Prezident Shavkat Mirziyoevtiń Ózbekstan Respublikası mámleketlik ǵárezsizliginiń otız bes jıllıǵına baǵıshlanǵan saltanatlı máresimdegi shıǵıp sóylegen sózi

Assalawma áleykum, qádirli watanlaslar!

Húrmetli miymanlar!

Búgin muqaddes Watanımız ǵárezsizliginiń qutlı otız bes jıllıq bayramın úlken maqtanısh hám saltanat penen belgilep atırmız.

Áziz xalqımız, sonıń ishinde, húrmetli nuranıylarımız, kúsh-ǵayratlı jaslarımız, áziz hayal-qızlarımızdı, elimizdegi barlıq millet hám xalıq wákillerin, sırt eldegi watanlaslarımızdı usı bayram menen shın júrekten qutlıqlayman.

Eń ullı bayramımızdıń Jańa Tashkentte ótkerilip atırǵanı bayram keypiyatın jáne de arttırmaqta.

Keleshekte ilim, bilimlendiriw hám mádeniyat orayı bolatuǵın bul aymaqta kúni keshe Jańa Ózbekstan universiteti, Nizamiy Ganjawiy atındaǵı Ózbekstan Milliy pedagogika universiteti, Ózbekstan milliy kitapxanasınıń sawlatlı imaratların iske túsirdik.

Búgin sizlerdiń qatnasıwıńızda ashılatuǵın fontan dúnyadaǵı eń biyik muzıkalı fontan sıpatında Ginnestiń rekordlar kitabınan orın alǵanı da bayram keypiyatına jáne de kóterińki ruwx baǵıshlaydı.

Bir neshe júz jıllıq arzıw-niyetler ámelge asıp atırǵan bul biytákirar mákanda pútkil xalqımız benen ele kóplegen quwanıshlı hám tariyxıy waqıyalardıń gúwası bolamız.

Jańa Tashkent paytaxtımızdıń kórkine kórik qosıp, biz qurıp atırǵan Jańa Ózbekstannıń kúsh-qúdiretin kórsetetuǵın haqıyqıy rawajlanıw orayına aylanatuǵınına isenemen!

Qádirli doslar!

Biz 1991-jılı xalqımızdıń erk-ıqrarı hám isenimi menen óz mámleketlik ǵárezsizligimizdi qolǵa kirgizdik. Negizinde ullı ǵárezsizligimizdiń tamırları úsh mıń jıldan aslam bolǵan mámleketshilik dástúrlerimiz hám áyyemgi civilizaciyamızdıń tariyxına barıp taqaladı.

Birinshi hám Ekinshi Renessans dáwirinde Muhammed Xorezmiy, Ahmed Ferǵaniy, Ábiw Rayxan Beruniy, Ábiw Áliy ibn Sina, Mırza Ulıǵbek, Mir Áliysher Nawayı sıyaqlı ullı oyshıllarımız insaniyattıń oy-pikir ǵáziynesin bayıtqan.

Al, Sahıpqıran Ámir Temur babamız qurǵan mámleket ádillik hám dóretiwshilik tımsalı sıpatında tariyx betlerinen múnásip orın alǵan.

Watannıń azatlıǵı hám milliy ǵárezsizlik jolında janın pidá etken Behbudiy, Munavvarqori, Fitrat, Qadiriy, Sholpan sıyaqlı jadid babalarımızdıń erkinlik haqqındaǵı arzıw-niyetleri búgin Jańa Ózbekstanda tolıq ámelge aspaqta.

Ǵárezsizlik, bárinen burın, bizge dańqımızdı, muqaddes dinimizdi, ana tilimizdi, umıtılıp atırǵan milliy qádiriyatlarımızdı qaytarıp berdi.

Ǵárezsizlik sebepli biz ózligimizdi ańladıq, atı hámiyshe húrmette bolǵan ata-babalarımızdıń múnásip miyrasxorları ekenimizdi pútkil dúnyaǵa kórsettik.

