Oʻzbekiston Respublikasi Transport vazirligi

Mamlakatimiz transport sohasida korrupsiyaviy xavf-xatarlarning oldini olishning yagona va samarali tizimini shakllantirishga qaratilgan tizimli ishlar amalga oshirilmoqda. Jumladan, 16-yanvar kuni Transport vazirligida O‘zbekiston Respublikasi Prezidentining "O‘zbekiston Respublikasida korrupsiyaning oldini olish va unga qarshi kurashish tizimini yanada takomillashtirish to‘g‘risida"gi PF–270-son Farmoni hamda Korrupsiyaga qarshi kurashish qo‘mitasining 2025-yil 11-dekabrdagi 61-son qarori ijrosini ta’minlash masalalariga bag‘ishlangan yig‘ilish bo‘lib o‘tdi.

Yig‘ilishda belgilangan topshiriqlar ijrosini ta’minlash maqsadida Transport vazirining xavfsizlik masalalari bo‘yicha maslahatchisi B.Rasulov boshchiligida o‘tkazilgan ishchi muhokamada vazirlikning Korrupsiyaga qarshi kurashish bo‘limi boshlig‘i, markaziy apparat, boshqarma va bo‘lim boshliqlari, shuningdek, 13 ta hududiy boshqarma, tizim va sohaviy tashkilotlari vakillari ishtirok etishdi.

Muhokamalar davomida sohada korrupsiyaviy xavf-xatarlarni bartaraf etish, faoliyatda ochiqlik va shaffoflikni ta’minlash, qonun hujjatlari talablarining so‘zsiz ijrosini yo‘lga qo‘yish hamda har bir rahbar va mas’ul xodimning shaxsiy javobgarligini oshirishga qaratilgan chora-tadbirlar belgilab olindi.