1. Mazkur Nizom O‘zbekiston Respublikasi Madaniy meros agentligining Ilmiy-ekspert kengashi (keyingi o‘rinlarda — Kengash) maqomi, asosiy vazifalari, funksiyalari, huquqlari va majburiyatlari, faoliyatini tashkil etish, shuningdek, Kengashda murojaatlarni ko‘rib chiqish muddatlari va tartibini belgilaydi.

2. Kengash o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, shuningdek, ushbu Nizomga hamda boshqa qonunchilik hujjatlariga amal qiladi.

3. Kengash yuridik shaxs hisoblanmaydi va o‘z faoliyatida O‘zbekiston Respublikasi Madaniy meros agentligiga (keyingi o‘rinlarda — Agentlik) hisobot beradi.

 

4. Kengashning asosiy vazifalari quyidagilar hisoblanadi:

moddiy madaniy meros obyektlarini muhofaza qilish va ulardan foydalanish sohasidagi davlat siyosatining asosiy yo‘nalishlarini amalga oshirish yuzasidan takliflar tayyorlash;

respublika va mahalliy ijro etuvchi hokimiyat organlari, xo‘jalik birlashmalari, shuningdek, nodavlat notijorat tashkilotlarining moddiy madaniy meros obyektlari bilan bog‘liq masalalar bo‘yicha faoliyatini muvofiqlashtirishni yanada takomillashtirish yuzasidan takliflar tayyorlash;

moddiy madaniy meros obyektlarini muhofaza qilish va ulardan foydalanish jarayonida yuzaga keladigan masalalarni ilmiy jihatdan ko‘rib chiqish, ularni hal etish bo‘yicha ilmiy va amaliy takliflar tayyorlash hamda amalga oshirishda ishtirok etish;

moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari, ularda rejalashtirilgan asrashga doir ishlarni obyektning tarixiy-madaniy ahamiyati hamda noyobligiga putur yetkazmagan holda texnologiya va materiallarning qo‘llanilishi bo‘yicha tegishli xulosa berish;

yuridik va jismoniy shaxslarga moddiy madaniy meros obyektlarini muhofaza qilish va ulardan foydalanishda moddiy madaniy meros obyektlarini muhofaza qilish va ulardan foydalanish to‘g‘risidagi qonunchilik hujjatlari buzilishlarining oldini olish bo‘yicha ilmiy-ekspertlik takliflarini berish;

alohida muhofaza qilinadigan tarixiy-madaniy hududlar, tarixiy-madaniy ahamiyatiga ko‘ra YUNESKOning Umumjahon merosi ro‘yxatiga kiritilgan obyektlarni (hududlarni) ishonchli muhofaza qilish, ushbu hududlarda qurilish-montaj va obodonlashtirish ishlarini ularning umumbashariy bemisl qiymatiga salbiy ta’sir etmagan holda amalga oshirish bo‘yicha ilmiy xulosalar berish;

madaniy merosning ko‘chmas mulk obyektlarini (ularning qismlarini) tarixiy-madaniy ahamiyatidan kelib chiqib, Madaniy meros obyektlarining milliy ro‘yxatiga kiritish yoki undan chiqarish bo‘yicha xulosalar berish;

madaniy meros obyektlarining tarixiy, ilmiy, badiiy yoki o‘zgacha madaniy qiymatiga salbiy ta’sir qilmasligini ta’minlash maqsadida ulardan foydalanish maqsadlari va shartlarini tasdiqlash yoki yetarli darajada asoslantirgan holda tasdiqlashni rad etishga doir masalalar yuzasidan xulosalar berish.

