O‘zbekiston Respublikasi Madaniy meros agentligi

Madaniy meros agentligi huzuridagi Ilmiy-ekspert kengashi tomonidan Jizzax viloyati, Baxmal tumani, “Muzbuloq” MFY hududida joylashgan “Toshbuloq” hamda “To‘g‘onbuloq” arxeologik yodgorliklarini respublika ahamiyatidagi arxeologik yodgorlik sifatida moddiy madaniy merosning ko‘chmas mulk obyektlari milliy ro‘yxatiga kiritish taklifi ma’qullandi. Endilikda Agentlik tomonidan Vazirlar Mahkamasining 2019-yil 4-oktabrdagi 846-son qaroriga qo‘shimcha va o‘zgartirish kiritish uchun o‘rnatilgan tartibda tegishli choralar ko‘riladi.
 
Toshkent shahrida bo‘lib o‘tgan Ilmiy-ekspert kengashining navbatdagi yig‘ilishida shu kabi dolzarb masalalar muhokama qilindi. 120 ga yaqin loyiha ko‘rib chiqilgan majlisda Qashqadaryo viloyati, Shahrisabz tumani, “Olmazor” MFY, Xazara qishlog‘i hududida joylashgan “Soqi Mavlon ota” maqbarasini tarixiy va tabiiy landshaft ko‘rinishini saqlagan holda kompleks ziyoratgohga aylantirish taklifi ham ijobiy hal qilindi.
 
Tarixiy obidalarni asrash, uning tarixiy va estetik qadr qimmatini saqlash Madaniy meros agentligi huzuridagi Ilmiy-ekspert kengashining ustuvor vazifasi hisoblanadi. Shu sababdan, Namangan viloyati, Pop tumani, “Toshqo‘rg‘on” MFY hududida joylashgan “G‘urumsaroy” (“Xolmatboy”) masjidi hududida yangi masjid barpo etish, Andijon viloyati, Baliqchi tumani, “Kattabuloq” MFYda joylashgan “Hotamxon to‘ra” masjidi arxitektura yodgorligida mavjud xonaqo qismida qo‘shimcha bino qurish kabi loyihalar o‘zining haybati bilan madaniy meros obyektlarining tashqi ko‘rinishini berkitib qo‘yayotganligi sababli rad etildi. Umumiy hisobda Buxoro, Toshkent va Samarqand shaharlari, Buxoro, Namangan, Sirdaryo  va Xorazm viloyatlari bo‘yicha 11 ta loyiha tarixiy yodgorliklarning tashqi ko‘rinishiga salbiy ta’sir ko‘rsatishi mumkinligi, Kengash tomonidan berilgan tavsiyalar to‘liq bajarilmaganligi bois tasdiqdan o‘tmadi.
 
Madaniy meros agentligi huzuridagi Ilmiy-ekspert kengashi — mamlakatimizdagi tarixiy, arxeologik va me’moriy obidalarni asrash, ularning asl holatini saqlab qolish hamda madaniy merosni kelajak avlodlarga yetkazish borasida muhim ilmiy va amaliy qarorlar qiladi. Kengash faoliyati orqali tarixiy yodgorliklar to‘g‘risida asosli va puxta o‘rganilgan takliflar ilgari suriladi, ularni saqlashga to‘sqinlik qiluvchi nomaqbul loyihalarga yo‘l qo‘yilmaydi. Bu esa milliy merosimizni asrash va uni barqaror rivojlantirishga xizmat qiladi.
Ilmiy-ekspert kengashining qarori bilan Madaniy meros agentligining rasmiy veb-sayti orqali tanishishingiz mumkin.