Jamoatchilik kengashi faoliyati: yarim yil sarhisobi va istiqboldagi rejalar
2025-08-09 11:00:00 / Yangiliklar
Davlatimiz rahbarining 2024-yil 26-avgustdagi “Fuqarolik jamiyati institutlarini davlat tomonidan qo‘llab-quvvatlash tizimini yanada takomillashtirish chora-tadbirlari to‘g‘risida”gi PF–124-son farmoni bilan davlat organlari huzuridagi jamoatchilik kengashlari faoliyati mutlaqo yangi bosqichga ko‘tarildi.
Xususan, endilikda jamoatchilik kengashlari o‘z faoliyatida kamyob amaliyot jamoatchilik eshituvi, jamoatchilik monitoringi kabi mexanizmlardan samarali foydalanishni boshlashdi.
Jumladan, transport vazirligi huzuridagi Jamoatchilik kengashi Toshkent shahri jamoat transporti avtobuslarda yo‘l haqi to‘lovlarini naqd pulda qabul qilish amaliyotning to‘xtatilishi, ushbu yangilikka nisbatan yo‘lovchilarning fikr-mulohazalari, mazkur jarayonda iste’molchilarning huquq va manfaatlarini ta’minlash yuzasidan yanvar oyida jamoatchilik monitoringini o‘tkazdi.
Shu bilan birga may oyida “Shahar jamoat transportida imkoniyati cheklangan shaxslarning harakatlanishi uchun yaratilgan imkoniyatlar, ushbu shaxslar huquqlariga rioya etilishini ta’minlanish holati va bu boradagi dolzarb masalalar” muhokamasiga bag‘ishlangan jamoatchilik eshituvi o‘tkazildi.
Vazirlik Jamoatchilik Kengashi raisi Sayyora Xodjayeva bu kabi mexanizmlardan foydalangan holda faol jamoatchilik nazoratining o‘rnatilishi Toshkent shahrida transport xizmatini ko‘rsatuvchi “Toshshahartransxizmat” AJ tasarrufidagi barcha avtobus saroylari rahbar va mutasaddilarida, qolaversa, haydovchilarda hisobdorlik hissini oshirishga turtki bo‘lib xizmat qilayotganini alohida ta’kidlab o‘tdi.
Joriy yilning 7-avgust kuni Transport vazirligi huzuridagi Jamoatchilik kengashining 2025-yilning 1-yarim yil yakunlari hamda istiqboldagi vazifalarni belgilab olishga bag‘ishlangan yig‘ilishi o‘tkazildi.
Yig‘ilishda kun tartibiga muvofiq 2025-yilning birinchi yarim yilligida amalga oshirilgan ishlar sarhisob qilinib, Jamoatchilik kengashi faoliyatiga oid masalalar muhokama etildi. Xususan, Kengash Nizomi va tasdiqlangan yillik ish rejasida belgilangan vazifalar ijrosi yuzasidan amalga oshirilgan ishlar tahlil qilinib, erishilgan natijalarga baho berildi.
Shu bilan birga, joriy yilning ikkinchi yarim yilligida bajarilishi rejalashtirilgan ishlar atroflicha muhokama qilindi. Transportning barcha turlarida sifatli, xavfsiz va zamon talablariga mos bo‘lgan xizmatlar ko‘rsatilishini tashkil etish, yo‘lovchilar huquq va manfaatlarini himoya qilish, bunda Jamoatchilik kengashi a’zolarining faol ishtiroki bo‘yicha asosiy vazifalar belgilab olindi.
O‘zaro muloqotlar davomida kun tartibidagi masalalar yuzasidan taklif va tavsiyalar o‘rganilib, tegishli qarorlar qabul qilindi.