Samarqandda arxeologik merosni muhofaza qilish masalalari muhokama qilindi
2025-12-21 00:30:00 / Yangiliklar
2025-yil 17-dekabr kuni Yahyo G‘ulomov nomidagi Samarqand arxeologiya institutida “O‘zbekiston arxeologiya yodgorliklarini muhofaza qilishning dolzarb masalalari” mavzusida ilmiy-amaliy konferensiya bo‘lib o‘tdi. Anjuman Madaniy meros agentligi direktorining birinchi o‘rinbosari Tursunali Kuziyev hamda Samarqand arxeologiya instituti direktori Mo‘minxon Saidovning kirish so‘zlari bilan boshlandi.
Konferensiyada Madaniy meros agentligining markaziy apparati xodimlari, Agentlikning hududiy boshqarma boshliqlari, muzey xodimlari, soha mutaxassislari hamda institut jamoasi vakillari ishtirok etdilar. Anjuman davomida arxeologiya yodgorliklarini muhofaza qilishning zamonaviy muammolari, ularni saqlash va restavratsiya qilishning ilmiy-uslubiy asoslari, qutqaruv arxeologik tadqiqotlarining amaliy ahamiyati, shuningdek, madaniy meros obyektlarini muhofaza qilishda milliy va xalqaro tajribalar yuzasidan atroflicha fikr almashildi.
Konferensiya yakunida bildirilgan taklif va tavsiyalar arxeologiya yodgorliklarini asrash va ularni kelajak avlodlarga yetkazish borasida muhim ahamiyat kasb etishi ta’kidlandi.