Usı tolqınlandırıwshı minutlarda búgingi erkin turmıs ushın janın pidá etken ullı ata-babalarımız, jadidler esteligine bas iyemiz.

Mine, usı tariyxıy sánede ótken 35 jıl dawamında ǵárezsizligimizdi bekkemlewge múnásip úles qosqan barlıq marhum watanlaslarımızdıń pidákerlik miyneti hám mártligin jáne bir márte tán alıwdı orınlı, dep bilemiz.

Birinshi Prezidentimiz, belgili mámleketlik hám siyasiy ǵayratker Islam Ábdiǵanievich Kárimovtıń jarqın esteligin húrmet penen eske alamız.

Húrmetli bayram qatnasıwshıları!

Ǵárezsizliktiń ullı áhmiyeti, bárinen burın, insan qádiri hám erkin turmısında kórinedi. Sonlıqtan, biz reformalardı baslaǵan birinshi kúnlerden-aq xalıqtıń qálbine qulaq saldıq, xalıqtıń dártine dárman bolıwdı maqset ettik. «Insan qádiri ushın!» degen ideyanı mámleketlik siyasattıń orayına alıp shıqtıq. Birinshi gezekte «paxta qullıǵı», «májbúriy miynet hám balalar miyneti», «konvertaciya sheklewi», «propiska» sıyaqlı adamlardı jıllar dawamında qıynap kelgen mashqalalardı saplastırdıq.

Eń tiykarǵısı, puqaralarımızdıń júregindegi qorqınısh hám qáweterdiń ornın isenim hám qáterjamlıq iyeledi. Hár bir insan erkin hám abadan jasaytuǵın jámiyet qurıw ushın keyingi on jılda tınımsız izlendik, qattı miynet ettik.

Úlken siyasiy erk-ıqrar kórsetip, Ózbekstandı dúnyaǵa keńnen ashtıq. Atap aytqanda, shegara mashqalaları sheshildi, qońsılarımız benen doslıq hám birge islesiw bekkemlendi. Valyuta, salıq, bajıxana hám investiciya siyasatında túpkilikli ózgerisler ámelge asırıldı. Nátiyjede «Ekonomikalıq erkinlik indeksi»ndegi ornımızdı 80 tekshe jaqsılap, «ekonomikası ortasha erkin» mámleketler qatarınan orın aldıq.

Burın ekonomikamızǵa jılına 2-3 milliard dollarlıq sırt el investiciyası alıp kelingen bolsa, házirgi waqıtta 40-50 milliard dollarlıq sırt el investiciyası tartılmaqta. Elimizge investiciyalar menen birge aldınǵı texnologiyalar, zamanagóy bilim hám jańa ekonomikalıq imkaniyatlar kirip kelmekte.

Biz úsh jıl aldın 2030-jılı jalpı ishki ónim kólemin 160 milliard dollarǵa jetkeriwdi rejelestirgen edik. Globallıq logistikadaǵı úzilisler, dúnyadaǵı tınısh emes jaǵdayǵa qaramastan, bul wazıypanı usı jıldıń ózinde artıǵı menen ámelge asıramız hám dáramatı ortashadan joqarı bolǵan mámleketler qatarına kiremiz.

Itibarlı tárepi – biz bunday joqarı nátiyjelerge xalqımızdıń pidákerlik miyneti, intellektuallıq potencialı jáne millet hám mámlekettiń awızbirshiligi sebepli erispektemiz. Unamlı ózgerislerdi hár bir insan, hár bir shańaraq óz turmısında tereń sezbekte, desem, pikirime qosılasız, álbette.

Jańa dáwirde zamanagóy turaq jayǵa iye bolǵan 650 mıńnan aslam shańaraqtıń quwanıshın sóz benen táriyplep bola ma?

