Guanchjouda bo‘lib o‘tgan xalqaro forumda TDTU ilg‘or texnik-ta’lim modelini yaratish yuzasidan muhim shartnoma imzoladi
2025-11-19 14:00:00 / Yangiliklar
Tadbir professional ta’limning global integratsiyasi, sanoat bilan uzviy hamkorlikni kengaytirish va raqamli kompetensiyalarni rivojlantirish bo‘yicha Osiyodagi eng yirik muloqot maydonlaridan biri sifatida e’tirof etiladi.
Toshkent davlat transport universiteti ushbu nufuzli forumda xalqaro hamkorlik bo‘yicha prorektor prof. Bakhodir Turayev va O‘zbekiston–Turkiya texnik hamkorlik ofisi direktori, Xitoy bilan ishlash koordinatori Dr. Melike Basbinar boshchiligidagi delegatsiya bilan ishtirok etdi.
Yig‘ilish davomida universitetimiz vakillari dunyoning turli davlatlaridan tashrif buyurgan ta’lim tashkilotlari, ilmiy markazlar va sanoat korxonalari bilan suhbatlar olib borib, qo‘shma loyihalar bo‘yicha yangi istiqbollarni muhokama qildilar.
Tadbirning eng muhim nuqtalaridan biri — “Lingnan Artisan Polytechnic / Lingnan ustaxonasi”ni tashkil etish bo‘yicha to‘rt tomonlama hamkorlik shartnomasining imzolanishi bo‘ldi. Ushbu kelishuv Guangdong Transportation Polytechnic, Guangzhou Nanling Automobile Co. Ltd., Guangdong International Science and Technology Cooperation Alliance hamda Toshkent davlat transport universiteti o‘rtasida imzolandi.
Mazkur hujjat TDTUda sanoat tomonidan qo‘llab-quvvatlangan ilg‘or texnik-ta’lim modelini yaratish, xususan, avtomobilsozlik va ilg‘or muhandislik yo‘nalishlarida amaliy laboratoriyalarni shakllantirishga yo‘naltirilgan.
Guanchjoudagi forum TDTU uchun nafaqat xalqaro ta’lim hamkorligi geografiyasini kengaytirish, balki texnologik hamkorlik, qo‘shma professional ta’lim dasturlari, mutaxassislar tayyorlash va ilmiy loyihalar bo‘yicha yangi imkoniyatlar eshigini ochdi.
Ma’lumot uchun: 2025-yil yozida Guanchjou shahridagi O‘zbekiston Bosh konsulligida TDTUda “Linnan / Lingnan oliy professional ustaxonasi”ni tashkil etish bo‘yicha rasmiy kelishuv imzolangan edi. Mazkur tashabbus Guangdong hukumati tomonidan qo‘llab-quvvatlangan bo‘lib, Toyota, BYD, Chery kabi yirik sanoat kompaniyalari bilan hamkorlikda zamonaviy texnik laboratoriyalarni yaratishni nazarda tutadi. Loyihaning 1-bosqichi uchun 800 ming AQSh dollari ajratilgan.