Joriy yilning 31-iyul va 1-avgust kunlari Madaniy meros ilmiy-tadqiqot institutida Agentlik huzuridagi Ilmiy-ekspert kengashining navbatdagi yig‘ilishi bo‘lib o‘tadi. Kengash a’zolari tomonidan bu galgi majlisda 74 ta dolzarb bo‘lgan loyihalar ko‘rib chiqiladi.

Kengashning bu galgi majlisi kun tartibidan Navoiy viloyatining Karmana tumanida joylashgan “Karvonsaroy Malikrabot” arxitektura yodgorligi bilan tutash hududda yengil konstruksiyali “Sayyohlarga xizmat ko‘rsatish majmuasi”ni qurish loyiha, Buxoro shahrida joylashgan “Azizxon” masjidini restavratsiya qilish loyihasi hamda Toshkent shahrining Yunusobod tumanida joylashgan “Eski ToshMI”(29-sonli Tibbiyot davolash bo‘limi akademiyasi)ning binolarida ta’mirlash, qayta tiklash ishlarini amalga oshirish kabi loyihalar o‘rin olgan.

Ilmiy-ekspert kengashi a’zolari tomonidan muhokama qilingan loyihalar haqidagi ma’lumotlar bilan Madaniy meros agentligining rasmiy sayti orqali tanishib chiqishingiz mumkin. 

Ma’lumot uchun, 2024-yilning 20-may kuni Vazirlar Mahkamasining “O‘zbekiston Respublikasi Madaniy meros agentligining Ilmiy-ekspert kengashi faoliyatini yanada takomillashtirish chora-tadbirlari to‘g‘risida”gi qarori qabul qilindi.

Qarorga muvofiq kengashga moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari, ularda rejalashtirilgan asrashga doir ishlarni obyektning tarixiy-madaniy ahamiyati hamda noyobligiga putur yetkazmagan holda texnologiya va materiallarning qo‘llanilishi bo‘yicha tegishli xulosa berishga doir qator vazifalar belgilangan.