Ózbekstan Respublikası Prezidenti Shavkat Mirziyoevtiń Nawrız ulıwmaxalıqlıq bayramına baǵıshlanǵan saltanatlı máresimdegi qutlıqlaw sózi

Assalawma áleykum, qádirli watanlaslar!

Húrmetli miymanlar!

Pútkil dúnya nurǵa, gózzallıqqa tolǵan usı gózzal máwsimde janajan úlkemizge shıǵısqa tán jańa jıl – Nawrız kirip kelmekte.

Búgin misli eki úlken dárya tutaspaqta – Nawrız bayramın múbárek Ramazan hayıtı menen birge belgilep atırmız.

Tábiyattıń oyanıwı hám ruwxıy pákleniwdiń tımsalı bolǵan mine usınday qutlı áyyyamlar menen sizlerdi, kóp milletli pútkil xalqımızdı shın kewlimnen qızǵın qutlıqlayman.

Dúnyanıń alıs hám jaqın mámleketlerinde jumıs islep, bilim alıp atırǵan watanlaslarımızdı da qutlıqlap, olarǵa jaqsı sálem hám tileklerimizdi bildiremen.

Bayram bárshemizge múbárek bolsın!

Nawrız bayramı elimizge tınıshlıq hám baxıt alıp kelsin!

Áziz doslar!

Búgin báhárdi saǵınǵan júreklerimiz jańa kún, jańa ómir shadlıǵı menen jasamaqta.

Aspannan jawın jawıp, dárya hám kóllerimiz suwǵa tolmaqta. Baǵlarımız, dala hám qırlarımız ot-shópler menen qaplanıp, jılımız bereketli bolatuǵınınan derek bermekte.

Qala hám awıllarımız, oypatlıq hám úlkelerimizde seyil-tamashalar baslanbaqta.

Jańalanıw máwsimi bolǵan Nawrız kúnlerinde xalqımızdıń ulıwma milliy awızbirshiligi, dóretiwshilik potencialı jáne de ayqın kórinbekte.

Nawrız qádiriyatlarına sadıq bolıp, milleti, tili, dinine qaramastan, hár bir watanlasımızdı, pútkil elimizdi razı etiw jolındaǵı jumıslarımız jańa basqıshqa kóterilmekte. Bıyılǵı bayramdı “Nawrızdı ulıǵlaw – insandı ulıǵlaw!”, degen shaqırıwshı ideya tiykarında ótkerip atırǵanımız da bunıń jáne bir dálili bolıp esaplanadı.

Biz barlıq aymaqlarımızǵa, awıl hám máhállelerimizge Jańa Ózbekstan nápesin alıp kiriw boyınsha úlken háreket basladıq.

Jańa jumıs orınların jaratıw, kámbaǵallıqtı qısqartıw, sociallıq qorǵawdı kúsheytiw baǵdarında da úlken qádemler qoymaqtamız. Jańadan-jańa zamanagóy kárxanalar, kommunikaciya tarmaqları, ıqsham turaq jaylar, bilimlendiriw, medicina, mádeniyat hám sport obektleri qurılmaqta.

Keleshekte bunday qurılıslardıń kólemin jáne de keńeytemiz.

Usı payızlı tańda miynetkesh diyqan hám fermerlerimizge bárshemiz joqarı húrmet-izzet bildiremiz.

Siz, ázizlerdiń elimiz dasturxanın jáne de mol hám abadan etiwdey iygilikli islerińizde tabıs hám áwmetler tileymiz. Sebebi, sizlerdiń ullı miynetińiz benen xalqımızdıń ırısqı-nesiybesi pútin boladı. Bul baǵdarda mámleketimiz, jámiyetimiz sizlerdi bárqulla qollap-quwatlaydı.

Húrmetli watanlaslar!

Jańa Ózbekstan elimiz jasları ushın joqarı párwazlar, úlken-úlken jeńisler maydanına aylanıp barmaqta. Jaqında jaslarımız benen ushırasıp, oǵan jáne bir márte isenim payda ettim. Hár bir baǵdarda – bilimlendiriw, ilim, mádeniyat hám kórkem óner, sport, IT hám biznes tarawlarında jańa atamalar, jańa qaharmanlar payda bolmaqta. Mine, usınday bilimli, kúsh-ǵayratlı hám izleniwsheń ul-qızlarımız benen bárshemiz haqılı túrde maqtanamız.

Áziz perzentlerim, búgin Úshinshi Renessanstıń dóretiwshileri bolıwday úlken baxıt hám joqarı mártebe sizlerge nesip etpekte. Qanshadan-qansha ata-babalarımız umtılıp jasaǵan bul ullı ármandı álbette, sizler ámelge asıra alasız.

Búgingi tınısh hám paraxat turmıstıń, jaratılǵan úlken imkaniyatlardı, ata-analarıńız, ustaz-tárbiyashılarıńızdıń miynetin qádirlep, tınımsız oqıp-úyrenseńiz, bilim hám sheberligińizdi bárqulla arttırıp barsańız – keleshek álbette siziki.