Mıńlaǵan máhállelerimizge Jańa Ózbekstan kelbeti kirip barmaqta.

Kámbaǵallıq máselesin ashıq tán alıp, onı keskin qısqartıw boyınsha Jańa Ózbekstan tájiriybesin jarattıq. Járdemge mútáj shańaraqlardıń dáramatı, kásibi, densawlıǵı, perzentleriniń bilim alıwı hám jasaw sharayatın jaqsılaw boyınsha «máhálle kesiminde» islew sistemasın jolǵa qoydıq.

Basqıshpa-basqısh háreketlerimiz sebepli búgingi kúnde kámbaǵallıq dárejesin 2017-jıldaǵı 35 procentten 4 procentke túsiriwge eristik. Bul sanlar tiykarında shańaraǵına bereket kirip, turmısınıń sapası jaqsılanǵan 10 million insannıń quwanıshı hám shúkirshilik sezimleri jámlengen.

Húrmetli watanlaslar!

Dúnya jámiyetshiliginde múnásip orın iyelewimiz ushın bizge bilimli, keleshek kásiplerin puqta iyelegen, erkin pikirge iye bolǵan jańa áwlad qánigeleri kerek. Sonlıqtan, bilimlendiriwge sapa hám mazmun alıp kirip atırmız. Muǵallimniń abıray-mártebesin tiklep, dáramatın arttırıp atırmız.

Ótken on jılda, xalqımız 8 millionǵa kóbeygen sharayatta da baqsha qamtıwın 78 procentke jetkerdik. Mekteplerde 1,5 million qosımsha oqıwshı ornı jaratıldı. Prezident, dóretiwshilik hám qánigelesken mekteplerdiń shólkemlestirilgeni perzentlerimizge jetekshi sırt el bilimlendiriw orınlarınan kem bolmaǵan dárejede tereń bilim alıw ushın keń imkaniyatlar esigin ashtı.

Jaslarǵa shet tillerin hám kásip-óner úyreniwi ushın múnásip sharayatlar jarattıq.

Joqarı oqıw orınlarında oqıw ushın qolaylı sharayatlardı keńeytkenimizdiń esabınan házirgi kúnde studentlerdiń sanı 1 million 600 mıńǵa jetti. Quwanıshlı tárepi, jaslarda bilim alıwǵa qızıǵıwshılıq kúsheydi. Ata-analar ushın perzentiniń joqarı maǵlıwmatlı bolıwı tek árman emes, al erisiw múmkin bolǵan maqsetke aylandı.

Ásirese, studentlerdiń yarımınan kóbiregin hayal-qızlar qurap atırǵanı – Úshinshi Renessanstıń ózine tán kelbeti, desek, durıs boladı. Sebebi, bilimli qızlar – bilimli shańaraq, bilimli áwlad hám aǵartıwshı jámiyet degeni.

Biz bilimlendiriw menen bir qatarda ilim, zamanagóy texnologiya hám innovaciyalardı da rawajlanıwımızdıń sheshiwshi faktorı, dep bilemiz.

Sonıń menen birge, IT, jasalma intellekt, kreativ ekonomika sıyaqlı baǵdarlardıń rawajlanıwına jańa ruwx berip, oǵada úlken háreketti baslap jiberdik. Bul arqalı 10 million jaslarımızdı sanlı industriya hám keleshek kásiplerine alıp kelemiz.

Ǵárezsizlik bayramımız aldınan qıtaylı sheriklerimiz benen «Samarqand – 2028» jasalma joldasın kosmosqa ushırǵanımız bizge ayrıqsha maqtanısh baǵıshlaydı.

Meniń niyetim: Ózbekstan texnologiya tarawlarında dúnyaǵa aldınǵı baslamalardı usınıs etetuǵın orayǵa aylanıwı zárúr.

Ózbek tili – sanlı dúnyada ilim hám texnologiya jaratılatuǵın til bolıwı kerek.