5. Kengash o‘ziga yuklangan asosiy vazifalarga muvofiq quyidagi funksiyalarni bajaradi:

moddiy madaniy merosning ko‘chmas mulk obyektlari tarixiy-madaniy ekspertiza xulosalarini tasdiqlash, davlat sud ekspertizasi xulosalari bundan mustasno;

moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari bo‘yicha xulosa berish;

respublika va mahalliy ijro etuvchi hokimiyat organlari, xo‘jalik birlashmalari tomonidan moddiy madaniy meros obyektlarini muhofaza qilish va ulardan foydalanish to‘g‘risidagi qonunchilik hujjatlari ijrosini ta’minlash amaliyotini ko‘rib chiqishda ishtirok etish;

moddiy madaniy meros obyektlarini muhofaza qilish va ulardan foydalanish bo‘yicha normativ-huquqiy hujjatlar loyihalarini ko‘rib chiqishda ishtirok etish;

moddiy madaniy merosning ko‘chmas mulk obyektlari va ularning qo‘riqlanadigan tegralarida yer qazish, yer tuzish, qurilish, melioratsiya va boshqa xo‘jalik ishlari, asrashga doir ishlarni amalga oshirish hamda ilmiy va ilmiy-texnik tadqiqotlar o‘tkazishga oid loyihalarga xulosa berish;

alohida muhofaza qilinadigan tarixiy-madaniy hududlar hamda tarixiy-madaniy qiymatiga ko‘ra YUNESKOning Umumjahon merosi ro‘yxatiga kiritilgan hududlarda (obyektlarda) qurilish-montaj, obodonlashtirish hamda tarixiy-madaniy qiymatga ega bo‘lmagan bino va inshootlarni buzish ishlari va yerdan foydalanish loyihalariga xulosa berish;

alohida muhofaza qilinadigan tarixiy-madaniy hududlar, tarixiy-madaniy qiymatiga ko‘ra YUNESKOning Umumjahon merosi ro‘yxatiga kiritilgan hududlar (obyektlar) boshqaruv rejalariga xulosa berish;

tarixiy-madaniy qiymatiga ko‘ra, YUNESKOning Umumjahon merosi ro‘yxatiga kiritilgan hududlarning (obyektlarning) qo‘riqlanadigan tegralari loyihalariga xulosa berish;

hududlardagi moddiy madaniy merosning ko‘chmas mulk obyektlariga ularning turi va joylashuvidan kelib chiqib, muhofaza belgilari namunalarini tasdiqlash.

 

6. Kengash quyidagi huquqlarga ega:

O‘ziga yuklangan vazifalarni bajarish uchun Agentlik tomonidan tashkil etiladigan hay’at yig‘ilishlarida va hududlardagi sayyor yig‘ilishlarda ishtirok etish;

Agentlik faoliyatining samaradorligini oshirish bo‘yicha taklif va tavsiyalarni ishlab chiqishda hamda amalga oshirishda qatnashish;

Kengashning kun tartibiga kiritilgan masalalar yuzasidan tahliliy materiallarni vazirlik va idoralar, Agentlik va uning tizimidagi tashkilotlardan so‘rab olish.

Kengash qonunchilik hujjatlariga muvofiq boshqa huquqlarga ham ega bo‘lishi mumkin.

7. Kengashga quyidagi majburiyatlar yuklanadi:

Kengashning yig‘ilish kun tartibiga kiritilgan materiallarni adolatli va xolisona ko‘rib chiqish;

Kengashning yig‘ilish kun tartibiga kiritilgan materiallarni ko‘rib chiqishda madaniy meros obyektlari muhofazasi va saqlash choralarini ko‘rish;

YUNESKO Umumjahon merosi markazining tavsiyalari va Umumjahon madaniy va tabiiy merosini muhofaza qilish to‘g‘risidagi konvensiyasi talablari bajarilishini ta’minlash;

madaniy meros obyektlari, alohida muhofaza qilinadigan hududlar va YUNESKO Umumjahon merosi hududlari tarixiy qiyofasini saqlab qolish choralarini ko‘rish;

Kengash xulosalarining ochiqligi va shaffofligini ta’minlash.

Kengashga qonunchilik hujjatlariga muvofiq boshqa majburiyatlar ham yuklanishi mumkin.

