IIV Akademiyasida boʻlib oʻtgan ilmiy-amaliy konferensiyada kiberjinoyatlarning oldini olish va fosh etishning zamonaviy usullari haqida soʻz bordi
2024-04-19 13:45:00 / Yangiliklar
Manfaatdor tashkilot va muassasalar bilan hamkorlikda oʻtkazilgan anjumanda soha mutaxassislari, olimlar, tadqiqotchilar, kursant yoshlar hamda ommaviy axborot vositalari vakillari ishtirok etdi.
Taʼkidlanganidek, bugungi kunda kibermakonda sodir etilayotgan jinoyatlar tendensiyasi oʻsib bormoqda. Ushbu global muammoga yechim topish uchun kiberxavfsizlikni taʼminlash mexanizmlarini takomillashtirish zarur. Bu borada xorijiy davlatlar tajribasini oʻrganish, ilgʻor yondashuvlarni amaliyotga tatbiq etish, aholining huquqiy madaniyatini shakllantirish, eng muhimi, kiberjinoyatlarning oldini olish va fosh etishning zamonaviy usullarini qoʻllash muhim.
Tadbirda IIV Kiberxavfsizlik markazi, Toshkent shahar IIBB Axborot texnologiyalari sohasidagi jinoyatlarga qarshi kurashish boshqarmasi, Huquqni muhofaza qilish akademiyasi, Toshkent axborot texnologiyalari universiteti, Ichki ishlar vazirligi akademiyasi vakillari soʻzga chiqdi.
“Kiberjinoyatlarga qarshi kurashishda xalqaro hamkorlik”, “Kiberjinoyatlarni tergov qilishning oʻziga xos xususiyatlari”, “Axborot texnologiyalari yordamida sodir etilayotgan firibgarlik va oʻgʻirlik jinoyatlarining tavsifi”, “Kiberjinoyatlarni tergov qilish jarayonida kriptoaktivlarni tadqiq etish” mavzuida maʼruzalar qilindi. Sohadagi yutuq va muammolar yuzasidan fikr almashilib, dolzarb taklif hamda tavsiyalar ishlab chiqildi.
IIV Akademiyasi Axborot xizmati