Áziz watanlaslar!

Insan qádiri haqqında sóz etkende, xalqımızdıń densawlıǵı máselesine ayrıqsha itibar qaratıwımız tábiyiy. Sońǵı jılları bul tarawǵa ajıratılıp atırǵan qarjını 8 eseden aslam arttırdıq. Eń áhmiyetlisi, sapalı medicinalıq xızmetten paydalanıw imkaniyatı tek ǵana orayda emes, al aymaqlarda da jaratıldı.

Ótken dáwirde elimizde 652 jańa medicinalıq mákemeniń qurılǵanı, jeke menshik sektorǵa keńnen imkaniyat berilgeni sebepli medicinalıq xızmetlerdiń kólemi 3 esege arttı. Joqarı mamanlıqtaǵı shıpakerlerdi tayarlawdı jolǵa qoyıp, olarǵa sharayat jaratqanımız óziniń nátiyjesin berip atır. Burın sırt elde ámelge asırılǵan 100 den aslam quramalı diagnostika hám emlew usılları búgin elimizde de tolıq orınlanbaqta.

Ulıwma, xalıqtıń ortasha ómir súriw dawamlılıǵı 1991-jıldaǵı 66,4 jastan 2025-jılı 75,4 jasqa jetkeni, nárestelerdiń hám analardıń ólimi kórsetkishi 4 esege azayǵanı tarawdaǵı reformalarımızdıń eń áhmiyetli nátiyjesi bolıp esaplanadı.

Qádirli doslar!

Janajan Watanımız ázelden ullı dóretiwshiler, áziz áwliyeler, ullı oyshıllar jeri bolıp kelgen. Biz mine, usınday biybaha miyrasqa múnásip túrde Islam civilizaciyası orayı, Imam Buxariy, Burhaniddin Marǵinoniy estelik kompleksleri sıyaqlı biytákirar ilimiy-aǵartıwshılıq dárgayların qurdıq.

Bul sawlatlı hám teberik orınlar búgin tek ǵana elimiz hám islam dúnyası emes, al pútkil dúnya xalqınıń haqılı túrde tán alıwına erispekte. Biz bunday dóretiwshilik jumıslardı jedel dawam ettiremiz.

Húrmetli bayram qatnasıwshıları!

Biziń eń úlken baylıǵımız – erteńgi kúnimizdiń sheshiwshi kúshi bolǵan Jańa Ózbekstan jasları bolıp esaplanadı. Umtılıwshań hám talapshań ul-qızlarımızdı qollap-quwatlaw, olarǵa keń imkaniyatlar ashıw ushın hár jılı 20-25 trillion sum ajıratılmaqta.

Búgingi kúnde Ózbekstandaǵı biznes wákilleriniń 35 procentin jas isbilermenler quramaqta.

Tokio hám Parij Olimpiyada hám Paralimpiyada oyınlarında, dúnya maydanlarında jas sportshılarımız erisken tariyxıy jetiskenlikler xalqımızǵa sheksiz maqtanısh baǵıshladı.

Futbolshılarımız birinshi márte jáhán chempionatında qatnasıp, ózbek sportı tariyxında jańa bet ashtı. Olar baslaǵan jol álbette, dawamlı hám tabıslı bolatuǵınına isenemiz.

Jaqın kúnlerde Samarqandta úlken sport ánjumanı – Jáhán shaxmat olimpiadası baslanadı. Noyabr ayında bolsa belgili grossmeysterimiz Javohir Sindorov jáhán shaxmat tajı ushın gúreske kirisedi.

Bul jarıslarda shaxmatshı ul-qızlarımızǵa úlken tabıslar tileymen!

Xalıqaralıq pán olimpiadalarında, tańlaw hám festivallarda joqarı orınlardı iyelep atırǵan jaslarımızdı – Jańa Ózbekstannıń juldızları, keleshek dóretiwshileri, dep bilemen!

