IСAO O‘zbekistonning fuqaro aviatsiyasini rivojlantirish yo‘nalishidagi sa’y-harakatlarni yuqori baholadi
2025-09-30 16:00:00 / Yangiliklar
Uchrashuvda IСAO Bosh kotibi Xuan Karlos Salazar O‘zbekiston Hukumati tomonidan fuqaro aviatsiyasini rivojlantirish yo‘nalishida amalga oshirilayotgan sa’y-harakatlarni yuqori baholadi.
Mazkur sa’y-harakatlar havo transportining mamlakat iqtisodiy rivojlanishidagi o‘rni va ahamiyatini, qolaversa, O‘zbekistonning USOAP/USAP auditlaridan muvaffaqiyatli o‘tgani buni aniq ifodasi ekanligi ta’kidlandi.
Uchrashuvda tomonlar O‘zbekistonda fuqaro aviatsiyasini rivojlantirishning quyidagi ustuvor yo‘nalishlarini muhokama etishdi:
- ICAO standartlari va tavsiya etilgan amaliyoti (SARPs) bajarilishining joriy holati;
- aviatsiya infratuzilmasini modernizatsiya qilish bo‘yicha ustuvor tashabbuslar;
- ICAOning O‘zbekistonda bo‘lib o‘tadigan kelgusi auditlariga (ICVM va USOAP) tayyorgarlik jarayonlari.
Shu bilan birga, O‘zbekiston va ICAO o‘rtasida imzolangan 2024–2026-yillarga mo‘ljallangan “O‘zbekiston Respublikasida parvozlar xavfsizligi darajasini oshirish bo‘yicha Strategik harakatlar rejasi” (COSPA) ijrosiga alohida e’tibor qaratildi.
“O‘zaviatsiya” agentligi direktori T.A. Nazarov O‘zbekiston fuqaro aviatsiyasini institutsional rivojlantirish, xususan, ICAOning xalqaro dasturlari doirasida ekspertlik va texnik yordam ko‘rsatish masalasidagi qo‘llab-quvvatlovi uchun ICAOga samimiy minnatdorchilik bildirdi.
ICAO Bosh kotibi Xuan Karlos Salazar O‘zbekiston Respublikasi fuqaro aviatsiyasi sohasida islohotlarni amalga oshirishda ICAO bilan hamkorlik yanada rivojlanishiga umid bildirdi.