O‘zbеkiston Rеspublikаsi Ichki ishlаr vаzirligi

Joriy yilda ham Prezidentimiz farmoniga muvofiq, bir guruh ichki ishlar organlari xodimlari davlat mukofotlariga sazovor boʻldilar. Mukofotlarni topshirish marosimi Ichki ishlar vazirligi Madaniyat saroyida tantanali ravishda boʻlib oʻtdi. Tadbirda Ichki ishlar vaziri ishtirok etib, mukofotlarni oʻz egalariga topshirdi.

Bayram munosabati bilan IIV huzuridagi Jazoni ijro etish departamentida ham katta tantana uyushtirildi. Departament boshligʻi shaxsiy tarkibga Ichki ishlar vazirining bayram tabrigini oʻqib eshittirdi. Shuningdek, departament rahbari xodimlarga samimiy tilaklar yoʻllab, ularga sihat-salomatlik, oilaviy farovonlik va xizmatda muvaffaqiyatlar tiladi. Shu kuni bir guruh fidoyi xodimlarga Ichki ishlar vazirligining idoraviy koʻkrak nishonlari, faxriy yorliqlar va boshqa esdalik sovgʻalari topshirildi.

Bayramona kayfiyat departament hovlisida oʻtkazilgan konsert dasturi va dasturxon atrofidagi samimiy suhbatlar orqali yanada koʻtarinkilik kasb etdi.

Ichki ishlar organlari – davlatimizning barqaror rivojlanishiga, fuqarolarning tinch va osoyishta hayot kechirishiga xizmat qiladigan muhim tizim hisoblanadi. Har bir xodimning xizmat burchi nafaqat kasbiy masʼuliyatni, balki fidoyilik va vatanparvarlikni ham talab etadi. Shu sababli ularning mehnatiga boʻlgan eʼtibor – bu tinchlikni qadrlash, osoyishtalikni muhofaza qilishga boʻlgan eʼtibor demakdir.

IIV huzuridagi Jazoni ijro etish departamenti Axborot xizmati