Samarqandda arxeologik hamkorlik bo‘yicha xalqaro seminar o‘tkazildi
2025-11-17 16:10:00 / Yangiliklar
Joriy yilning 14-noyabr kuni Yahyo Gʻulomov nomidagi Samarqand Arxeologiya institutida Koreya Meros agentligi hamkorligida xalqaro seminar boʻlib oʻtdi. Unda “Oʻzbekiston Respublikasi Samarqand madaniy-turistik resurslarini rivojlantirish va salohiyatini oshirish” ODA (rivojlanish bo‘yicha rasmiy ko‘mak) loyihasi doirasida bir yil davomida amalga oshirilgan qoʻshma ilmiy-tadqiqot ishlari natijalari muhokama qilindi.
2025-yil davomida Koreya Meros agentligi va Samarqand Arxeologiya instituti tomonidan keng qamrovli ilmiy va amaliy faoliyat olib borildi. Jumladan:
– Samarqand viloyatidagi bir qator arxeologik yodgorliklarda GPR (yer osti tadqiqoti), 3D skanerlash va GIS (raqamli xarita) texnologiyalaridan foydalangan holda ilmiy tadqiqotlar amalga oshirildi;
– oʻzbekistonlik yosh mutaxassislar uchun texnik oʻquv kurslari tashkil etilib, ular zamonaviy uskunalar bilan amaliy ishlash ko‘nikmalarini egalladilar;
– Arxeologiya institutida xalqaro seminarlar oʻtkazilib, Oʻzbekiston, Koreya, Qozogʻiston va Rossiya olimlari oʻrtasida tajriba almashinuvi yoʻlga qoʻyildi;
– madaniy meros obyektlarini raqamlashtirish va hujjatlashtirish bo‘yicha ishlar amalga oshirildi, Samarqand viloyatining bir nechta tumanlarining arxeologik xaritasi ishlab chiqildi;
–soha vakillari uchun ilk bor “Yozgi arxeologlar maktabi” tashkil etildi.
Loyiha doirasida ikki nafar oʻzbekistonlik mutaxassis Koreya Milliy meros universitetida magistratura bosqichida tahsil olmoqda. Bu esa kelajakda mahalliy kadrlarning malakasini oshirish, restavratsiya va arxeologiya yo‘nalishida yangi avlod mutaxassislarini tayyorlashga xizmat qiladi. Tadbir yakunida tomonlar 2026-yilda ham ilmiy-arxeologik ekspeditsiyalarni kengaytirish, yangi texnologiyalarni tadqiqot jarayonlariga joriy etish, qo‘shma nashrlar va seminarlar sonini oshirish bo‘yicha kelishuvga erishdilar.
Tadbir doirasida o‘quv kurslarini muvaffaqiyatli tamomlagan yosh mutaxassislar uchun sertifikatlar topshirildi. Ushbu seminar Oʻzbekiston va Koreya oʻrtasidagi arxeologiya sohasidagi hamkorlikning yanada mustahkamlanayotganidan dalolat beradi.