Ilmiy-ekspert kengashi navbatdagi majlisida 150 ga yaqin masalalarni ko‘rib chiqadi
2025-12-18 16:35:00 / Yangiliklar
Madaniy meros agentligi huzuridagi Ilmiy-ekspert kengashining navbatdagi yig‘ilishi 2025-yilning 18–19 hamda 22–23-dekabr kunlari Toshkent shahrida bo‘lib o‘tadi. Kun tartibidan Agentlikning hududiy boshqarmalari tomonidan tayyorlangan taklif va loyihalar o‘rin olgan.
Yig‘ilish doirasida YUNESKOning Umumjahon merosi ro‘yxatiga kiritilgan tarixiy hududlar va ularning bufer zonalarida rejalashtirilgan qurilish ishlari hamda madaniy meros obyektlarining fasad va ichki qismlarini ta’mirlash, restavratsiya va konservatsiya qilishga oid loyihalar muhokama qilinadi. Shu bilan birga, majlis davomida monumental san’at yodgorliklarini madaniy meros obyektlari milliy ro‘yxatiga kiritish, obyektlardan davlat-xususiy sheriklik asosida foydalanish, ularni ijaraga berish hamda kadastr hujjatlarini qayta rasmiylashtirish masalalari ko‘rib chiqiladi.
Shuningdek, kengash tomonidan Andijon, Buxoro, Farg‘ona, Jizzax, Namangan, Navoiy, Samarqand, Sirdaryo, Toshkent, Xorazm viloyatlari hamda Toshkent shahridagi madaniy meros obyektlari joylashgan hududlarda turar va noturar joy binolarini qurish kabi loyihalar bo‘yicha ham yakuniy xulosa beriladi.
Ilmiy-ekspert kengashi kun tartibidagi masalalarning to‘liq ro‘yxati bilan Madaniy meros agentligining rasmiy veb-saytida tanishib chiqish mumkin.