Toshkent davlat transport universiteti Pekin transport universiteti bilan qo‘shma ta’limni yo‘lga qo‘yadi
2025-10-23 11:00:00 / Yangiliklar
Toshkent davlat transport universitetida Xitoy Xalq Respublikasining Pekin transport universitetidan tashrif buyurgan delegatsiya vakillari bilan muzokaralar bo‘lib o‘tdi.
Tashrif doirasida mehmonlar universitet kampusi bo‘ylab sayr qilib, yaratilgan ta’lim, ilmiy-tadqiqot va infratuzilma sharoitlari bilan tanishdi.
Uchrashuvda tomonlar o‘zaro hamkorlikni yanada mustahkamlash, qo‘shma ta’lim dasturlarini rivojlantirish, shuningdek, “Ipak yo‘li yuqori tezlikdagi temir yo‘l ustaxonasi” loyihasini amalga oshirish masalalarini atroflicha muhokama etishdi.
Muzokaralar davomida Toshkent davlat transport universiteti va Pekin transport universiteti o‘rtasida qo‘shma hamkorlik to‘g‘risidagi shartnoma imzolandi.
Mazkur kelishuv ta’lim va ilmiy almashinuvni kengaytirish, professor-o‘qituvchilar malakasini oshirish hamda xalqaro loyihalarni amalga oshirishda muhim ahamiyat kasb etadi.