IIV Akademiyasining magistratura tinglovchilari uchun profilaktik ahamiyatga ega tadbir oʻtkazildi
2025-10-18 09:00:00 / Yangiliklar
Shaxsiy xavfsizlik bosh boshqarmasining Taʼlim muassasalari boʻyicha boʻlimi tashabbusi bilan tashkil qilingan tadbirda korrupsiya va uning ayanchli oqibatlari xususida soʻz bordi.
Korrupsiya mamlakat taraqqiyotiga toʻsiq boʻluvchi, jamiyatda adolatsizlikning avj olishiga olib keluvchi illat ekanligi, korrupsiyaviy omillar tufayli fuqarolarning davlat organlariga boʻlgan ishonchi yoʻqolib, huquqiy mexanizmlar izdan chiqishi taʼkidlandi.
Keyingi yillarda korrupsiyaga qarshi kurashish barcha sohalarda eng ustuvor vazifa etib belgilangani, bu borada ichki ishlar organlari tizimida ham izchil chora-tadbirlar amalga oshirib kelinayotgani, biroq ayrim nopok xodimlar tomonidan tamagirlik, mansabni suiisteʼmol qilish va boshqa shu kabi jinoyatlar sodir qilinayotgani, ularga nisbatan keskin choralar koʻrilayotgani aytib oʻtildi.
Tadbirda korrupsiya bilan bogʻliq ayrim holatlar keltirilib, tinglovchilarga qatʼiy talablar yetkazildi.
“Jamoada sogʻlom muhitni qaror toptirish rahbarlarga bogʻliq. Ertaga qayerda, qanday lavozimda ishlamang, korrupsiyaga yoʻl qoʻymasligingiz, maʼnaviy fazilatlaringiz bilan shaxsiy tarkibga namuna boʻlishingiz shart”, – dedi SHXBB boʻlim boshligʻi Oʻtkirbek Qosimov.
Shu kuni “Nafsning soʻnggi manzili” nomli videorolik namoyish etildi.
IIV Akademiyasi Axborot xizmati