Bul jolda sizlerge, pútkil Ózbekstan jaslarına jáne qanday sharayat zárúr bolsa, barlıǵın jaratıp beriwge tayarmız.

Watan ushın, millet ushın, xalıq ushın dep jasasańız – Watan hám xalıq ta sizdi qádirlep, basına kóteredi!

Jańa Ózbekstannıń altın áwladı bolıp, onıń jeńis bayraǵın bálent kóteriwden hesh qashan toqtamań, áziz perzentlerim!

Qádirli watanlaslar!

Máhálle degende, kóz aldımızda bárinen burın ana jurtımızdıń gózzal tımsalı kórinedi. Biz Máhálleni rawajlandırıw hám jámiyetti ilgeriletiw jılında jaqsı niyet penen úlken baǵdarlama hám rejelerdi ámelge asırmaqtamız.

Bul jumıslarda shańaraq hám jámiyette tınıshlıq-tatıwlıq, óz-ara miyrim-shápáátti bekkemlew, sociallıq mashqalalardı ornında sheshiw, jaqsılıq hám ádillikti engiziw ushın kópti kórgen ata hám analarımız, “máhálle jetiligi”, belsendi puqaralarımız jaqınnan qatnasadı, dep isenemen.

Pursattan paydalanıp, erteń belgilenetuǵın Máhálle sisteması xızmetkerleri kúni menen jankúyer máhálle baslıqları hám belsendilerin, barlıq watanlaslarımızdı shın júrekten qutlıqlap, olarǵa jańa tabıslar tileymen.

Húrmetli doslar!

Mıń jıllar dawamında xalıqlar arasında ruwxıy kópir bolıp kiyatırǵan Nawrızdıń tınıshlıq, doslıq hám birge islesiw ideyaları búgingi tınısh emes zamanda jáne de ayrıqsha áhmiyetke iye bolmaqta.

Elimizde jasap atırǵan 130 dan aslam millet hám xalıq wákilleri bul bayramdı birgelikte, quwanısh penen belgilemekte. Mine, usınday tatıwlıq hám awızbirshilik Jańa Ózbekstanımızdı birgelikte qurıwdıń eń isenimli kepili bolıp esaplanadı.

Biz jámiyetimizde milletler hám dinleraralıq tatıwlıqtı bunnan bılay da bekkemlew ushın bar kúsh hám imkaniyatlarımızdı jumsaymız. Bul baǵdarda qońsı hám tuwısqan mámleketler menen birge, birden-bir Oraylıq Aziya dawısı bolıp, regionımızdıń tınıshlıq, doslıq hám birge islesiw mákanı sıpatındaǵı abırayın arttırıwǵa tiykarǵı áhmiyet qaratamız.

Pursattan paydalanıp, dógeregimizde qatnasıp atırǵan sırt mámleketlerdiń húrmetli elshilerin, xalıqaralıq shólkemlerdiń wákillerin Xalıqaralıq Nawrız kúni menen qızǵın qutlıqlap, olardıń úlkeleri hám xalıqlarına qızǵın qutlıqlawlarımızdı jollaymız.

Qádirli doslar!

Mine usı gózzal demlerde bársheńizge, pútkil el-xalqımızǵa múrájat etip aytpaqshıman.

Ázizler, qarań, qanday gózzal elimiz, qanday saqawatlı jerimiz, biytákirar tábiyatımız bar!

Bul biybaha baylıqlardı mıń jıllar dawamında qásterlep saqlap kiyatırǵan miynetkesh, aq kewil hám ullı mártebeli xalqımız bar.

Quday bizge inam etken jer-suwımızdı, barlıq imkaniyatlarımızdı qádirlep, olardan aqılǵa uǵras paydalansaq, bir baylıǵımızǵa, álbette, on baylıq qosıladı.

Sonıń ushın ázeliy dástúrlerimizdi dawam ettirip, nál egip, baǵ jaratayıq, úyimizdi, máhállemizdi abat etip, turmısımızdı jáne de gózzal hám abadan eteyik!

Jaqsı qońsıshılıq, tatıwlıq penen, iygilikli hám sawaplı islerimiz benen keńpeyil el, óz miynetimiz benen baxıt hám abıray tabıp atırǵan xalıq ekenimizdi dúnyaǵa kórseteyik!

Ul-qızlarımız zamanagóy bilim, til hám kásiplerdi iyelep, bárkamal áwlad bolıp qatarımızǵa qosılsın!

Birden-bir Watan, birden-bir xalıq bolıp, jańa ómir, jańa tariyx, jańa keleshek jaratayıq!

Áziz hám húrmetli watanlaslarım!

Siz, qádirdanlarımdı, pútkil xalqımızdı Nawrız bayramı menen jáne bir márte shın júrekten qutlıqlayman.

Jańa Ózbekstan Nawrızı – rawajlanıw dáwiri xalqımızǵa rawajlanıw hám abadanlıq baǵıshlasın!

Barlıq pák niyetlerimiz ámelge assın!

Jaratqan Iyemiz janajan Watanımızdı óz panasında saqlasın!

Jańa kún, jańa baxıt bárshemizge múbárek bolsın!