8. Kengash tarkibiga rais, uning o‘rinbosari va a’zolaridan iborat tarix, me’morchilik, moddiy madaniy meros sohasida ilmiy, amaliy tajribaga ega bo‘lgan 9-11 nafargacha olim va yuqori malakali mutaxassislar kiritiladi.

Kengash tarkibi O‘zbekiston Respublikasi Vazirlar Mahkamasi tomonidan tasdiqlanadi.

Agentlik direktorining birinchi o‘rinbosari Kengash raisi hisoblanadi.

9. Agentlikning hududiy boshqarmalari huzurida Ilmiy-maslahat kengashlari tashkil etiladi va ushbu kengashlarning tarkibi Agentlik direktori tomonidan tasdiqlanadi.

10. Kengash raisi o‘z vakolatlari doirasida:

Kengash faoliyatini tashkil etadi;

Kengash yig‘ilishlariga raislik qiladi;

Kengash nomidan hujjatlarni imzolaydi;

Kengash qarorlarini amalga oshirish bo‘yicha faoliyatni muvofiqlashtiradi;

Kengashning samarali ishini ta’minlash bo‘yicha boshqa vakolatlarni amalga oshiradi.

Kengashning raisi bo‘lmagan taqdirda, uning vakolatlari va majburiyatlarini rais o‘rinbosari bajaradi.

11. Kengash raisi o‘rinbosari:

rais yo‘qligida Kengashning yig‘ilishlarida raislik qiladi;

Kengash qarorlarining ijrosini nazorat qilish bo‘yicha ishlarni tashkil etadi;

Kengashning vakolatiga kiradigan masalalar bilan bog‘liq murojaatlarni ko‘rib chiqadi va natijalari bo‘yicha tegishli hujjatlarni tayyorlaydi;

Kengash ishini samarali tashkil etish bo‘yicha boshqa vakolatlarni amalga oshiradi.

12. Agentlik direktorining tegishli buyrug‘iga asosan Agentlikning Kengash faoliyatiga mas’ul xodimi Kengash mas’ul kotibi vazifasini bajaradi va Kengash tarkibiga kirmaydi hamda ovoz berish vakolatiga ega emas.

13. Kengash mas’ul kotibi:

Kengash faoliyatini uslubiy, tashkiliy-huquqiy va tashkiliy-texnik jihatdan ta’minlash masalalarini hal qiladi;

Kengashda ko‘rib chiqish uchun kiritilgan masalalar bo‘yicha barcha zarur materiallar o‘z vaqtida tayyorlanishini ta’minlaydi, Agentlik xodimlaridan zarur hujjatlar va ma’lumotlarni so‘rab oladi;

zarur hollarda, kun tartibiga muvofiq Kengash sayyor yig‘ilishi o‘tkazilishini tashkil etadi;

Kengash sayyor yig‘ilishi o‘tkaziladigan sana, joy va taklif etiladigan shaxslar ro‘yxatini Kengash raisi bilan kelishadi;

Kengash a’zolarini va taklif etilgan shaxslarni Kengash yig‘ilishi o‘tkaziladigan joy, sana va vaqt haqida oldindan xabardor qiladi;

Kengash yig‘ilishining bayonnomasini rasmiylashtiradi va tasdiqlangan bayonnomaning Kengash a’zolari hamda boshqa manfaatdor shaxslarga tanishtirilishini ta’minlaydi;

Kengashning yig‘ilishlari va kun tartibidagi masalalar to‘g‘risidagi ma’lumotlarni hamda kun tartibidagi masalalar yuzasidan qabul qilingan qarorlar to‘g‘risida Agentlikning rasmiy veb-saytida e’lon qilish uchun Agentlikka taqdim etadi.

