“Belarus – Rossiya – Qozog‘iston – O‘zbekiston –Afg‘oniston – Pokiston” xalqaro transport yo‘lagini rivojlantirish bo‘yicha ishchi guruhi yig‘ilishi bo‘lib o‘tdi
2025-05-23 13:00:00 / Yangiliklar
O‘zbekiston Respublikasi transport vazirligi tomonidan tashkillashtirilgan onlayn uchrashuvda Pokiston vakillari ham yo‘nalish ishtirokchilari sifatida rasmiy ravishda qatnashdi.
Uchrashuvda tomonlar Termiz shahrida qabul qilingan Yo‘l xaritasining ijro holatini muhokama qildilar. O‘zbekiston tomoni “O‘zbekiston – Afg‘oniston – Pokiston” orqali yuk tashish hajmi sezilarli darajada oshganini qayd etdi.
2024-yil yakuniga ko‘ra “Transafg‘on” yo‘nalishida yuk tashishlar hajmi 5 million tonnadan oshgani, jumladan xorijiy davlatlardan O‘zbekiston orqali Afg‘onistonga yo‘naltirilgan tranzit hajmi 3 million tonnadan oshgani qayd etildi.
Bundan tashqari, Transafg‘on yo‘nalishi bo‘yicha umumiy tashilgan yuklar hajmidan O‘zbekiston orqali Afg‘oniston va Pokistonga tranzit sifatida Qirg‘iziston, Tojikiston, Gruziya, Niderlandiya, Turkiya, Xitoy va Saudiya Arabistoni kabi mamlakatlarga/dan 500 ming tonnaga yaqin yuk tashilgan.
Tomonlar Afg‘oniston tomonining yo‘lakka uning ajralmas qismi sifatida qo‘shilishi muhimligini ta’kidladilar. Uchrashuv yakunida Ishchi guruh a’zolari ishtirokchi mamlakatlarning temir yo‘l ma’muriyatlari ishtirokida oflayn uchrashuv o‘tkazish bo‘yicha kelishuvga erishdilar.