IIV ishchi guruhi tomonidan Toshkent shahrining Yunusobod va Mirzo Ulugʻbek tumanlarida tungi vaqtlarda tashkil etilayotgan xizmat faoliyati, shuningdek energetika va savdo obyektlarida xavfsizlikni taʼminlashga qaratilgan ishlar oʻrganildi
2025-10-17 09:40:00 / Yangiliklar
Xususan, Yunusobod tumani “Qashqar” mahallasi, Sayilgoh va Zarafshon koʻchalari boʻylab joylashgan majmua poytaxtning madaniy va ijtimoiy-turistik salohiyatida muhim oʻrin tutadigan, mahalliy aholi va mehmonlar uchun qulay dam olish hamda ijodiy muhit kayfiyatini shakllantirishga imkon beradigan maskanligini hisobga olgan holda, tungi xizmatni tashkil etish, fuqarolar xavfsizligini taʼminlash, jamoat tartibini saqlash hamda aholi va poytaxt mehmonlari uchun yaratilgan shart-sharoitlar oʻrganildi.
Tadbir davomida “Otchopar-2” mahallasi, Chinobod koʻchasida joylashgan “Chinobod Plaza” sogʻlomlashtirish va dam olish muassasasida bemor va mehmonlar uchun yaratilgan shart-sharoitlar, kuz-qish mavsumida elektr energiya bilan uzluksiz taʼminlanganligi hamda avariyaviy yoki boshqa favqulodda holatlar yuzaga kelishini oldini olish choralari bilan tanishildi.
Shuningdek, ishchi guruh tomonidan tumanning “Akbarobod” mahallasida joylashgan “Yunusobod dehqon bozori” va “Megaplanet” savdo majmualarida tadbirkorlar va aholi uchun yaratilgan shart-sharoitlar hamda xavfsizlik choralariga eʼtibor qaratildi, majmuaga biriktirilgan xodimlarning shaylik holati nazorat tariqasida tekshirildi.
Tumanning “Sharq Xaqiqati” mahallasida yangi topshirilgan 1-son Huquq tartibot maskani faoliyati bilan tanishildi. Maskan “Sharq Haqiqati”, “Hamkorobod”, “Katta Xasanboy”, “Xasanboy”, “Tiklanish” va “Islomobod” mahallalari hududlarida jamoat tartibini saqlash, fuqarolar xavfsizligini taʼminlash hamda huquqbuzarliklarning oldini olishda tizimli chora-tadbirlarni bevosita amalga oshiradi.
Hududdagi ijobiy tajribalarni boshqa tuman IIBlariga tatbiq etish hamda jinoyatlarning sabab va omillarini tizimli va ilmiy tahlillar orqali aniqlab, kelgusida ularning barvaqt oldini olish boʻyicha koʻrsatmalar berildi.
Oʻrganishlar davomida Mirzo Ulugʻbek tumani “Shahrisabz” mahallasi hududida ijtimoiy-kriminogen vaziyat barqarorligini taʼminlash jarayonlari hamda mahalla faollari bilan oʻzaro hamkorlikda amalga oshirilayotgan ishlar ahvoli bilan tanishildi.
Shuningdek, “Shahrisabz” mahallasidagi Oʻzbekiston ovozi koʻchasida tashkil etilgan 24/7 xizmat koʻrsatish, turistik va gastronomik koʻchasida aholiga yaratilgan shart-sharoitlar hamda hududda jamoat tartibini saqlash va xavfsizlikni taʼminlashga jalb etilgan shaxsiy tarkibning jangovar va tezkor shayligi nazorat tariqasida tekshirildi. Qoʻriqlash xizmatlarining faoliyatini samarali tashkillashtirish borasida tegishli koʻrsatmalar berildi.
Tadbir jarayonida asosiy eʼtibor, xizmatni tizimli ravishda masʼuliyat va hushyorlik bilan tashkil etishga qaratilmoqda, aniqlangan kamchiliklarni bartaraf etish yuzasidan tegishli topshiriqlar berilib, ijrosi nazoratga olinmoqda.
Ishchi guruh tomonidan tungi xavfsizlik choralarini oʻrganish ishlari boshqa tumanlarda ham davom etmoqda.