Yoshlar — kelajak bunyodkori. Yangi avlod tergovchilari
2025-10-20 08:20:00 / Yangiliklar
Ichki ishlar organlarida xalq manfaati va yurt osoyishtaligi yoʻlida sidqidildan xizmat qilayotgan fidoyi yoshlardan biri leytenant Doniyor Asatullayevdir.
Yakkasaroy tumanidagi «Bogʻsaroy» mahallasida ustozlari — mayor Bekzod Kirgizbayev va kapitan Jamshid Dadaboyev qoʻl ostida profilaktika inspektori yordamchisi sifatida faoliyat yuritishi mobaynida sohaga qiziqishi yanada ortgan lavhamiz qahramoni orzusini amalga oshirish niyatida IIV Akademiyasini muvaffaqiyatli yakunlagandan soʻng Shayxontohur tumani IIOFMB huzuridagi Tergov boʻlimida tergovchi lavozimida xizmatni boshlagan.
Oldindan sohaning ichida yurgan va Akademiyada ustozlaridan saboq olgan, gʻayrat-shijoatli yosh xodimning xizmatga kirishib ketishi qiyin kechmadi. Shuningdek, murabbiy va hamkasblarining bergan yoʻl-yoʻriqlari tez orada oʻz samarasini bera boshladi.
Lavhamiz qahramoni zamonaviy axborot texnologiyalarini yaxshi oʻzlashtirgan, ayniqsa, kiberxavfsizlik, raqamli dalillarni toʻplash va tahlil qilish sohalariga alohida eʼtibor qaratadi. Bu borada bir nechta seminar va oʻquv kurslarida faol qatnashib, xalqaro hamda mahalliy sertifikatlarga ega boʻlgan. Xususan, IIV Tezkor-qidiruv departamenti Kiberxavfsizlik markazi hamda Turkiya Respublikasi Milliy politsiya bosh boshqarmasi kiberjinoyatlarga qarshi kurash boʻlimi tomonidan oʻtkazilgan «Onlayn noqonuniy bukmekerlik va qimor oʻyinlariga qarshi kurashish» oʻquv kursida faol ishtirok etib, sertifikatni qoʻlga kiritgan.
Axborot texnologiyalari sohasidagi bilimlari, jinoyatlarni tergov qilishga masʼuliyat bilan yondashishi tufayli rahbariyat va ustozlari ishonchiga sazovor boʻlmoqda. Doniyor hali yosh, oldida yana koʻplab vazifalar, yuksak marralar turibdi. U sidqidildan mehnat qilib, oʻz ustida muntazam ishlab, yuksak choʻqqilarni zabt etishni maqsad qilgan. Buning uchun unda barcha zarur bilim, qobiliyat va koʻnikma yetarli.
Sarvar SOBIROV, oʻz muxbirimiz.
Toshkent shahri.