Qoraqalpog‘iston Respublikasi tarixi va madaniyati davlat muzeyi direktori “Mo‘tabar ayol” ko‘krak nishoni bilan taqdirlandi
2026-03-05 12:45:00 / Yangiliklar
2026-yil 4-mart kuni Toshkent shahridagi Xalqaro forumlar saroyida O‘zbekiston Respublikasi Oila va xotin-qizlar qo‘mitasi tomonidan “Mo‘tabar ayol” ko‘krak nishoni sohibalarini taqdirlashga bag‘ishlangan tantanali marosim bo‘lib o‘tdi.
Mazkur tadbirda Qoraqalpog‘iston Respublikasi tarixi va madaniyati davlat muzeyi direktori Ayjamal Yusupova ham “Mo‘tabar ayol” ko‘krak nishoni bilan taqdirlandi. Ushbu mukofot unga milliy qadriyatlarni asrab-avaylash, madaniy merosni keng targ‘ib qilish hamda xotin-qizlarning jamiyatdagi o‘rnini mustahkamlash yo‘lidagi samarali mehnatlari va munosib hissasi uchun topshirildi.
Ta’kidlash joizki, Ayjamal Yusupova ko‘p yillardan buyon muzey faoliyatini rivojlantirish, tarixiy-madaniy merosni keng targ‘ib etish hamda yosh avlodni milliy qadriyatlarga hurmat ruhida tarbiyalash borasida samarali faoliyat olib borib kelmoqda.
Marosim davomida joriy yilda “Mo‘tabar ayol” ko‘krak nishoniga munosib ko‘rilgan 351 nafar xotin-qizdan 51 nafariga ushbu mukofot tantanali ravishda topshirildi. Taqdirlanganlar orasida ta’lim, sog‘liqni saqlash, ilm-fan, madaniyat va san’at, qishloq xo‘jaligi, tadbirkorlik, mahalla tizimi hamda boshqa ijtimoiy sohalarda samarali faoliyat yuritib, el ishonchini qozongan fidoyi ayollar ham bor.