Alǵa qaray umtılıwdan hám turaqlı izleniwden hesh qashan toqtamań, áziz perzentlerim!

Húrmetli watanlaslar!

Búgin biz tariyxtıń jáne de juwapkershilikli hám sheshiwshi dáwirinde turmız. Mámleketimiz rawajlanıwdıń pútkilley jańa dáwirine qádem qoymaqta. Kelesi on jıllıq – biz ushın milliy rawajlanıw dáwiri boladı.

Onı tek ǵana xalqımızdıń aqıl-parasatı, miyneti hám awızbirshiligi arqalı ózimiz quramız. Usı maqsette kelesi jıllarda elimizde insan qádirin jáne de joqarılatatuǵın 7 milliy baǵdarlamanı ámelge asıramız.

Birinshi milliy baǵdarlama bilim hám mamanlıqtı keleshektegi rawajlanıwımızdıń tiykarǵı kapitalına aylandırıwdan ibarat boladı.

Balalardıń 6 jasar tayarlaw toparlarına qamtıp alınıwın qısqa múddette 100 procentke jetkeremiz. Jeke menshik baqsha shólkemlestiriw boyınsha bar jeńillikler saqlap qalınadı.

Barlıq mektepler xalıqaralıq bahalaw baǵdarlamaları menen tolıq qamtıp alınadı.

Elimizdegi texnikumlarda xalıqaralıq bilimlendiriw standartların engizemiz. Olarda jaslarımızdı joqarı dáramatlı kásiplerge oqıtıwdı jolǵa qoyıp, qamtıp alıwdı 1 millionǵa jetkeremiz. Bir sóz benen aytqanda, Jańa Ózbekstanda kásip iyelemegen birde-bir jigit-qız qalmaydı.

Biz kelesi jıllarda keminde 10 universitetimizdi TOP mıńlıqqa kirgiziwdi úlken maqset etip belgilep atırmız.

Ekinshi milliy baǵdarlama xalqımızdıń salamat bolıwı hám uzaq ómir súriwin támiyinlewge xızmet etedi.

Usı maqsette xalıqtıń salamatlıǵına baylanıslı mámleketlik qárejetlerdi kelesi bes jılda jalpı ishki ónimge salıstırǵanda 5 procentke jetkeremiz.

Biz medicinada profilaktikanı kúsheytiw arqalı salamatlıqtı saqlaw modeline ótemiz. Mámleketlik medicinalıq qamsızlandırıw mámlekettiń barlıq shańaraqlarına kirip baradı.

Qánigelesken medicinada básekilik ortalıǵın kúsheytiw maqsetinde dúyanıń eń abıraylı keminde 5 klinikasın alıp kelemiz.

Elimizdi zamanagóy medicina, farmacevtika, biotexnologiyalar hám medicinalıq bilimlendiriw rawajlanǵan orayǵa aylandıramız.

Húrmetli ilaj qatnasıwshıları!

Úshinshi milliy baǵdarlama – ekonomikamızdı joqarı texnologiya hám miynet ónimdarlıǵı modeline ótkeriw.

Bul ushın kelesi on jılda 450 milliard dollarlıq sırt el investiciyasın tartamız. Ekonomikada joqarı ósiw pátin saqlap qalǵan halda, 2030-jılǵa shekem jalpı ishki ónimniń kólemi 300 milliard dollarǵa jetkeriledi, sanaatta 2 million joqarı dáramatlı jumıs ornı jaratıladı.

Jaslarımızdıń potencialın tolıq júzege shıǵarıwda startap, venchur hám jasalma intellektti rawajlandırıw tiykarǵı baǵdarǵa aylanadı.

Sonday-aq, kishi biznes – orta bizneske, al orta kárxanalar iri kompaniya hám korporaciyalarǵa aylanıwı ushın bir pútin ekosistemanı jolǵa qoyamız. Solardıń esabınan kelesi on jılda jan basına jalpı ishki ónim kólemi 10 mıń dollarlıq shegaradan artadı.

