O‘zbеkiston Rеspublikаsi Ichki ishlаr vаzirligi

Ichki ishlar organlari xodimlari kuni munosabati bilan Fargʻona viloyati IIB Tezkor boshqaruv markazining yangi binosi foydalanishga topshirildi.

Tadbirda viloyat hokimi Xayrullo Bozorov xizmat avtomashinalarini xodimlarga tantanali ravishda topshirib, bayram bilan barchani qutladi.

Ikki qavatdan iborat ushbu binoda Tezkor boshqaruv markazi hamda Xavfsiz turizmni taʼminlash boshqarmasi xodimlari uchun qulay va zamonaviy sharoitlar yaratilgan.

Tezkor boshqaruv markazi Prezidentimiz tomonidan raqamlashtirish yoʻnalishida belgilab berilgan topshiriqlarning amaldagi ijrosi boʻlib, sunʼiy intellektga asoslangan ilgʻor dasturlar asosida ishlaydi.

Bu esa hududdagi vaziyatni avtomatik tahlil qilish, harakatlanish yoʻnalishlarini bashorat qilish va tezkor qaror qabul qilish imkoniyatini yaratadi.

Yangi texnologiyalar tufayli xodimlarning vaqti tejaladi, qarorlar aniq va tez qabul qilinadi, aholi xavfsizligi esa yanada yuqori darajada taʼminlanadi.

Bu fuqarolarimiz tinchligi va farovonligi yoʻlida xizmat qiladigan yangi boshqaruv madaniyatining boshlangʻich nuqtasidir.

Tezkor boshqaruv markazi faoliyatining dastlabki bosqichidayoq 134 nafar jinoyat sodir etganligi uchun qidiruvda boʻlgan va bedarak yoʻqolgan shaxs, 29 ta qidiruvdagi transport vositasi, 55 nafar yoʻqolgan va adashib qolgan shaxs, 481 nafar belgilangan cheklovlarga amal qilmagan nazoratdagi shaxs masofadan turib aniqlandi, 276 ta jinoyat “issiq izida” fosh etildi.

Joriy etilgan yangi tizim boʻyicha ichki ishlar organlarining barcha kuch va vositalari GPS tizimi orqali nazoratda boʻladi.

Yangi markazning ish boshlashi bilan viloyatimizning Fargʻona, Qoʻqon va Margʻilon shaharlarida dronlar yordamida patrullik faoliyati yoʻlga qoʻyildi, — deydi Fargʻona viloyati IIB Raqamli texnologiyalar va huquqiy statistika xizmati boshligʻi, podpolkovnik Umidjon Xalikov.

Shuningdek, tizimga olib kelingan yangi, zamonaviy qurilmalar, texnika va texnologiyalar, robototexnikalarning imkoniyatlarini tadbir ishtirokchilariga koʻrgazmali tarzda namoyish etdik.

Masalan, Fargʻona texnika universiteti olimlari tomonidan ixtiro qilingan oʻziyurar platforma jamoat tartibini saqlashda juda qoʻl kelmoqda. U masofadan turib boshqariladi, jamoat joylarida yurib, markazga integratsiya qilingan holda xizmat olib boradi.

Bundan tashqari, jahonning ilgʻor mamlakatlarida sinovdan oʻtgan robot it olib kelingan boʻlib, u belgilangan yoʻnalish boʻyicha jamoat joyida huquqbuzarliklarni aniqlab, onlayn tarzda markazga uzatib turish va boshqa bir qator imkoniyatlarga ega.

Bir soʻz bilan aytganda, sunʼiy intellektga asoslangan ushbu markaz Yangi Oʻzbekistonda ichki ishlar organlari chinakam xalqchil va professional tuzilmaga aylanib, jahon tajribalaridan foydalangan holda jinoyatchilikni jilovlashda zamonaviy yondashuvlar amaliyotga joriy etilayotganidan dalolat beradi.

©️ “Postda” gazetasi, Abduvosit Sidiqov, Fargʻona viloyati.