Oʻzbekiston Respublikasi Transport vazirligi

Jamoatchilik nazorati tartibida o‘tkazilgan monitoring natijalari xulosasiga bag‘ishlangan jamoatchilik eshituvida shahar jamoat transportida imkoniyati cheklangan shaxslarning harakatlanishi uchun yaratilgan imkoniyatlar, ushbu shaxslar huquqlariga rioya etilishining ta’minlanish holati va bu boradagi dolzarb masalalar muhokama etildi.

Transport vazirligi huzuridagi Jamoatchilik kengashi raisi Sayyora Xodjayeva mamlakatimizda «Inson qadri uchun» degan ezgu tamoyil asosida olib borilayotgan islohotlarga alohida to‘xtalib o‘tdi. Xususan, mamlakatimizda inklyuziv jamiyatni rivojlantirish va imkoniyati cheklangan shaxslar uchun maqbul muhitni yaratish, jamiyatdagi ayrim stereotiplarni bartaraf etish hamda bu borada davlat va nodavlat tashkilotlarining o‘rni va o‘zaro hamkorlikdagi harakatlarining ahamiyati xususida fikr bildirdi.

Yig‘ilishda imkoniyati cheklangan shaxslar uchun shahar jamoat transporti qulayligi monitoringi natijalari yuzasidan Toshkent shahar “Millenium” nogiron yoshlarni ijtimoiy-huquqiy reabilitatsiya markazi raisi Guljahon Mahmatqulova, poytaxtimizning Sergeli va Yangihayot tumanlari nogironlar jamiyati rahbari Gulnoza Sharipova va O‘zbekiston nogironlar jamiyati raisi o‘rinbosari Botirjon Omonturdiyevlar o‘z ma’ruzalari bilan ishtirok etishdi.

Jamiyat vakillari imkoniyati cheklangan shaxslar uchun maqbul muhitni yaratish borasida so‘nggi yillarda shahar jamoat transporti tizimida amalga oshirilayotgan islohotlarga alohida to‘xtalib o‘tdi. Xususan, harakat tarkibining yangilanishi past polli zamonaviy avtobuslarning olib kelingani alohida e’tirof etildi.

Shu bilan birga, imkoniyati cheklangan fuqarolarning shahar jamoat transporti, xususan, avtobuslar xizmatidan foydalangan holda bir manzildan ikkinchi manzilga xavfsiz yetib olishini ta’minlashda haydovchilarning malakasi va mas’uliyatini oshirish lozimligi ta’kidlab o‘tildi.  

Shu o‘rinda eslatib o‘tish lozim, 2017-yil 1-dekabrdagi “Nogironligi bo‘lgan shaxslarni davlat tomonidan qo‘llab–quvvatlash tizimini tubdan takomillashtirish chora–tadbirlari to‘g‘risida”gi PF–5270-sonli Farmonga ko‘ra, 2018-yil 1-martdan nogironligi bo‘lgan shaxslarga moslashtirilmagan shahar yo‘lovchi transporti vositalarini sotib olish taqiqlangan. Shuningdek, davlatimiz rahbarining 2023-yil 16-fevraldagi ““Jamoat transporti tizimini isloh qilish chora-tadbirlari to‘g‘risida”gi” PQ-59-sonli qarorga asosan hududlarda brutto–shartnoma asosida tashkil etiladigan muntazam shahar avtobus yo‘nalishlarida nogironligi bo‘lgan shaxslarga moslashtirilgan avtobuslarda faoliyat ko‘rsatish majburiyati yuklatilgan.

Tadbirning ikkinchi qismi shahar jamoat transportidan nogironligi bo‘lgan shaxslarning amalda foydalanish imkoniyati, maxsus moslama va qurilmalardan foydalanish ko‘nikmasi, haydovchilar tajribasi va munosabatini o‘rganishga bag‘ishlandi.

Xususan, Toshkent metropolitenida nogironligi bor shaxslarga to‘siqsiz muhit yaratish borasida “Xalqlar do‘stligi” yer osti metro bekatini moslashtirish bo‘yicha namunaviy loyiha doirasida amalga oshirilgan ishlar ko‘zdan kechirildi.

Bugungi kunda mazkur loyihaga muvofiq imkoniyati cheklangan shaxslar, keksa yoshdagilar va bolalar aravachasi bilan harakatlanayotgan yo‘lovchilarni metropolitenning vestibyul va platforma qismiga olib tushish/olib chiqishga mo‘ljallangan maxsus platforma liftlari “Xalqlar do‘stligi” va “Buyuk ipak yo‘li” bekatlarida o‘rnatilgan.  

Joriy yil yakuniga qadar yana 16 ta bekatda ana shunday qurilmalar (ko‘targichlar) o‘rnatilishi rejalashtirilgan.