Áziz doslar!

Globallıq klimat ózgeriwi sharayatında suw hám ekologiya máseleleri jáne de áhmiyetli bolıp barmaqta.

Sol sebepli, tórtinshi milliy baǵdarlama suw hám tábiyatqa múnásibetti túp-tiykarınan ózgertiwge qaratıladı.

Kelesi bes jılda egislik maydanlarında suwdı únemleytuǵın texnologiyalardıń qamtıp alınıwın 100 procentke alıp shıǵamız. Bul – ulıwma milliy shekke aylanadı.

Tábiyatqa múnásibet – xalıqtıń mádeniyatı, mámlekettiń juwapkershiligi hám rawajlanıwdıń sapa kórsetkishi bolıp esaplanadı. Sonlıqtan, mámleketimizde «Jasıl mákan» ulıwma milliy háreketin jańa sapa basqıshına alıp shıǵamız. Mektep, baqsha, emlewxana hám kóp qabatlı turaq jaylardıń átirapındaǵı jasıl aymaqlar jámiyettiń qol qatılmas baylıǵı sıpatında qorǵaladı. Jaqın jıllarda rayon hám qala oraylarında jasıllıq kólemin 30 procentke jetkeremiz.

Qádirli watanlaslar!

Ádillik ornatılǵan jerde ekonomikalıq ósiw de, sociallıq isenim de joqarılaydı.

Bul baǵdarda besinshi milliy baǵdarlama – sud erkinligin kúsheytiw hám nızam ústinligin támiyinlewdi ulıwma qádiriyatqa aylandırıwdan ibarat.

Bul ushın huqıqıy tárbiyanı mektepten baslap anıq sistema tiykarında jolǵa qoyamız. Puqaralardıń hám isbilermenlerdiń nızamlı kepilliklerin kúsheytiw boyınsha reformalarımızdı qatań dawam ettiremiz. Kiberjınayatshılıq, náshebentlik hám adam sawdasınıń aldın alıw boyınsha ilajlardı jáne de kúsheytemiz.

“Jasırın ekonomika,” shólkemlesken jınayatshılıq, hayal-qızlar hám balalardıń huqıqın kemsitiwge qarsı gúresti jańa basqıshqa kóteremiz.

Áziz watanlaslar!

Adamlarımızdıń keypiyatı, shańaraqlardıń abadanlıǵı, jaslardıń arzıw-niyetleri, isbilermenlerdiń intakerligi, bárinen burın, máhállede kórinedi.

Sonlıqtan, altınshı milliy baǵdarlama máhálleni jámiyet rawajlanıwınıń tiykarǵı buyırtpashısına aylandırıwǵa baǵdarlanadı.

Endi mámleketlik baǵdarlamalardı islep shıǵıw boyınsha qatnas pútkilley ózgeredi. Rayon byudjeti, investiciyalıq baǵdarlama hám infrastruktura boyınsha joybarlar máhálleniń buyırtpası tiykarında islep shıǵıladı. Onda puqaralardıń talabı hám mútájligi, máhálleniń abadanlıǵı – eń tiykarǵı norma sıpatında belgilenedi.

Húrmetli bayram qatnasıwshıları!

Jetinshi milliy baǵdarlama – Ózbekstannıń tınıshlıq hám doslıq diyarı, keńpeyil úlke sıpatındaǵı abırayın hár tárepleme joqarılatıwdan ibarat.

Elimizde 130 dan aslam millettiń hám xalıqtıń wákilleri, 16 diniy konfessiyanıń aǵzaları bir shańaraqtıń perzentlerindey tatıw hám awızbirshilikli jasamaqta.

Búgingi tınısh emes zamanda milletleraralıq tatıwlıq hám diniy keńpeyillik xalqımızdıń altın fondı, biybaha baylıǵı bolıp esaplanadı.