14. Quyidagi holatlarda Kengash raisi, rais o‘rinbosari va a’zolari Kengash tarkibidan chiqarilishi mumkin:

Kengash tarkibidan chiqish to‘g‘risida ariza bilan murojaat qilganda;

huquqbuzarlik, shuningdek, jamiyatda o‘rnatilgan odob-axloq qoidalari hamda umume’tirof etilgan normalarni qo‘pol ravishda buzuvchi va Kengash a’zosi nomiga dog‘ tushiruvchi hamda Kengash obro‘siga putur yetkazuvchi harakatlar, nojo‘ya ishlar sodir etganda;

o‘z vazifalarini uzrli sabablarsiz uch oydan ortiq muntazam ravishda bajarmaganda, shu jumladan, Kengash yig‘ilishlarida ishtirok etmaganda;

sudning qonuniy kuchga kirgan hal qiluv qarori asosida muomalaga layoqatsiz, bedarak yo‘qolgan deb topilganda yoki sudning qonuniy kuchga kirgan hukmiga asosan ozodlikdan mahrum etilganda;

vafot etganda.

15. Kengash a’zolari uning yig‘ilishlarida ko‘rib chiqiladigan masalalarni muhokama qilish va hal qilishda o‘z vakolatini boshqalarga o‘tkazish huquqiga ega emas.

16. Kengash a’zolari va kotibiga Agentlikning budjetdan tashqari Madaniy meros jamg‘armasi hisobidan har oyda mehnatga haq to‘lashning eng kam miqdorining uch baravari miqdorida haq to‘lanadi, Kengash a’zolari tarkibiga kiritilgan Agentlik boshqaruv xodimlari bundan mustasno.

17. Kengash yig‘ilishlarida va Kengashda ko‘rib chiqish uchun kiritilgan masalalar yuzasidan uzrli sabablarsiz ishtirok etmaganligi yoki ovoz bermaganligi uchun Kengash a’zolariga to‘lanadigan haqning 30 foizi to‘lanmaydi.

Bunda Kengashda ko‘rib chiqish uchun kiritilgan masalalar yuzasidan Kengash yig‘ilishlarida ketma-ket uch marta ishtirok etmaslik yoki ovoz bermaslik ularga belgilangan to‘lovlar to‘lanmasligi hamda a’zolikdan chiqarish masalasini ko‘rib chiqish uchun asos hisoblanadi.

18. Kengash qarorlarining ijro etilishi ustidan monitoring yuritish va uning natijalarini tahlil qilish hamda qonunchilik hujjatlarida belgilangan tartibda huquqiy ta’sir choralari ko‘rilishini ta’minlash Agentlik tomonidan amalga oshiriladi.

19. Kengash yig‘ilishlarini Kengash raisi olib boradi, Kengash raisi qatnashmagan hollarda uning topshirig‘iga ko‘ra yig‘ilishni rais o‘rinbosari olib boradi.

Kengash yig‘ilishlari bir oyda kamida ikki marta o‘tkaziladi.

20. Kengashning navbatdan tashqari yig‘ilishi Kengash a’zolarining uchdan bir qismining yozma murojaati yoki Agentlikning so‘rovi asosida chaqirilishi mumkin.

21. Kengash yig‘ilishlarining kun tartibi, shuningdek, ularni o‘tkazish joyi va vaqti Kengash raisi yoki uning topshirig‘iga ko‘ra rais o‘rinbosari tomonidan belgilanadi.

Kengash yig‘ilishi o‘tkaziladigan vaqt, sana, joy va kun tartibi Kengash a’zolari e’tiboriga yig‘ilish bo‘lishidan kamida uch kun oldin yetkaziladi.

22. Yig‘ilishlar Kengash a’zolarining kamida uchdan ikki qismi ishtirok etgan taqdirda (kvorum), vakolatli hisoblanadi.

Yig‘ilishni o‘tkazish uchun kvorum shakllanmagan taqdirda, Kengash yig‘ilishi o‘n kun muddatdan keyin takroran o‘tkaziladi.

23. Kengash qarorlari yig‘ilishda qatnashayotgan Kengash a’zolarining ko‘pchilik ovozi bilan qabul qilinadi. Ovozlar teng bo‘lgan hollarda, yig‘ilishga raislik qiluvchining ovozi hal qiluvchi ovoz hisoblanadi.

