O‘zbekiston Respublikasi Madaniy meros agentligi

2025-yilning 16-may kuni Milliy matbuot markazida O‘zbekiston Respublikasi Madaniy meros agentligi tomonidan 18-may Xalqaro muzeylar kuni munosabati bilan ommaviy axborot vositalari uchun matbuot anjumani bo‘lib o‘tdi.

O‘tkazilgan tadbirda Madaniy meros agentligi direktorining birinchi o‘rinbosari akademik Tursunali Kuziyev, boshqarma boshliqlari va Agentlik tizimidagi muzey rahbarlari hamda ommaviy axborot vositalari xodimlari ishtirok etdilar.  Anjumanda direktor o‘rinbosari Agentlik tomonidan 2024-yil va 2025-yilning I choragi davomida muzeylar sohasini rivojlantirish, shu sohadagi xalqaro aloqalarni mustahkamlash, madaniy-ma’rifiy ishlarni yanada takomillashtirish hamda milliy merosni keng targ‘ib etish borasida amalga oshirilayotgan sa’y-harakatlar yuzasidan ma’lumot berdi.

Jumladan, bugungi kunda mamlakatimizda 127 ta davlat muzeyi va ularning filiallari mavjud bo‘lib, shundan 114 tasi Madaniy meros agentligi tizimida faoliyat yuritmoqda. Xususan, 37 ta asosiy muzey va77 ta muzey filiallari, shu jumladan 7 tasi muzey-qo‘riqxona sifatida xizmat ko‘rsatmoqda. Davlat muzeylari fondlarida jami 2,6 mln.dan ortiq muzey ashyolari va kolleksiyalar saqlanmoqda. Shundan 135 mingdan ziyodi keng jamoatchilik uchun ekspozitsiyalarda namoyish etilmoqda.

2024-yil davomida amalga oshirilgan diqqatga molik ishlar:

• Davlat muzeylari tomonidan 253 ta ilmiy-amaliy anjuman, 1823 ta madaniy-ma’rifiy tadbirlar, 678 ta ko‘rgazma, 737 ta mahorat darslari hamda 450 ta teatrlashtirilgan sahna tomoshalari tashkil etildi.

• Muzeylarga jami 4 mln. 340 ming nafar mahalliy va xorijiy sayyohlar tashrif buyurdi. Ulardan 1 million 12 mingi xorijiy, 3 million 200 mingi esa mahalliy mehmonlardir. Ayniqsa, 1,5 mln. nafari 18 yoshgacha bo‘lgan yoshlar, 458 ming nafari nafaqadagi fuqarolar, 230 ming nafarini ijtimoiy himoyadagi qatlam vakillari, 29 ming nafari nogironligi bo‘lgan shaxslar tashkil etdi.

• 34 ta davlat muzeyida xatlov ishlari olib borilib, 5 ta muzeyda aniqlangan kamomad va nomuvofiqliklar tegishli tartibda Prokuratura organlariga yuborildi.

• yurtimiz va xorijiy mamlakatlarda 82 nafar rahbar va xodimlarning malakalari oshirildi.

2025-yilning I choragida erishilgan yutuqlar:

• 1,511 ta tadbirlar, shu jumladan 54 ta ilmiy-amaliy anjuman, 705 ta madaniy-ma’rifiy tadbir, 176 ta ko‘rgazma, 58 ta ko‘chma ko‘rgazma, 406 ta mahorat darslari va 112 ta sahna ko‘rinishlari o‘tkazildi.

• muzeylarga tashrif buyuruvchilarning soni 891,685 nafarni tashkil etdi.

• Saudiya Arabistoni (Jidda) va Qozog‘iston (Olmaota, Ostona) shaharlarida bolib o‘tgan nufuzli xalqaro ko‘rgazmalarda O‘zbekiston muzey kolleksiyalariga mansub ashyo va buyumlar namoyishi tashkil etilib, ular mahalliy va xorijiy jamoatchilikning katta olqishlariga sazovor bo‘ldi.

• 27 ta muzeyda zamonaviy savdo, suvenir do‘konlari, ustaxonalar, onlayn xizmatlar va san’atkorlar uchun maxsus hududlar tashkil etildi.

• 20 nafar xodim malaka oshirish kurslarida qatnashdi.

“Milliy merosga mening hissam!” umumxalqaksiyasi – xalq bilan davlat hamjihatligi:

• aksiya doirasida 2024-yilda 2 mlrd. 83 mln. so‘mga 97 ta madaniy boylik xarid qilindi.

• Mahalliy budjet hisobidan 5 mlrd. 2 mln. so‘m, fond xarid komissiyalari orqali esa 4 mlrd. 7 mln. so‘m evaziga 2,354 ta eksponat kolleksiyalarga qo‘shildi.

• Aholi tomonidan 3,899 ta madaniy boylik muzeylarga beg‘araz taqdim etildi.

• Muzeylarning moddiy-texnik bazasi 8,74 mlrd. so‘mga mustahkamlandi.

2025-yil rejasi:

• 300 ta ilmiy-amaliy anjuman, 2000 ta madaniy-ma’rifiy tadbir, 700 ta ko‘rgazma, 800 ta mahoratdarsi, 500 ta sahna ko‘rinishlari tashkil etilishi rejalashtirilgan.

• Muzey va madaniy meros obyektlarimizga tashrif buyuruvchilarning soni 6 mln.nafardan oshirishga tegishli sa’y-harakatlar safarbar etiladi.

• 8 ta muzeyda xatlov ishlarini olib borish ko‘zda tutilgan.

• 107 nafar muzey rahbar va xodimlarining malakasi oshiriladi.

• Davlat budjetidan 8 mlrd. 75 mln. so‘m ajratilib, muzeylarning moddiy-texnik bazasi bosqichma-bosqich modernizatsiya qilinadi.

• “Milliy merosga mening hissam!” aksiyasi doirasida davlat budjetidan 3 mlrd. so‘m, hududiy budjetlardan esa 500 mln. so‘mdan ajratilishi belgilangan.

Madaniy meros agentligi muzeylar faoliyatini yanada zamonaviylashtirish, xalqaro standartlarga mos infratuzilmani shakllantirish hamda yoshu-keksa avlodni milliy qadriyatlar asosida yanada kamol toptirish sari izchil islohotlarni davom ettiradi.

Shuningdek, xalqaro muzeylar kuni munosabati bilan tashkil etilgan matbuot anjumanida ommaviy axborot vositalar vakillari o‘zlarini qiziqtirgan savollarga ham javob oldilar.