Janubiy Koreya Temir yo‘l tadqiqot instituti bilan hamkorlik masalalari muhokama etildi
2025-09-19 14:00:00 / Yangiliklar
Joriy yilning 18-sentyabr kuni Transport vaziri o‘rinbosari Ilxomjon Abdugafarov Janubiy Koreyaning Temir yo‘l tadqiqot instituti KRRI (Korea Railroad Research Institute) va AJOU universiteti vakillari bilan uchrashdi.
Uchrashuvda temir yo‘l transporti xodimlari malakasini oshirish, professor-o‘qituvchilar va talabalar almashinuvi, yuqori malakali mutaxassislarni tayyorlash hamda qo‘shma ilmiy tadqiqotlarni amalga oshirish masalalari muhokama etildi.
Jumladan, yuqori tezlikda harakatlanuvchi poyezdlarga texnik xizmat ko‘rsatuvchi mutaxassislar malakasini oshirish bo‘yicha Janubiy Koreya tajribasi asosida o‘quv dasturlarini ishlab chiqish masalasiga alohida e’tibor qaratildi.
Uchrashuv yakunida tomonlar muhokama etilgan masalalar yuzasidan kelgusi qadamlarni belgilab, ushbu yo‘nalishda hamkorlikni faollashtirishga kelishib oldi.