Oʻzbekiston Respublikasi Transport vazirligi

Ayni paytda mazkur loyiha jamoatchilik muhokamasi uchun uzbekistan2030.uz onlayn platformasiga joylashtirilgan. Fuqarolar loyiha bilan tanishib, “Fikr qoldirish” tugmasi orqali o‘z taklif va mulohazalarini bildirishlari mumkin.

Muhokama shaklida tashkil etilgan seminarda Transport vazirligi markaziy apparati tarkibiy bo‘linmalari va tizim tashkilotlari, shuningdek, “Zoom” platformasi orqali barcha hududiy boshqarmalari xodimlari ishtirok etdi.

Seminarda transport vazirining birinchi o‘rinbosari M.Omarov so‘zga chiqib, “O‘zbekiston – 2030” strategiyasining takomillashtirilgan loyihasini ishlab chiqish jarayonda vazirlik va idoralar, ilmiy muassasalarning 350 nafardan ortiq vakillari ishtirok etib, Strategiyada belgilangan barcha 444 ta samaradorlik ko‘rsatkichi bugungi kun talablari asosida qayta ko‘rib chiqilganligini ta’kidladi.

Yangilangan Strategiya loyihasining asosiy jihatlari quyidagilardan iborat:

Birinchidan, barcha ko‘rsatkichlar davlatimiz rahbari tomonidan belgilab berilgan yangi marralarga moslashtirildi va to‘ldirildi. Bunda, yurtdoshlarimizga munosib sharoit yaratadigan, har bir inson va oila hayotida seziladigan maqsadlarga alohida e’tibor qaratildi;

Ikkinchidan, barcha ko‘rsatkichlar o‘lchanadigan, ya’ni, son shaklida (foiz, ulush, daraja, hajm, nisbat, ball, indeks) bo‘lishi qat’iy belgilandi. Hisoblab yoki baholab bo‘lmaydigan, umumiy vazifa, topshiriq va “shior” ko‘rinishidagi ko‘rsatkichlar chiqarib tashlandi (bunday bandlar 130 ta);

Uchinchidan, barcha samaradorlik ko‘rsatkichlarining bajarilishi 2030-yilgacha yilma yil belgilandi. Ya’ni, har bir ijobiy o‘zgarishni yillar kesimida ko‘rish imkoniyati yaratildi;

To‘rtinchidan, Strategiyada har bir vazirlik va idora o‘z o‘rnini topdi. Xususan, loyihaga ko‘ra, 60 taga yaqin davlat organlariga tegishli samaradorlik ko‘rsatkichi belgilandi;

Beshinchidan, har bir samaradorlik ko‘rsatkichiga erishilishini ta’minlaydigan moliyaviy manbalar aniq ko‘rsatildi;

Oltinchidan, endi soha, tarmoq va hududlarni rivojlantirish konsepsiya va strategiyalari “O‘zbekiston – 2030” strategiyasiga muvofiq holda ishlab chiqilishi qat’iy belgilanadi. Jumladan, keyingi yil 50 tadan ziyod shunday konsepsiya (4 ta), soha va tarmoqlarni rivojlantirish strategiyalari (38 ta) hamda har bir hududni rivojlantirish strategiyalarini (14 ta) qabul qilish rejalashtirilgan.

Qayd etilganidek, Strategiyada belgilangan samaradorlik ko‘rsatkichlariga erishish barcha darajadagi tashkilotlar uchun ustuvor vazifa hisoblanadi.

O‘zbekiston Respublikasi Prezidenti topshiriqlariga muvofiq, yurtimizning kelgusi besh yillik taraqqiyotiga daxldor bo‘lgan ushbu hujjat keng jamoatchilik muhokamasidan o‘tkazilib, aholimizning fikr-mulohazalari asosida takomillashtiriladi.

Shunga ko‘ra, Strategiya loyihasi uzbekistan2030.uz va regulation.gov.uz platformalarida jamoatchilik muhokamasiga qo‘yildi.