Toshkent metropolitenida kitobxonlar uchun “Turon kitob bekati” tashkil qilindi
2025-11-06 16:00:00 / Yangiliklar
Eng sara asarlar, shaxsiy rivojlanishga xizmat qiluvchi adabiyotlar, sheʼriy toʻplamlar, zamonaviy qoʻllanmalar bilan boyitilgan bu mutolaa bekati yoʻlovchilar uchun noyob va qulay imkoniyatdir. Oʻquvchilar bekatdan-bekatgacha kitoblarni oʻqishi va ularni Mutolaa loyihasidan buyurtma qilishi mumkin boʻladi.
Tadbirda Respublika Maʼnaviyat va maʼrifat markazi rahbari Otabek Hasanov, Yozuvchilar uyushmasi raisi Sirojiddin Sayyid soʻzga chiqib, yangi loyiha yoshlarning kitobga boʻlgan qiziqishiga turtki boʻlishini taʼkidladi.
“Turon kitob bekati” deb nomlangan loyiha doirasida mahalliy va xorijiy mualliflarning asarlari joylashtirilgan kitob javonlari metropolitenning Turkiston, Ipak yo‘li, Beruniy, Chilonzor, Mingo‘rik, Toshkent, Do‘stlik metro bekatlarida o‘rnatildi. Kelgusida kutubxonalarni yerosti va yerusti metropoliten liniyalarining boshqa bekatlariga ham o‘rnatish ko‘zda tutilmoqda.
Mazkur loyihani amalga oshirishdan ko‘zlangan maqsad metropolitenda har kuni millionlab yo‘lovchilarni manziliga yetkazishda ularning safarini mazmunli, foydali qilish, bilim, ma’rifat va kitobxonlik madaniyatini yo‘llarimiz, bekatlarimiz, metro yo‘nalishlarida targ‘ib qilishdan iboratdir.