Madaniy meros agentligi xodimlari uchun yangi qonunning mazmun-mohiyati yuzasidan axborot berildi
2024-10-17 09:20:00 / Yangiliklar
Ma'lumki, joriy yilning sentabr oyida davlatimiz tarixiy yodgorliklarni asrab-avaylash va restavratsiya qilish bo‘yicha yana bir xalqaro tashkilotga a'zo bo‘ldi. Madaniy meros agentligida ushbu tashkilot va “Madaniy yodgorliklarni saqlash va restavratsiya qilish bo‘yicha xalqaro tadqiqot markazi Ustaviga (Rim, 2013-yil 29-noyabr) O‘zbekiston Respublikasining qo‘shilishi to‘g‘risida”gi qonunning mazmuni yuzasidan xodimlar uchun seminar tashkil etildi.
Inson resurslarini rivojlantirish bo‘limi va Yuridik bo‘limi tomonidan tashkil etilgan yig‘ilishda Agentlikning markaziy apparat xodimlari bilan birga Zoom videokonferensiya dasturi orqali hududiy boshqarma xodimlari ham ishtirok etdilar. Tadbirda Yuridik bo‘limi boshlig‘i Ahadullo Axmedov yangi qabul qilingan qonunning mazmun-mohiyati yuzasidan tadbir ishtirokchilariga axborot berdi.
Madaniy yodgorliklarni saqlash va restavratsiya qilish bo‘yicha xalqaro tadqiqot markazi 1956-yilda tashkil etilgan bo‘lib, uning qarorgohi Rimda joylashgan. Hozirgi vaqtda 140 qa yaqin mamlakat ushbu xalqaro tashkilotga a’zo hisoblanadi.
Xalqaro tadqiqot markazi ta’lim, axborot tarqatish, tadqiqotlar va hamkorlik, jamoatchilik kampaniyalari orqali jahon madaniy merosini asrab-avaylashga ixtisoslashgan xalqaro tashkilotdir. Ushbu markaz YUNЕSKOning maslahat organi bo‘lib, o‘z mandati doirasida jahon madaniy merosi obyektlarida amalga oshirishga mo‘ljallangan loyihalarni ko‘rib chiqishda tegishli xulosa va tavsiyalar tayyorlashga yordam beradi.
Seminar yakunida Agentlik xodimlari o‘zlarini qiziqtirgan savollarga mutaxassislar tomonidan javob oldilar.