"Toshkent – Samarqand" yo‘lovchi temir yo‘lini qurish loyihasining TIA taqdim etildi
2025-12-16 17:00:00 / Yangiliklar
Xabaringiz bor, joriy yilning 14-fevral kuni “Toshkent – Samarqand” yo‘nalishida yuqori tezlikdagi alohida yo‘lovchi tashish temir yo‘lini qurish loyihasining texnik-iqtisodiy asoslarini (TIA) ishlab chiqish jarayonlariga “start” berilgan edi.
Mazkur loyiha TIAsini ishlab chiqish uchun Koreya Eksport-import banki tomonidan 3 mln AQSH dollari miqdoridagi grant mablag‘lari ajratilgan.
Bugun, 16-dekabr kuni Janubiy Koreyaning "Saman Engineering”, “Dong Myeong Engineering Consultants & Architecture Co., Ltd”, “Korea Railroad Corporation” va “Korea National Railway” kompaniyalaridan iborat konsorsium tomonidan ishlab chiqilgan TIA bo‘yicha hisobot o‘tkazildi.
Mazkur tadbirda Transport vazirligi, "O‘zbekiston temir yo‘llari" AJ rahbariyati, tegishli vazirlik va idoralarning mas’ul xodimlari, Koreya Eksport-import banki, Xalqaro moliya tashkilotlari vakillari hamda Koreya kompaniyalaridan iborat konsorsium vakillari ishtirok etdi.