Kengash a’zolari ovoz berish jarayonida betaraf qolishga haqli emas. Kengash qaroridan rozi bo‘lmagan Kengash a’zolari o‘zining alohida fikrini bayon qilishga haqli.

Kengash yig‘ilishida ishtirok etish imkoni bo‘lmagan holatlarda, uning a’zosi yig‘ilish kun tartibidagi masalalar bo‘yicha o‘z fikrini yozma shaklda yuborishi mumkin. Bunda uning fikri yig‘ilishda ko‘rib chiqiladi va ovoz berishda hisobga olinadi.

24. Kengash yig‘ilishi qarorlarining mazmuni (sharhi) ommaviy axborot vositalari orqali e’lon qilib borilishi mumkin.

25. Foydalanish huquqi cheklangan axborotlar mavjud materiallar Kengashning yopiq yig‘ilishlarida Kengashning vakolatli a’zolari ishtirokida ko‘rib chiqiladi. Ushbu yig‘ilishlarda qabul qilingan qarorlar belgilangan tartibda rasmiylashtiriladi va ommaviy axborot vositalarida e’lon qilinmaydi.

26. Kengash yig‘ilishlariga boshqa davlat organlari, nodavlat notijorat tashkilotlari va fuqarolik jamiyati boshqa institutlarining vakillari, ommaviy axborot vositalari taklif etilishi mumkin.

27. Kengash yig‘ilishlari onlayn, offlayn, sayyor yoki aralash shaklda o‘tkazilishi mumkin.

28. Kengash yig‘ilishi kun tartibining loyihasi kotib tomonidan Kengash a’zolarining takliflari va Kengash raisining topshirig‘i asosida shakllantiriladi.

29. Kengash yig‘ilishida qabul qilingan qaror bayonnoma bilan rasmiylashtiriladi. Kengash yig‘ilishining bayonnomasi kotib hamda har bir Kengash a’zosi tomonidan imzolanib, yig‘ilishga raislik qiluvchi tomonidan tasdiqlanadi va tasdiqlangan kundan boshlab uch ish kunida Agentlikka, Kengash a’zolariga hamda manfaatdor shaxslarga yuboriladi.

30. Agentlik Kengashning qabul qilgan qaroriga qo‘shilmagan hollarda, Kengash qarorini olgan kundan boshlab o‘n kundan kechikmay unga asoslantirilgan taklif va e’tirozini yozma shaklda taqdim etadi.

Kengash Agentlik tomonidan berilgan taklif va e’tirozlarni o‘n kun muddatda navbatdagi Kengash yig‘ilishining kun tartibida ko‘rib chiqadi va yakuniy qaror qabul qiladi.

31. Kengash bayonnomalari Agentlik tomonidan ro‘yxatga olinadi va saqlanadi.

32. Kengashda ko‘rib chiqish uchun kiritilgan barcha murojaatlar Agentlik tomonidan ro‘yxatga olinadi va Kengash mas’ul kotibiga yuboriladi.

33. Kengash bayonnomalaridan ko‘chirmalar alohida ro‘yxatga olinadi va Kengash raisi tomonidan imzolanadi hamda Agentlik muhri bilan tasdiqlangan holda manfaatdor shaxslarga yuboriladi.

34. Kengash qarorlaridan norozi bo‘lgan tomonlar 10 kun muddatda Kengash qarorlari ustidan Agentlikka shikoyat qilishi mumkin.

