Tanlov. Dillarda vatan madhi
2024-04-18 11:30:00 / Yangiliklar
Vatan — muqaddas. Uni asrab-avaylash, himoya qilish barobarida, yuqori pardalarda madh etish ham yurt farzandi uchun ulugʻ sharafdir.
Zero, chinakam vatanparvarlik, avvalo, oʻzi tugʻilib oʻsgan zaminni sevmoq hamda ana shu tuygʻu ila ulugʻlamoq orqali koʻngillarda nish uradi, qaror topadi.
Qarshi shahridagi viloyat Yoshlar markazida oʻtkazilgan «Dillarda Vatan madhi» shiori ostidagi qoʻshiq va sheʼriyat tanlovi bu fikrimizni yana bir bor tasdiqladi.
Tanlov viloyat ichki ishlar organlari otaligʻiga biriktirilgan 14 dan 30 yoshgacha boʻlgan yoshlar orasidan eng iqtidorlilarini aniqlash va tanlab olish maqsadida tashkil etildi.
Unda vohaning barcha shahar-tumanlarida oʻtkazilgan tanlovning dastlabki bosqichida gʻoliblikni qoʻlga kiritgan 32 nafar yigit-qiz qatnashdi.
Taniqli mutaxassislardan iborat hayʼat ijodkor yoshlarning ijodiy chiqishlarini baholab bordi.
Qizgʻin bahslarga, muhokamalarga boy kechgan tanlovda sheʼriyat yoʻnalishida gʻoliblikni Qarshi shahar vakilasi Maftuna Temirova qoʻlga kiritdi.
Uning Vatan toʻgʻrisidagi sheʼri nafaqat hayʼat aʼzolarida, balki tomoshabinlarda ham iliq taassurot qoldirdi.
Navbatdagi sovrinli oʻrinlar esa chiroqchilik Onajon Qoʻldosheva hamda shahrisabzlik Shaxina Usmonovaga nasib etdi.
Inson qalbining nozik tor-larini tebratuvchi qoʻshiqchilik sanʼati yoʻnalishida Shahrisabz tumani vakilasi Jasmina Sheraliyeva birinchi, Shahrisabz shahar vakili Eldor Tursunov ikkinchi, Qarshi tumani vakili Ogʻabek Lutfulloyev uchinchi oʻrinni egalladi.
Koʻrik-tanlov gʻoliblari diplom va qimmatbaho sovgʻalar bilan taqdirlandi.
Furqat Jalolov, kapitan. Qashqadaryo viloyati.