Navoiy viloyatida fuqarolar va yoshlar bilan uchrashuv
2026-09-09 20:00:00 / Yangiliklar

Mazkur tadbir davomida Bilim va malakalarni baholash agentligi faoliyatiga tegishli masalalar bilan murojaat qilgan fuqarolar shaxsan qabul qilindi va ko‘tarilgan har bir masala joyida ko‘rilib, batafsil o‘rganib chiqildi. Shuningdek, tadbirda ishtirok etgan fuqarolarga davlat dasturlari, oliy ta’lim olish, milliy sertifikatlash tizimi, malakali va raqobatbardosh kadrlar tayyorlash bo‘yicha amalga oshirilayotgan dolzarb, izchil islohotlar samarasi, davlatimiz rahbarining shaxsiy tashabbusi bilan yoshlarning zamonaviy tahsil olishi uchun yaratilayotgan shart-sharoitlar, imkoniyat va imtiyozlar, ularga doir asoslovchi hujjatlar mazmun-mohiyati, ta’limni rag‘batlantirish omillari, sunʼiy intellekt imkoniyatlari, raqamlashtirishning taraqqiyot shartlaridan ekanligi xususida tushuntirishlar berildi.
Shuningdek, tadbirning keyingi qismida umumta’lim o‘quv dargohlarining bitiruvchilari, o‘qituvchilar va yoshlar bilan samimiy suhbat va ochiq muloqot tashkil etildi.
Qabul davomida o‘qituvchilarning test tizimi, bilim va malakalarni baholashga doir takliflari o‘rganildi hamda yechim yuzasidan birgalikda tahlil qilindi.
Yoshlarga Yangi O‘zbekiston yoshlarining huquq va burchlari, ular uchun ko‘zda tutilgan maqsadlar, imkoniyatlar va loyihalar bo‘yicha muhim huquqiy ma’lumotlar berildi. Navoiy viloyati yoshlarining bilimga, zamonaviy kasblarni egallash yo‘lidagi intilishi, sa’y-harakati e’tirof etilib, taʼlim sohasida ko‘zda tutilgan asosiy maqsadlarni amalga oshirishda faol ishtirok etishlariga ishonch bildirildi.





