O‘zbekiston Respublikasi Madaniy meros agentligi

Joriy yil 11-iyun kuni Madaniy meros agentligi huzuridagi Ilmiy-ekspert kengashining navbatdan tashqari yig‘ilishi Toshkent shahrida bo‘lib o‘tdi. Ushbu majlisda Kengash a’zolari tomonidan dolzarb loyihalar ko‘rib chiqildi.

Yig‘ilishda Toshkent shahrining Olmazor tumani Zarqaynar ko‘chasida joylashgan “Hazrati Imom” majmuasi tarkibidagi “Abu Bakr Kaffol Shoshiy” maqbarasi, “Baroqxon”, “Mo‘yi Muborak madrasasi, “Namozgoh” va “Tillashayx” masjidi hududini obodonlashtirish loyihasi ko‘rib chiqildi. Shuningdek, Kengash a’zolari tomonidan poytaxtning Shayxontohur tumani, Alisher Navoiy ko‘chasi, 15-manzildagi “Milliy kino san’ati saroyi” binosi hamda “Shodlik” mehmonxonasi muhofaza hududida ko‘p qavatli noturar joy binosini qurish loyihasi ham kun tartibidagi asosiy masala bo‘ldi. Ilmiy-ekspert kengashining qarori bilan Madaniy meros agentligining rasmiy sayti orqali tanishib chiqish mumkin. 

Ma’lumot uchun, 2024-yilning 20-may kuni Vazirlar Mahkamasining “O‘zbekiston Respublikasi Madaniy meros agentligining Ilmiy-ekspert kengashi faoliyatini yanada takomillashtirish chora-tadbirlari to‘g‘risida”gi qarori qabul qilingan. Qarorga muvofiq Kengashga moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari, ularda rejalashtirilgan asrashga doir ishlarni obyektning tarixiy-madaniy ahamiyati hamda noyobligiga putur yetkazmagan holda texnologiya va materiallarning qo‘llanilishi bo‘yicha tegishli xulosa berishga doir qator vazifalar belgilangan.

Eslatib o‘tamiz, hududda olib borilayotgan obodonlashtirish ishlari yakunlangach shaharning Eski shahri qismi yanada jozibador maskan va yirik sayyohlik majmuasiga aylanishi kutilmoqda.