Oʻzbekiston Respublikasi Transport vazirligi

Tashrifdan ko‘zlangan asosiy maqsad universitetning ta’lim va ilmiy salohiyatini xalqaro miqyosda namoyish etish, xorijiy abituriyentlarni tahsil olishga jalb qilish, shuningdek, O‘zbekiston va Ozarbayjon o‘rtasidagi ta’lim, ilm-fan va innovatsiyalar sohasidagi hamkorlikni yanada mustahkamlashdan iborat.

Ko‘rgazma doirasida universitet vakillari tomonidan ta’lim yo‘nalishlari, zamonaviy o‘quv-laboratoriya bazasi, ilmiy-tadqiqot faoliyati, xalqaro dasturlar va akademik almashinuv imkoniyatlari yuzasidan keng qamrovli taqdimotlar o‘tkazildi. Abituriyentlar, ota-onalar va ta’lim sohasi mutaxassislari bilan bo‘lib o‘tgan uchrashuvlarda qabul jarayonlari, grant va stipendiyalar, shuningdek, bitiruvchilarning kasbiy istiqbollari bo‘yicha batafsil ma’lumotlar berildi.

Shuningdek, delegatsiya Ozarbayjon Texnika Universiteti hamda Ozarbayjon Milliy Aviatsiya Akademiyasi bilan yuqori darajadagi rasmiy muzokaralar olib bordi.

Uchrashuvlar davomida tomonlar o‘zaro manfaatli hamkorlikni kengaytirish, qo‘shma ta’lim dasturlarini amalga oshirish va ilmiy-tadqiqot faoliyatini rivojlantirish masalalarini muhokama qildilar hamda o‘zaro anglashuv memorandumlari va hamkorlik to‘g‘risidagi hujjatlarni imzoladilar.

Imzolangan hujjatlar quyidagi ustuvor yo‘nalishlarni qamrab oladi:

- aviatsiya, avtomobil va temir yo‘l transporti sohasida ta’lim hamda ilmiy hamkorlik;

- infratuzilma va boshqaruv tizimlarini takomillashtirish;

- lokomotiv va vagon xo‘jaligi bo‘yicha muhandis kadrlar tayyorlash;

- aviatsiya sohasida uchuvchisiz uchish apparatlari texnologiyalarini rivojlantirish;

- professor-o‘qituvchilar, ilmiy xodimlar va talabalar almashinuvini tashkil etish;

- qo‘shma ilmiy-tadqiqotlar, innovatsion loyihalar va ilmiy nashrlarni amalga oshirish.

Tomonlar mazkur kelishuvlar asosida malaka oshirish dasturlari, stajirovkalar, seminar va konferensiyalarni muntazam tashkil etish, o‘quv-uslubiy va ilmiy adabiyotlarni birgalikda yaratish bo‘yicha amaliy ishlarni bosqichma-bosqich yo‘lga qo‘yishga kelishib oldilar.

Mazkur tashrif Toshkent davlat transport universitetining xalqaro maydondagi nufuzini oshirish, akademik hamkorlik geografiyasini kengaytirish hamda transport va aviatsiya sohalari uchun zamonaviy bilim va amaliy ko‘nikmalarga ega raqobatbardosh mutaxassislar tayyorlashda muhim ahamiyat kasb etadi.