Biziń ashıq, pragmatikalıq hám tınıshlıqtı súyiwshi siyasatımız uzaq múddetli rawajlanıwımızdı támiyinlewge qaratılǵan.

Oraylıq Aziyada jaqsı qońsıshılıq, strategiyalıq sheriklik hám doslıq baylanısların keńeytiwde tariyxıy jetiskenliklerge erisildi.

Ǵárezsiz Mámleketlerdiń Doslıq Awqamı, Evropa Awqamı, Amerika, Aziya-Tınısh okeanı regionı hám arab-musılman dúnyası mámleketleri menen qatnasıqlarımız jáne de bekkemlendi. Shıǵıs Evropa, Afrika hám Latın Amerikasında jańa birge islesiw baǵdarları ashıldı.

Mámleketimiz benen diplomatiyalıq qatnasıq ornatqan mámleketlerdiń sanı derlik 170 ke jetti.

Ózbekstandı xalıqaralıq diplomatiyanıń áhmiyetli orayına aylandırıw ushın kóp qırlı, salmaqlı hám teń salmaqlı sırtqı siyasattı dawam ettiremiz. Ekonomikalıq diplomatiya sırtqı siyasatımızdıń tiykarǵı baǵdarlarınan biri bolıp qaladı.

Mámleketimiz 2027-2029-jılları Qosılmaw háreketine birinshi márte basshılıq etedi. Dúnyadaǵı 120 dan aslam mámleketti birlestirgen bul globallıq strukturanıń nátiyjeliligin arttırıwǵa qaratılǵan baslamalardı jedel alǵa qoyamız.

Jaqın qońsımız bolǵan Awǵanstan boyınsha konstruktivlik siyasatımızdı isenimli dawam ettiremiz.

Pursattan paydalanıp, búgingi saltanatımızda qatnasıp atırǵan diplomatiyalıq korpus wákillerine, sırt el ǵalaba xabar qurallarınıń xızmetkerlerine, AQSh, Túrkiya hám Singapurdan kelgen joqarı mártebeli miymanlarımızǵa nátiyjeli birge islesiw ushın ayrıqsha minnetdarshılıq bildiremen.

Áziz hám húrmetli watanlaslarım!

Bir pikirdi isenim menen aytpaqshıman.

Biz búgin keshegiden kúshlimiz. Nesip etse, erteń bunnan da kúshli bolamız.

Otız bes jıllıq ǵárezsiz rawajlanıw jolımız bizge bir haqıyqattı úyretti: xalıq hám mámleket birden-bir maqset jolında birlesip, shın kewilden háreket etse, jeńip bolmaytuǵın shektiń ózi joq.

Bunday ullı qúdiretke iye xalıq hám mámleketti jeńe alatuǵın kúshtiń ózi joq.

Biz bir Watan, bir xalıq bolıp, jańa turmıstı hám ullı keleshegimizdi birgelikte quramız!

Isenimim kámil, márt hám ullı mártebeli xalqımız óz aldına qoyǵan ullı maqsetlerge álbette jetedi.

Watanımızdıń altın dáwirin, jańa ullı tariyxın álbette, bárshemiz birgelikte jaratamız!

Bizge ǵárezsizlik inamın bergen Jaratqanımızǵa sheksiz shúkirlikler bolsın!

Ǵárezsizligimizdiń dóretiwshisi hám haqıyqıy qurıwshısı bolǵan xalqımızǵa dańq bolsın!

Sizlerdi, sizler arqalı pútkil xalqımızdı búgingi ullı bayram – Ózbekstan Respublikası mámleketlik ǵárezsizliginiń otız bes jıllıǵı menen jáne bir márte qutlıqlayman.

Elimiz tınısh, shańaraqlarımız abat hám abadan bolsın!

Jasasın Ózbekstan Respublikası!

Jasasın Ózbekstan xalqı!