Elektrobuslar parkini joriy etish va ekspluatatsiya qilishda samaradorlikni oshirish mavzusida xalqaro seminar tashkil etildi
2025-06-05 17:00:00 / Yangiliklar
Toshkent va Namangan shaharlarida bo‘lib o‘tgan seminarlarda elektrobus sotib olishni rejalashtirgan tadbirkorlik subyektlari, manfaatdor vazirlik va idoralar, mahalliy hokimlik organlari vakillari hamda xalqaro konsultantlar ishtirok etdilar.
Shuningdek, seminarda mamlakatimizda elektr transport vositalari infratuzilmasini joriy etishda eng yirik tashkilotlar bo‘lgan “Megawatt Motors” hamda eng katta quvvatlantirish tarmog‘iga ega bo‘lgan “TokBor” kompaniyasi vakillari ishtirok etib, o‘z taqdimotlarida sohadagi dolzarb masalalarga e’tibor qaratishdi.
Seminardan ko‘zlangan asosiy maqsad elektrobus sotib olishga salohiyati yetarli bo‘lgan xususiy investorlarga texnik ko‘mak ko‘rsatish, Toshkent shahrida elektrobuslarni xarid qilish va ekspluatatsiyasi bo‘yicha to‘plangan tajribalarni mahalliy hokimliklar, tegishli tashkilotlar vakillari e’tiboriga yetkazish hamda elektrobuslardan foydalanishni ommalashtirishdan iborat.
Namangan shahrida tashkil etilgan seminar doirasida Namangan shahar hokimi Anvarjon Otaxodjayev bilan uchrashuv o‘tkazildi. Uchrashuvda yashil shahar transport yo‘laklarini tashkil etish va elektrobuslarni joriy etish masalalari muhokama qilindi.
Bo‘lib o‘tgan uchrashuvda Namangan shahri bo‘yicha elektromobillikni rivojlantirish konsepsiyasini grant loyihasi doirasida ishlab chiqilishiga kelishib olindi.
Elektrobuslar parkini kengaytirishga ko‘maklashishga qaratilgan mazkur seminarning navbatdagisi Samarqand shahrida joriy yilning 17- iyun kuni bo‘lib o‘tishi rejalashtirilgan.