Oʻzbekiston Respublikasi Transport vazirligi

Yig‘ilishda vazirlar transport koridorlarini rivojlantirish, yuklarning chegaralar orqali to‘siqsiz harakatini ta’minlash, tranzit jarayonlarini soddalashtirish hamda sohada raqamli texnologiyalarni joriy etish masalalarini muhokama etishdi.

O‘zbekiston Respublikasi transport vaziri Ilhom Maxkamov yig‘ilishda so‘zlagan nutqida Markaziy Osiyoning tarixan Sharq va G‘arbni bog‘lovchi muhim hudud sifatida shakllanganini, bugungi kunda esa mazkur salohiyat zamonaviy transport va logistika tizimlari orqali yangi bosqichga chiqayotganini qayd etib, transport sohasi nafaqat infratuzilma, balki iqtisodiy o‘sish va mintaqaviy o‘zaro bog‘liqlikning asosiy omili ekaniga urg‘u berdi.

Vazir transport sohasini raqamlashtirish masalasiga alohida to‘xtalib, O‘zbekiston va Turkiya o‘rtasida “e-Permit” tizimining joriy etilgani xalqaro amaliyotda muhim qadam bo‘lganini alohida ta’kidlab o‘tdi. Shuningdek, “e-CMR” tizimini joriy etish orqali yagona raqamli transport makonini shakllantirish muhim ahamiyatga ega ekanini bildirdi.

Shuningdek, I.Maxkamov zamonaviy sharoitda barqaror va samarali transport yo‘laklarini rivojlantirish zarurligi ta’kidlab, “Xitoy – Qirg‘iziston – O‘zbekiston” temir yo‘li loyihasi ushbu jarayonda butun mintaqa uchun strategik ahamiyatga ega ekani qayd etdi. Ushbu yirik infratuzilma loyihasi transport tarmoqlarini diversifikatsiya qilish va yangi bozorlarga chiqish imkoniyatlarini kengaytirishga xizmat qilishini bildirdi.

Yig‘ilish yakunida muhokama qilingan masalalar bo‘yicha TDTga a’zo mamlakatlarning umumiy pozitsiyasini aks ettiruvchi qo‘shma kommyunike qabul qilindi hamda “e-CMR” tizimini joriy etish bo‘yicha memorandum imzolandi.