Turkiya bilan yuk tashuvlarini rivojlantirish masalalari muhokama etildi
2025-04-21 10:00:00 / Yangiliklar
Uchrashuvda tomonlar 2023-yil noyabrda Toshkentda bo‘lib o‘tgan Iqtisodiy hamkorlik tashkiloti transport vazirlarining 12-yig‘ilishida imzolangan Bayonnoma doirasida "O‘zbekiston – Turkmaniston – Eron – Turkiya" orqali Osiyo va Yevropa o‘rtasidagi xalqaro multimodal transport yo‘lagini yanada rivojlantirish masalalarini muhokama etishdi.
Shuningdek, yuklarni Turkiyaning asosiy logistika markazlarida jamlash va keyinchalik ularni blok-poyezdlar orqali O‘zbekistonga jo‘natish imkoniyatlari yuzasidan fikr almashildi.
Bundan tashqari, tomonlar "Amerika qit’asi mamlakatlari – Turkiya – Kavkaz – Markaziy Osiyo" yo‘nalishida yuk tashish uchun qulay shart-sharoitlarni yaratish yuzasidan harakatlarni muvofiqlashtirishga kelishib oldilar.
Uchrashuv yakunida Turkiya tomoni O‘zbekiston delegatsiyasini joriy yilning 25-iyunda Istanbulda bir qator davlatlar transport vazirlari ishtirokida bo‘lib o‘tadigan "Transport o‘zaro bog‘liqligi bo‘yicha global forum-2025"da qatnashishga taklif etdi.