Madaniy meros agentligi tavsiya etadi: O‘zbekistondagi 5 ta top diqqatga molik madaniy meros maskanlari
2025-02-27 12:55:00 / Yangiliklar
Yurtimizda qadim tariximizdan so‘zlovchi madaniy meros yodgorliklari dunyo sayyohlari, qolaversa, mahalliy mehmonlarni ham lol qoldirib kelmoqda. Bugun O‘zbekistondagi eng qiziqarli top 5 ta madaniy meros obyektlari haqida ma’lumot beramiz.
1. Samarqand – Registon maydoni
Samarqandning Registon maydoni O‘zbekistonning eng mashhur tarixiy yodgorliklaridan biri bo‘lib, uchta ulug‘vor madrasadan iborat: Ulug‘bek madrasasi (XV asr), Sherdor madrasasi (XVII asr) va Tillakori madrasasi (XVII asr). Ushbu me’moriy majmua Movarounnahrdagi islom ilmi va madaniyatining markazi hisoblangan. Majmua XVI-XVII asrlarda bunyod etilgan bo‘lib, shahar markazida tashrif buyuruvchilar uchun qulay maskanda joylashgan.
2. Xiva – Ichan qal’a
Majmua O‘zbekistonning eng yaxshi saqlangan tarixiy shaharlaridan biri bo‘lib, YUNESKOning Butunjahon merosi ro‘yxatiga kiritilgan. Ichan qal’aning ichida Ko‘hna ark, Juma masjidi, Toshhovli saroyi va Islom xo‘ja minorasi kabi tarixiy yodgorliklar joylashgan. Muzey-qo‘riqxona ichida 200 dan ortiq ustunga ega masjid, qurilishi uchun yarim millionta g‘isht sarflangan Islom xo‘ja minorasini kabi qadimiy obidlar o‘rin egallagan. Shahar tarixi X-XIX asrlarga borib taqaladi. Ichan qal’a go‘yoki ochiq osmon ostidagi muzey bo‘lib, sayyohlarni o‘zining betakror me’morchiligi bilan kishilarni hayratda qoldiradi.
3. Chorsu bozori
O‘zbekistonning eng qadimiy va mashhur bozorlaridan biri bo‘lib, u Toshkent shahrining markazida joylashgan. Bu bozor bir necha asrlar davomida savdo-sotiq, madaniy almashinuv va ijtimoiy hayot markazi bo‘lib kelgan. Chorsu bozori X asrdan boshlab mavjud bo‘lgan va u Buyuk Ipak yo‘lining muhim savdo markazlaridan biri hisoblangan. “Chorsu” so‘zi fors tilidan tarjima qilinganda “to‘rtta yo‘l chorrahasi” degan ma’noni anglatadi, ya’ni bozor qadimda karvon yo‘llari kesishgan nuqtada joylashgan. Bozor Eski shahar hududida, Ko‘kaldosh madrasasi va Jome masjidi yaqinida joylashgan bo‘lib, u Toshkentning tarixiy markaziy qismi hisoblanadi. Bu hudud hanuzgacha o‘zining qadimiy uslubini saqlab qolgan va sayyohlar uchun katta qiziqish uyg‘otadi. Bozorning asosiy qismi ko‘k gumbaz ostida joylashgan bo‘lib, bu an’anaviy Markaziy Osiyo bozorlari me’morchiligini aks ettiradi. Ushbu gumbaz XX asrning 80-yillarida qayta qurilgan bo‘lib, issiq yoz kunlarida bozor ichidagi haroratni mo‘’tadil saqlashga yordam beradi.
4. Shahrisabz – Oqsaroy
Amir Temur tomonidan qurilgan Oqsaroy saroyi uning shaxsiy qarorgohi bo‘lgan. Hozirda saroyning faqat kirish arkasi saqlanib qolgan bo‘lsa-da, bu joy hanuzgacha Temuriylar davrining ulug‘vorligini namoyon etadi. Saroyni qurishda Movarounnahr, Eron va boshqa qo‘shni diyorlarning taniqli hunarmandlari ishtirok etgan bo‘lib, pardozlash ishlariga 18 yil ketgan. Oqsaroy poydevorining qurilishida oltin qumdan foydalanilgan. Majmuaning kirish arkida arslon va quyosh, shuningdek, uchta halqa shaklidagi Temuriylar davlatining ramzi tasvirlangan.
5. Buxoro – Poyi Kalon majmuasi
Yodgorlik Buxoroning yuragi hisoblanib, u 1127-yilda qurilgan Kalon minorasi, Kalon masjidi va Mir Arab madrasasidan iborat. Kalon minorasi o‘zining 47 metr balandligi bilan Markaziy Osiyodagi eng ulkan qadimiy minoralardan biridir. Bu kabi obidalar O‘zbekistonning boy tarixi va madaniyatini aks ettirib, har yili minglab sayyohlarni mamlakatimizga olib kelmoqda.