"Temir yo‘l transporti to‘g‘risida"gi O‘zbekiston Respublikasi Qonunining 34-moddasi ijrosini ta’minlash maqsadida Transport vazirining mazkur buyrug‘i bilan tasdiqlangan Ushbu Nizom umumiy foydalanishdagi va umumiy foydalanishda bo‘lmagan temir yo‘llarda ishi bevosita poyezdlar harakati bilan bog‘liq bo‘lgan temir yo‘l transporti ayrim toifadagi xodimlarining ish vaqti va dam olish vaqti rejimlarini belgilaydi.

Nizom 7 bob va 41 banddan iborat bo‘lib, ishlari bevosita poyezdlar harakati bilan bog‘liq bo‘lgan, yo‘lda yoki temir yo‘l transporti infratuzilmasining xizmat ko‘rsatiladigan uchastkalari doirasida o‘z mehnat vazifalarini amalga oshiradigan, yuklarni tashish va yo‘lovchilarga xizmat ko‘rsatish bo‘yicha ishlarni bajaradigan temir yo‘l transporti xodimlarining, shuningdek tashish jarayonining uzluksizligini va poyezdlar harakati xavfsizligini ta’minlaydigan xodimlarning ish vaqti va dam olish vaqti rejimlarini hamda xalqaro tajribani o‘rgangan holda ishlab chiqilgan.

Ishi bevosita poyezdlar harakati bilan bog‘liq bo‘lgan temir yo‘l transporti ayrim toifadagi xodimlarining ish vaqti va dam olish vaqti rejimlari to‘g‘risidagi nizom:

- umumiy foydalanishdagi va umumiy foydalanishda bo‘lmagan temir yo‘l transportida tashish va harakat xavfsizligi bilan bog‘liq barcha xodimlar uchun mehnat va dam olishning yagona rejimini belgilash;

- umumiy foydalanishdagi va umumiy foydalanishda bo‘lmagan temir yo‘l transportida tashish jarayoni barcha ishtirokchilarining mas’uliyatini oshirish;

- temir yo‘l transportida xavfsizlikni ta’minlash, fuqarolarning hayoti va sog‘lig‘iga, atrof-muhitga, jismoniy yoki yuridik shaxslarning mol-mulkiga zarar yetkazilishiga olib keladigan transport hodisalarni oldini olish uchun xizmat qiladi.