35. Kengashda murojaatlar ushbu Nizomga ilovada keltirilgan sxemaga muvofiq ko‘rib chiqiladi.

36. Ariza beruvchi (yuridik yoki jismoniy shaxs) Agentlikning avtomatlashtirilgan axborot tizimi (keyingi o‘rinlarda — elektron axborot tizimi) orqali, jumladan quyidagi masalalarni ko‘rib chiqish bo‘yicha murojaat qiladi:

moddiy madaniy meros obyektini davlat kadastriga belgilangan tartibda kiritish va chiqarish;

moddiy madaniy meros obyektlarini tarixiy-madaniy ekspertizadan o‘tkazish;

aholi punktlari bosh rejalarining loyihalarini ko‘rib chiqish;

moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlarini ko‘rib chiqish;

moddiy madaniy merosning ko‘chmas mulk obyektlari va ularning qo‘riqlanadigan tegralarida yer qazish, yer tuzish, qurilish, melioratsiya va boshqa xo‘jalik ishlari, asrashga doir ishlarni amalga oshirish hamda ilmiy va ilmiy-texnik tadqiqotlar o‘tkazishga oid loyihalarni ko‘rib chiqish;

alohida muhofaza qilinadigan tarixiy-madaniy hududlar hamda tarixiy-madaniy qiymatiga ko‘ra, YUNESKOning Umumjahon merosi ro‘yxatiga kiritilgan hududlarda (obyektlarda) qurilish-montaj, obodonlashtirish va tarixiy-madaniy qiymatga ega bo‘lmagan bino va inshootlarni buzish ishlari va yerdan foydalanish loyihalarini ko‘rib chiqish.

37. Arizada kuyidagi ma’lumotlar ko‘rsatiladi:

yuridik shaxslar uchun — yuridik shaxsning nomi va tashkiliy-huquqiy shakli, uning joylashgan yeri, pochta manzili, telefon raqami, STIR, elektron pochta manzili (agar mavjud bo‘lsa);

jismoniy shaxslar uchun — ariza beruvchining FIO, JShShIR, yashash manzili, telefon raqami, elektron pochta manzili (mavjud bo‘lsa).

Arizaga quyidagilar ilova qilinadi:

amalga oshirilishi nazarda tutilayotgan asrashga doir ishlarning loyihaoldi va loyiha-smeta hujjatlari;

loyihada ko‘rsatilgan obyektning kadastr yig‘majildi (agar mavjud bo‘lsa);

arxeologiya madaniy meros obyektlarining muhofaza tegralarida amalga oshiriladigan loyihalar yuzasidan arxeolog xulosasi.

38. Loyihaoldi va loyiha-smeta hujjatlari moddiy madaniy merosning ko‘chmas mulk obyektlarini asrashga doir faoliyatni amalga oshirish uchun litsenziyaga ega bo‘lgan loyiha tashkiloti tomonidan ishlab chiqilgan bo‘lishi kerak.

Loyihaoldi va loyiha-smeta hujjatlarida quyidagilar aks ettirilishi majburiy hisoblanadi:

binoning fasad qismi;

bino va uning atrofining mavjud holati;

ko‘cha razvyortkasi;

qirqim (razrez);

bosh reja (M 1:500 masshtabda);

loyihalardagi mavjud holat rejasi.

39. Ariza beruvchi murojaat qilgan kunning o‘zida ushbu murojaatni ko‘rib chiqish va tegishli xulosa berish uchun Agentlikning budjetdan tashqari Madaniy meros jamg‘armasiga quyidagi miqdorlardagi to‘lovni amalga oshiradi:

a) moddiy madaniy merosning ko‘chmas mulk obyektlari va ularning qo‘riqlanadigan tegralarida yer qazish, yer tuzish, qurilish, melioratsiya va boshqa xo‘jalik ishlarini o‘tkazishga oid loyihalarni ko‘rib chiqish bo‘yicha:

respublika toifasidagi obyektlar uchun — BHMning 10 baravari;

mahalliy toifadagi obyektlar uchun — BHMning 5 baravari;

b) alohida muhofaza qilinadigan tarixiy-madaniy hududlarda, shu jumladan, YUNESKOning Umumjahon merosi ro‘yxatiga kiritilgan hududlarda bino va inshootlarni qurish yoki ularni buzishga oid loyihalarni ko‘rib chiqish bo‘yicha:

yuridik shaxslar uchun — BHMning 20 baravari;

jismoniy shaxslar uchun — BHMning 1 baravari;

v) moddiy madaniy meros obyektini davlat kadastriga belgilangan tartibda kiritish va chiqarish uchun — BHMning 50 %;

g) moddiy madaniy meros obyektlarini tarixiy-madaniy ekspertizadan o‘tkazishda respublika toifasidagi obyektlar uchun-BHMning 7 baravari, mahalliy toifadagi obyektlar uchun — BHMning 4 baravari;

d) aholi punktlari bosh rejalarining loyihalarini ko‘rib chiqish va ularga xulosa berish uchun — BHMning 5 baravari.

