Transport vaziri o‘rinbosari Global temir yo‘l infratuzilmasi ko‘rgazmasi va konferensiyasida ishtirok etdi
2025-10-06 15:00:00 / Yangiliklar
Konferensiya ekspertlar va qaror qabul qiluvchilarni transport sohasining kelajagini muhokama qilish va global aloqani yaxshilash uchun innovatsion yechimlarni izlash yo‘lida birlashtirgan yetakchi xalqaro platformaga aylandi.
Mazkur muhim tadbirda Transport vaziri o‘rinbosari Jasurbek Choriyev hamda “O‘zbekiston temir yo‘llari” AJ Boshqaruv raisi birinchi o‘rinbosari Xikmatilla Raxmetov boshchiligidagi O‘zbekiston delegatsiyasi vakillari ishtirok etishdi.
"Millatlararo bog‘liqlikni yaratish: barqaror rivojlanishni ta’minlashda transport va infratuzilmaning roli" mavzusidagi panel sessiyasida ishtirok etish jarayonida vazir o‘rinbosari Jasurbek Choriyev so‘zga chiqdi.
U o‘z ma’ruzasida transport infratuzilmasining barqaror rivojlanishi, iqtisodiy o‘sish va ijtimoiy integratsiyada hal qiluvchi ahamiyatga ega ekanligini alohida ta’kidlab, o‘zaro transport bog‘liqligini mustahkamlash mintaqaviy integratsiya va xalqaro savdoni kengaytirishning asosiy omili ekanligini qayd etdi.
Shuningdek, J.Choriyev “Global Rail" ko‘rgazmasiga tashrifi chog‘ida texnologiyalar, innovatsiyalar va moliyaviy yechimlarga ixtisoslashgan yirik jahon kompaniyalari pavilyonlarni ko‘zdan kechirdi.
Shu bilan birga ishtirokchi davlatlar va tashkilotlar o‘rtasida hamkorlik va bilim almashish imkoniyatlarini yaratadigan, shuningdek, mintaqaviy va xalqaro miqyosda transport hamda infratuzilma sohalarining rivojlanishiga hissa qo‘shadigan asosiy loyihalar va dasturlar bilan yaqindan tanishdi.