ICAO Assambleyasining 42 sessiyasi o‘zi ishini boshladi
2025-09-25 14:00:00 / Yangiliklar
O‘zbekiston delegatsiyasiga Transport vazirligi huzuridagi “O‘zaviatsiya” agentligi direktori Tohir Nazarov boshchilik qilmoqda. Assambleyasining 42 sessiyasini ICAO Kengashi prezidenti Salvatore Shakkitano va ICAO bosh kotibi Xuan Karlos Salasar ochib berishdi.
ICAO Kengashi prezidenti Salvatore Shakkitano o‘z nutqida tadbir ishtirokchilarini qutlar ekan, bugun dunyo aviatsiyasi o‘zaro hamkorlikda yechim topishni taqozo etayotgan qator global chaqiriqlarga duch kelayotganini ta’kidladi. U shuningdek, har qanday qiyinchiliklarga qaramasdan fuqaro aviatsiyasi global mobillikning asosi bo‘lib qolishi kerakligini kerakligini aytib o‘tdi.
“Parvozlarga bo‘lgan talab ortib borayotgan sharoitda soha xavfsizlik, rivojlanish va atrof-muhitni muhofaza qilish borasida muvozanatni ta’minlashi zarur. Asosiy e’tiborni aviatsiyani dekorbanizatsiyalash, innovatsion texnologiyalarni joriy etish, mutaxassislarning yangi avlodini yetishtirishga alohida e’tibor qaratish lozim. Shuningdek, dengizga chiqish imkoni bo‘lmagan mamlakatlar uchun fuqaro aviatsiyasini rivojlantirish zarur”, – dedi Salvatore Shakkitano.
ICAO Assambleyasining bu galgi sessiyasida 193 a’zo davlat ovoz berishi orqali 36 davlatdan iborat yangi ICAO Kengashi saylanadi. Bundan tashqari, ICAO ning 3-yilga mo‘ljallangan byudjeti tasdiqlanadi, texnik, huquqiy, iqtisodiy va moliyaviy sohalarda, shuningdek, texnik yordam ko‘rsatish bo‘yicha o‘tgan davrdagi ishlarning yakunlari va 2028-yilgacha bo‘lgan navbatdagi davr uchun strategik vazifalar ko‘rib chiqiladi.