Oʻzbekiston Respublikasi Transport vazirligi

Transport va logistikani rivojlantirish muammolarini o‘rganish markazi tomonidan o‘tkazilgan uchrashuvda O‘zbekiston Respublikasi Prezidentining 2025-yil 27-yanvardagi “O‘zbekiston Respublikasining transport-logistika tizimini yanada rivojlantirish chora-tadbirlari to‘g‘risida”gi PQ-28-son qarori bilan Transport vazirligiga yuklatilgan vazifalar hamda O‘zbekiston Respublikasi Prezidentining 2025-yil 27 fevraldagi “Xizmatlar sohasi barqaror rivojlanishi uchun qulay shart-sharoitlar yaratishga oid qo‘shimcha chora-tadbirlar to‘g‘risida”gi PQ-78-son qarorida belgilangan “2025 – 2027 yillarga mo‘ljallangan yirik multimodal transport-logistika markazlari tarmog‘ini rivojlantirish dasturini ishlab chiqish” topshirig‘ini amalga oshirish masalalari bo‘yicha muhokamalar o‘tkazildi.

Uchrashuvda yig‘ilish qatnashchilari Transport vazirligi tomonidan ishlab chiqilgan Vazirlar Mahkamasining “Transport-logistika markazlari faoliyatini va tranzit-transport yo‘laklarini rivojlantirish to‘g‘risida” qarori loyihasi bilan belgilanayotgan “Transport-logistika markazlarini zamonaviy texnika va uskunalar bilan jihozlashga doir namunaviy talablar” loyihasi bilan yaqindan tanishtirildi hamda loyihada belgilanayotgan namunaviy talablar atroflicha muhokama qilindi.

Yig‘ilishda, bugungi kunda transport-logistika markazlari faoliyatini yuritishda yuzaga kelayotgan muammolar, transport-logistika markazlarida yuklarga ishlov berish quvvatini oshirish imkoniyatlari, imtiyoz va preferensiyalarni joriy etish bo‘yicha fikr almashildi hamda sohadagi mavjud muammolarni hal qilishda birgalikda ishlashga kelishib olindi.