O‘zbekiston Respublikasi Madaniy meros agentligi

27-noyabr kuni Xitoyning Chunsin shahri Osiyo madaniy merosi bo‘yicha mintaqaviy hamkorlik uchun muhim maydonga aylandi. Unda Osiyo madaniy merosi alyansining II Bosh assambleyasi hamda 3-Kengash yig‘ilishi bo‘lib o‘tdi. Tadbirda O‘zbekiston nomidan Madaniy meros agentligi direktori Bahodir Abdikarimov ishtirok etdi.

“Bugungi murakkab dunyoda madaniy merosni asrash — bu nafaqat ilmiy mas’uliyat, balki insoniyatning umumiy kelajagi oldidagi burchdir. Urbanizatsiya, global texnologiyalarning taraqqiy etishi va ekologik xavflar ortib borayotgan sharoitda madaniy merosni avaylab saqlash barqaror rivojlanish siyosatining ajralmas qismiga aylanmoqda.” – dedi o‘z nutqida Madaniy meros agentligi direktori Bahodir Abdikarimov.Shuningdek: “Osiyo madaniy merosi alyansi o‘zining ilmiy almashinuv, tajriba bo‘lishish va hamkorlik platformasi sifatida bugungi ehtiyojlarga javob berayotgan samarali institutdir. O‘zbekiston bu jarayonlarda faol ishtirok etishga, o‘zining boy tarixiy merosini Osiyo sivilizatsiyalari bilan mushtarak qadriyatlar asosida kelajak avlodlarga yetkazishga qat’iy intiladi.” – deya yakunladi O‘zbekiston nomidan vakilimiz.

Ushbu yirik anjumanda Osiyo mintaqasida madaniy merosni muhofaza qilishning yangi yo‘nalishlarini muhokama etish maqsadida 33 ta davlat va xalqaro tashkilot vakillari qatnashdi.

Ma’lumot uchun: Osiyo madaniy merosi alyansi ilk bor 2021-yil 27-oktabr kuni Xitoyning Sian shahrida bo‘lib o‘tgan Osiyo madaniy merosi forumi doirasida Xitoy tashabbusi bilan tashkil etilgan. Alyansning asosiy maqsadi – Osiyo mamlakatlari o‘rtasida madaniy merosni muhofaza qilish, ilmiy almashinuv, restavratsiya, konservatsiya va arxeologik tadqiqotlar sohasida hamkorlikni kuchaytirishdir. Bugungi kunda: Osiyoda madaniy meros sohasidagi birinchi va yagona hukumatlararo tashkilotning bosh qarorgohi Pekin shahrida joylashgan bo‘lib, tarkibida 24 ta a’zo, hamkor va kuzatuvchi davlat mavjud. Shuningdek, uning faoliyati Osiyodan tashqariga, ya’ni Afrika, Yevropa, Lotin Amerikasi va Okeaniya mintaqalarigacha kengaygan. O‘zbekiston Osiyo madaniy merosi alyansi doirasidagi hamkorlikka va kuzatuvchilik maqomiga 2023-yilda qabul qilingan.  Alyans doirasida kadrlar tayyorlash, restavratsiya va konservatsiya, arxeologik tadqiqotlar, ilmiy almashinuv va ko‘rgazma loyihalari bo‘yicha amaliy hamkorlik izchil rivojlanmoqda.

Assambleya doirasida O‘zbekiston uchun muhim qaror qabul qilindi — Surxondaryo viloyati Uzun tumanida joylashgan “Chinortepa” madaniy meros obyektida arxeologik qazishmalar o‘tkazish uchun 140 ming AQSh dollari miqdorida grant ajratildi.

Mazkur mablag‘ yodgorlikning ilmiy tadqiqotlarini chuqurlashtirish, yangi topilmalarni aniqlash va xalqaro arxeologik hamkorlikni kengaytirishga xizmat qiladi.

Yig‘ilishning yana bir muhim natijasi — O‘zbekistonning ushbu alyans Kengashi tarkibiga qabul qilinishi bo‘ldi. Bu O‘zbekistonning madaniy meros sohasidagi xalqaro nufuzini oshiradi hamda mintaqaviy qarorlar va strategiyalarni shakllantirishda faol ishtirok etish imkonini beradi.

Kengashga qabul qilinish O‘zbekistonning so‘nggi yillarda olib borayotgan madaniy merosni muhofaza qilish borasidagi siyosati, restavratsiya ishlari, arxeologik tadqiqotlar va xalqaro hamkorlikdagi faolligi yuqori baholanayotganidan dalolatdir.