Oʻzbekiston Respublikasi Transport vazirligi

Tadbirning asosiy maqsadi Transkaspiy transport koridori orqali yuk tashishlar hajmini oshirish va yuzaga kelayotgan to‘siqlarni aniqlashda xususiy sektor vakillari fikrini eshitishdan iborat.

Tadbirni Yevropa Komissiyasining Osiyo va Tinch okeani bo‘yicha direktori Peteris Ustubs janoblari ochib berdi va Transkaspiy transport yo‘lagining joriy holati hamda rivojlantirish bo‘yicha amalga oshirilgan ishlar to‘g‘risida to‘xtalib o‘tdi.

Tadbirning asosiy ma’ruzachilaridan biri Transport muammolarini o‘rganish markazi direktori Bekzod Xolmatov Qizil dengiz hamda sharqiy Yevropadagi notinch geosiyosiy vaziyat “Yevropa-Xitoy” va “Yevropa-Markaziy Osiyo” yo‘nalishida xavfsiz, barqaror va o‘zaro manfaatli transport yo‘laklarini rivojlantirish zarurati yuzaga kelayotgani va ushbu geosiyosiy o‘zgarishlar fonida Transkaspiy xalqaro multimodal transport yo‘lagi jahon hamjamiyatining diqqat markazida bo‘layotgani haqida so‘zladi.

Tadbir davomida Transkaspiy yo‘lagi orqali yuk tashishlar amalga oshirayotgan milliy transport-logistika korxonalari vakillari yo‘nalishning istiqbollari va mavjud muammolar to‘g‘risida batafsil to‘xtalib o‘tdi.

Kaspiy dengizi portlari o‘tkazuvchanlik qobiliyati pastligi tufayli yuzaga kelayotgan navbatlar natijasida yetkazib berish muddatlari 2-3 barobarga oshayotgani ta’kidlandi va mazkur muammoni bartaraf etish maqsadida portlarning infratuzilmaviy holatini yaxshilash uchun yirik investitsiyalar jalb etish zarurligi qayd etildi.

Tadbirning dastlabki sessiyasida O‘zbekistondagi multimodal logistika markazlari va omborlari to‘g‘risida Yevropa Ittifoqining transport maslahatchisi ma’ruzasi tinglandi va mamlakatimizning infratuzilmaviy holatidan unumli foydalanish bo‘yicha o‘z fikrlarini bildirdi.

Tadbir yakunida Yevropa Komissiyasi vakillari uchrashuvning yuqori saviyada o‘tganini ta’kidlab, bildirilgan takliflar ijrosini muhokama qilish maqsadida mazkur formatdagi dastlabki uchrashuvni joriy yilning noyabr oyida o‘tkazish taklifini bildirdi.