Qashqadaryo va Surxondaryo viloyatlarida tadbirkorlar huquqlari bo‘yicha amaliy mashg‘ulotlar o‘tkazildi
2025-09-30 15:05:00 / Yangiliklar
O‘zbekiston Respublikasi Prezidentining 2024-yil 14-noyabrdagi “Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida”gi farmoni asosida joylarda tadbirkorlik subyektlari bilan tizimli ishlash, ularning huquqiy savodxonligini oshirish borasida keng ko‘lamli ishlar amalga oshirilmoqda.
Mazkur farmon ijrosini ta’minlash maqsadida Madaniy meros agentligi tomonidan joriy yil 25-sentabr kuni Qashqadaryo viloyatining Shahrisabz shahrida, 26-sentabr kuni esa Surxondaryo viloyatining Termiz shahrida faoliyat yuritayotgan tadbirkorlar ishtirokida seminar-treninglar o‘tkazildi. Unda muzey-qo‘riqxonalarda va madaniy meros obyektlarida faoliyat olib borayotgan tadbirkorlar, Biznes ombudsman, Savdo-sanoat palatasi hamda boshqa manfaatdor tashkilot vakillari ishtirok etdi.
Seminar davomida tadbirkorlarga madaniy meros obyektlaridan foydalanish qoidalari, huquqlari, qonuniy manfaatlarini himoya qilish mexanizmlari, shuningdek, madaniy meros obyektlari bilan bog‘liq faoliyat davomida duch kelinadigan huquqiy masalalar yuzasidan amaliy maslahatlar berildi. Seminar davomida mutaxassislar tadbirkorlarning savollariga batafsil javob berib, hujjatlarni rasmiylashtirish, litsenziya va ruxsatnomalarni olish tartibi hamda amaliy jihatdan muhim bo‘lgan boshqa masalalar yuzasidan aniq ko‘rsatma va tushuntirishlar berdi.
Ushbu seminar-treninglar tadbirkorlar huquqlarini ta’minlashga xizmat qilish bilan birga ularni madaniy merosni asrash va undan oqilona foydalanish masalalarida ham xabardor etishga qaratilganligi bilan ahamiyatlidir. Yaqin kelgusida shu mavzudagi turkum uchrashuvlar respublikamizning boshqa hududlarida ham bo‘lib o‘tishi rejalashtirilgan.