Oʻzbekiston Respublikasi Transport vazirligi

Oliy ta’lim, fan va innovatsiyalar vazirligi hamda Toshkent davlat transport universiteti hamkorligida “Ilm-fanda qizlar: imkoniyatlar va mas’uliyat” mavzusida Respublika anjumani tashkil etildi. Anjuman mamlakatda ilm-fan, innovatsiya va ta’lim sohalarida xotin-qizlarning faolligini oshirish, ularning intellektual salohiyatini ro‘yobga chiqarish hamda ilmiy faoliyatdagi mas’uliyatini kuchaytirishga qaratildi.

Anjumanda Oliy Majlis Senati Raisi Tanzila Narbayeva, Oliy ta’lim, fan va innovatsiyalar vaziri Qo‘ng‘irotboy Sharipov, Transport vazirining birinchi o‘rinbosari Mamanbiy Omarov ishtirok etdi. Shuningdek, respublikaning turli hududlaridan ilm-fan sohasida faoliyat yuritayotgan iqtidorli talaba-qizlar, doktorantlar va soha mutaxassislari qatnashdi.

Tadbir davomida qizlarning ilmiy tadqiqotlar va innovatsion loyihalardagi ishtiroki, zamonaviy bilim va texnologiyalarni egallashdagi imkoniyatlari, shuningdek, jamiyat taraqqiyotidagi mas’uliyati atroflicha muhokama qilindi. Davlat tomonidan xotin-qizlar ilmiy faoliyatini qo‘llab-quvvatlashga qaratilgan tashabbuslar, grantlar va ta’lim dasturlarining amaliy ahamiyati alohida ta’kidlandi.

Anjuman doirasida ilm-fan sohasida salmoqli natijalarga erishgan iqtidorli talaba-qizlarning yutuqlari e’tirof etildi. Savol-javoblar orqali ishtirokchilar o‘zlarini qiziqtirgan masalalar yuzasidan bevosita fikr almashish imkoniga ega bo‘ldi.

Tadbir yakunida ilmiy faoliyati va tashabbuskorligi bilan ajralib turgan iqtidorli qizlar Oliy Majlis Senati Raisi tomonidan taqdirlandi.