O‘zbekiston va Qozog‘iston o‘rtasida tranzit salohiyatini oshirish yo‘lidagi muzokaralar
2026-02-19 18:00:00 / Yangiliklar
Xususan, Sariyog‘och stansiyasida yuk aylanmasini ko‘paytirib poyezdlarini qabul qilish va jo‘natish jarayonlarini takomillashtirish, chegaradosh hududlarda o‘tkazuvchanlik quvvatini oshirish hamda logistika va qog‘oz hujjatlarini raqamlashtirish samaradorligini yaxshilash masalalari atroflicha ko‘rib chiqildi.
Shundan so‘ng “Қазақстан темір жолы” delegatsiya a’zolari Sirdaryo stansiyasiga tashrif buyurib, ikki tomonlama muzokaralarni davom ettirdilar. Tomonlar yuk tashish jarayonlarini muvofiqlashtirish, operativ hamkorlikni kuchaytirish va texnologik jarayonlarni yanada soddalashtirish bo‘yicha fikr almashdilar.
Delegatsiya a’zolari poyezdda Maqtaaral stansiyasiga yo‘l olishdi. Sirdaryo–Maqtaaral uchastkasida yuk aylanmasini ko‘paytirib qog‘oz hujjatlarini raqamlashtirish yuzasidan amaliy muzokaralar olib borishdi.
Mazkur uchrashuvlar ikki mamlakat temir yo‘l ma’muriyatlari o‘rtasidagi strategik hamkorlikni mustahkamlash, tranzit yuk tashish salohiyatini oshirish hamda mintaqaviy transport integratsiyasini rivojlantirishga xizmat qiladi.