Bunda Agentlik va uning hududiy boshqarmalari tomonidan davlat mulki hisoblangan moddiy madaniy meros obyektlarini davlat kadastriga belgilangan tartibda kiritish va chiqarish, shuningdek, ularni tarixiy-madaniy ekspertizadan o‘tkazish uchun taqdim etilgan loyihalar bo‘yicha to‘lov undirilmaydi.

40. Murojaatchi tomonidan belgilangan to‘lov to‘liq to‘lanmaganligi murojaatni ko‘rib chiqishni rad etish uchun asos bo‘ladi.

41. Agentlik murojaat kelib tushganidan keyin bir ish kuni ichida arizani elektron axborot tizimi orqali tegishliligi bo‘yicha Agentlikning hududiy boshqarmalari huzuridagi Ilmiy-maslahat kengashlari (keyingi o‘rinlarda — Ilmiy-maslahat kengashlari)ga ko‘rib chiqish uchun yuboradi.

42. Ilmiy-maslahat kengashlari ariza kelib tushganidan boshlab 7 ish kuni ichida (qushimcha o‘rganish talab etilganda 14 ish kunigacha) loyihaoldi va loyiha-smeta hujjatlarini hamda obyektni joyiga chiqqan holda o‘rganadi, taqdim etilgan loyihaoldi va loyiha-smeta hujjatlarida xato-kamchiliklar aniqlangan taqdirda esa, ularni bartaraf etishda maslahat hamda amaliy yordam ko‘rsatadi.

Ilmiy-maslahat kengashlari o‘rganish natijalari yuzasidan o‘z xulosasini Kengashga yuboradi.

43. Kengash murojaatni Ilmiy-maslahat kengashi xulosasi hamda quyidagilarga asosan ko‘rib chiqadi:

arxiv ma’lumotlari;

tarixiy manbalar;

ilmiy adabiyotlar;

YUNESKO Umumjahon merosi markazining tavsiyalari va Umumjahon madaniy va tabiiy merosini muhofaza qilish to‘g‘risidagi konvensiyasi talablari;

an’anaviy me’morchilik maktablari xususiyatlaridan kelib chiqqan holda.

44. Kengash Ilmiy-maslahat kengashi xulosasi kelib tushgandan boshlab 7 ish kuni ichida (qushimcha o‘rganish talab etilganda 14 ish kunigacha) arizada ko‘rsatilgan masalalar bo‘yicha tegishli qaror qabul qiladi (xulosa beradi).

45. Kengash kotibi Kengashning tegishli qarori qabul qilingandan boshlab bir ish kuni ichida qabul qilingan qarorni ariza beruvchiga elektron axborot tizimi orqali elektron shaklda yoki ariza beruvchining talabiga ko‘ra qog‘oz shaklida pochta orqali yuboradi.

46. Kengash faoliyatini moddiy-texnik jihatdan ta’minlash Agentlik tomonidan qonunchilik hujjatlarida taqiqlanmagan manbalar hisobidan amalga oshiriladi.

47. Kengash faoliyatiga vazirlik va idoralarning boshqa mansabdor shaxslari, shuningdek, boshqa davlat organlari, tashkilotlar va ularning mansabdor shaxslari aralashuviga yo‘l qo‘yilmaydi.

48. Kengash faoliyati uning Nizomiga va boshqa qonunchilik hujjatlariga muvofiqligi Agentlik direktori tomonidan nazorat qilinadi.

49. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladilar.