O‘zbekiston Respublikasi Madaniy meros agentligi

2024-yilning 26-dekabr kuni Madaniy meros agentligida falsafa fanlari doktori, professor Roiq Bahodirov tomonidan jamlangan “O‘zbekistonga oid Al-Azhar universiteti kutubxonasidagi qo‘lyozma asarlar reyestri” nomli yangi kitobning taqdimoti bo‘lib o‘tdi. Tadbirda Madaniy meros agentligi direktorining birinchi o‘rinbosari Tursunali Kuziyev, ilm-fan namoyandalari, olimlar, ommaviy axborot vositalari hamda soha mutaxassislari ishtirok etdilar. Mazkur noyob risolani jamlashda professorga agentlik xodimi Iroda Kayumova bemisil jonbozlik ko‘rsatgan xamda o‘zbekistonlik va xorijiy olimlarning ilmiy izlanishlari mahsuli oʻlaroq qariyb 2,5 mingta qo‘lyozmaning batafsil bibliografik tavsifi keltirilgan. 

Nashrdan chiqqan yangi kitob O‘zbekiston Respublikasi Tashqi ishlar vazirligi va O‘zbekiston Respublikasining Misr Arab Respublikasidagi Elchixonasining amaliy koʻmagida olingan, “Al-Azhar ash-Sharif (universiteti)” kutubxonasining 2016-yilda nashr etilgan 49,361 ta qo‘lyozmasiga taalluqli ilmiy tavsiflardan iborat 28 jilddan iborat salmoqli bosma nashrlar va elektron maʼlumotlar bazasi asosida saralab tayyorlangan. 

Ushbu reyestrni ishlab chiqishda ilmiy tadqiqotlar asnosida avvalambor Movarounnahr allomalari tomonidan yozilgan asarlar va ular qoldirgan nodir sharhlar nusxalariga e’tibor qaratilib, nashrga kiritildi. Barcha ilmiy tavsiflarni manbada, ya’ni “Al-Azhar ash-Sharif (universiteti) kutubxonasi qo‘lyozmalari fihristi”da keltirilgan ma’lumotlar asosida, ya’ni ularni o‘zgartirmagan holda bayon etilgan. Fihristdagi mazkur qo‘lyozma nusxalari ichidan bevosita O‘zbekiston olimlari tomonidan yozilgan yoki ularning asarlariga oid sharhlardan tashkil topgan 2,428 ta qo‘lyozmaga oid ma’lumot mavjud.

Mazkur nashr Madaniy meros agentligi tizimidagi tashkilotlar, Vazirlar Mahkamasi huzuridagi O‘zbekistondagi Islom sivilizatsiyasi markazi, Imom Buxoriy nomidagi xalqaro ilmiy-tadqiqot markazi, Imom Termiziy xalqaro ilmiy-tadqiqot markazi, Abu Rayhon Beruniy nomidagi Sharqshunoslik instituti, O‘zbekiston xalqaro islom akademiyasi kabi ilm va maʼrifat dargohlari, shahar va viloyatlar kutubxonalari hamda soha mutaxassislariga beg‘araz taqdim etilishi ko‘zda tutilgan.

Ma’lumot uchun, Al-Azhar ash-Sharif (universiteti) kutubxonasi 381-hijriy/milodiy 992-yili, ya’ni al-Azhar masjidi tashkil etilganidan 20 yil o‘tganidan so‘ng o‘z faoliyatini boshlagan. Muhtasham va nufuzli kutubxona taxminan 1031 yil mobaynida ham Sharq, ham Gʻarbdagi tarix tilsimlarini qayta kashf etishga bel bogʻlagan foydalanuvchilarga xolis xizmat qilib kelmoqda.