Xiva shahrida fuqarolar murojaatlari yuzasidan sayyor yig‘ilish o‘tkazildi
2026-02-20 14:50:00 / Yangiliklar
2026-yil 17-fevral kuni Xiva shahrida Madaniy meros agentligi direktorining birinchi o‘rinbosari Tursunali Kuziyev ishtirokida jismoniy va yuridik shaxslar murojaatlarini ko‘rib chiqish maqsadida sayyor yig‘ilish tashkil etildi. Tadbirda Xorazm viloyati Madaniy meros boshqarmasi direktori Furqat Madirimov, “Ichan-Qal’a” davlat muzey-qo‘riqxonasi rahbariyati, Agentlik mas’ul xodimlari hamda surdotarjimon ishtirok etdi.
Sayyor yig‘ilish avvalida Tursunali Kuziyev o‘z chiqishida fuqarolar va yuridik shaxslarning murojaatlarini ko‘rib chiqish masalasi Madaniy meros agentligi faoliyatining ustuvor yo‘nalishlaridan biri ekanligini ta’kidladi. Shuningdek, barcha murojaatlar amaldagi qonunchilik talablariga muvofiq, belgilangan tartib va muddatlarda ko‘rib chiqilib, ular yuzasidan tegishli choralar ko‘rilishini ma’lum qildi.
Yig‘ilish davomida fuqarolar tomonidan quyidagi masalalar ko‘tarildi:
- muzey-qo‘riqxona hududida ijara shartnomasiz faoliyat yuritayotgan tadbirkorlar faoliyatini tartibga solish;
- madaniy meros obyektlarining kichik ta’mirtalab qismlarini muzey tomonidan ta’mirlashga ruxsat berish;
- avariya holatiga kelgan turar joyni qayta qurish bo‘yicha amaliy ko‘mak ko‘rsatish;
- muzey-qo‘riqxona ma’muriyati va fondi uchun zamonaviy bino qurish maqsadida yer maydoni ajratish;
- turizm yo‘nalishida targ‘ibot materiallari, ilmiy to‘plamlar va fotoalbomlarni nashr etish uchun muzey hududida bosmaxona tashkil etish.
Yig‘ilish yakunida barcha murojaatlar ma’lumot sifatida qabul qilinib, tegishli boshqarma va bo‘lim rahbarlariga ularni belgilangan tartibda ko‘rib chiqish va ijrosini ta’minlash bo‘yicha aniq topshiriqlar berildi.
Mazkur sayyor yig‘ilish fuqarolar murojaatlari bilan ishlash tizimini yanada takomillashtirish, madaniy meros obyektlarini asrash va rivojlantirish bo‘yicha ishlarni samarali tashkil etishga xizmat qiladi.