salıstırǵanda 37 procentten zıyat.