Uchrashuvda tomonlar O‘zbekiston Respublikasi fuqaro aviatsiyasida parvozlar xavfsizligini nazorat qilish bilan bog‘liq masalalarni muhokama etishdi.

Xususan, Nikolas Rallo so‘nggi yillarda O‘zbekistonda fuqaro aviatsiyasini rivojlantirish sohasidagi islohotlar natijasida yangi aviakompaniyalar, havo kemalari va aerodromlar soni sezilarli darajada ko‘payib, shiddat bilan o‘sishda davom etayotganini alohida ta’kidlab o‘tdi. Ushbu jarayonda esa parvozlar xavfsizligini ta’minlash dolzarb masala ekanligi bunda nazorat samaradorligini oshirish muhimligi qayd etildi.

Ushbu jihatlarni hisobga olgan holda, Nikolas Rallo, ayniqsa, COSPA (Mamlakat strategik harakatlar rejasi) dasturiga e'tibor qaratdi. ICAO pilot loyihasi bo'lgan ushbu dastur aviatsiya xavfsizligini yaxshilash bilan bog'liq asosiy jihatlarni qamrab oladi. O‘zbekiston ICAOga a’zo 193 davlat orasida birinchi bo‘lib ushbu dasturdan foydalanadi.

Uchrashuvda tomonlar ICАO va “O‘zaviatsiya” agentligi tomonidan O‘zbekiston Respublikasi fuqaro aviatsiyasida parvozlar xavfsizligini qo‘llab-quvvatlash bo‘yicha 2024 – 2026-yillar uchun mo‘ljallangan davlat strategik harakatlar rejasini muhokama etishdi.

Mazkur reja O‘zbekistonda parvozlar xavfsizligini qo‘llab-quvvatlashga qaratilgan maxsus yangi loyiha bo‘lib,  mamlakatimizning milliy rivojlanish strategiyasiga mos ravishda ishlab chiqilgan va aviatsiya sohasini bilan bog‘liq maqsadlarga erishishga hissa qo‘shishga qaratilgan.